Read Makassar Version – KITTA' MATANGKASA MIKHA 1 Bible Online

MIKHA 1 - Makassar Version – KITTA' MATANGKASA bible

MIKHA 1

¹ Assala'na Mikha iamintu tubattu ri se're kota ca'di niarenga Moresyet. Ri wattu niparentana pa'rasangang Yehuda iamintu sikamma karaeng: Yotam, Ahas, siagang Hizkia; iaminjo wattua nannarima Mikha pasang battu ri Batara ri passala'na Samaria siagang Yerusalem.

²Pilangngeri, he sikamma bansa-bansaya! Parhatikangi, he pandudu'na sikontu linoa! Niaki battu Batara Kaminang Tinggia salaku sa'bi ambaliang ngasengko! Pilangngerimi a'bicara battu ri Balla' matangkasa'Na ri suruga.

³Naungi battu ri pammantangngang matangkasa'Na Na'jappa irate ri coppo'-coppo' buluka ri buttaya.

⁴Assolongi sikamma buluka irawa ri pala' bangkenNa kontui liling lalang pepe' a'rinraya; la'boroki buttana antama ri ka'bung-ka'bunga, rapang je'ne' irate bulu' a'lo'loro' naung.

⁵Yangasenna anjo lakajariangi lanri dorakai tu Israel siagang angngewai ri Allata'ala. Inai passabakkang nadoraka tu Israel? Sai Samaria ibukotana tonji? Inai passabakkang nanynyomba tu Yehuda ri barhalaya? Sai Yerusalem tonji?

⁶Lanri kammanami anjo na Nakana Batara, “LaKupa'jari Samaria tambungang loro ri paranga, siagang tampa'na taua a'lamung poko' anggoro'. Rumbanganna anjo kotaya laKubuangi antama ri ka'bunga, siagang laKubongkara' kabusuki pondasina.

⁷Patung-patunna ka'jalaka ballinna laniancuruki, siagang sikamma apa-apa nipassareanga mae ri bai'-baine tugasaka ri balla' rewataya lanitunui, kammayatompa sikontu barhalana lanipanraki. Anjo barang-barang kammaya wassele' ibadana ke'nanga mae ri rewata kacopponganga. Kamma-kamma anne kabusu'na anjo laniengkaki ri musu-musunna untu' napassareang mae ri rewata-rewatana ke'nanga.”

⁸Lanri kammana anjo, inakke, Mikha, si'nai pa'maikku siagang akkunrarenga'. La'jappa' natena kummakeang siagang tena kummake pa'lapa' bangkeng untu' ampappicinikangi angkanaya antekamma si'nana pa'maikku. Lappilollonga' rapang kongkong romang siagang lammarranga' rapang unta.

⁹Nasaba' bokka'-bokka'na Samaria takkulleai niballei, siagang Yehuda lanituju tongi ri sare kammaya anjo. Battumi balaya mae ri Yerusalem, pakke'bu' lompona butta passolongang cera'na bansaku.

¹⁰Teako paui mae ri musu-musunta ri Gat ri passala'na bala antujuaki'; teako lappassangi ke'nanga ancinikko angngarru' ngaseng. He pandudu'na Bet-Le-Afra, anggulung mako lalang ri aua salaku tanra tappu' panrannuang!

¹¹Ikau ngaseng pandudu'na Safir, a'lampamako mange ri tampa' pammelakkanga tammakea pakeang siagang tena siri'-siri'nu! Tu Zaanan tena nabarani assulu' battu ri kotana ke'nanga. Sa'ra ammarranna taua ri Bet-Haezel a'jari tanra mae ri kau angkanaya anjoreng tenamo pa'la'langngang.

¹²Nia'mi battu ri dallekang pakke'bu' lompona Yerusalem bala battua ri Batara! Lanri kammana anjo, tena olona tu Marot anrannuang pannulung.

¹³Ikau ngaseng pandudu'na Lakhis, patabami jaranga ri kareta bunduka! Nupalembai dosa-dosa nigaukanga ri Israel sa'genna doraka tommo Yerusalem napakamma.

¹⁴Kamma-kamma anne, he tu Yehuda, latappela'mi battu ri kau kota Moresyet-Gat. Sikamma karaeng-karaeng Israel tenamo nalanggappa bantuang battu ri kota Akhzib.

¹⁵He tu Maresya, laNapassareangko Batara mae ri musunnu eroka ambetai kotanu. Pamimping-pamimpinna Israel makoasaya laccokkoi lalang ri leang-leanga ri Adulam.

¹⁶He tu Yehuda, polongi uu'nu salaku tanra susa mae ri ana'-ana'nu nukamaseanga. Cukkuruki ulunnu sa'genna a'gondolo' rapang jangang-jangang pakanre bakkea, nasaba' laniengkaki ana'-ana'nu mange ri butta pammelakkanga.