Read Makassar Version – KITTA' MATANGKASA MIKHA 2 Bible Online

MIKHA 2 - Makassar Version – KITTA' MATANGKASA bible

MIKHA 2

¹Cilakai tau a'rancanaya kaja'dallang lalang attinrona ri katinroanga ri wattu bangngia, nampa nagaukang anjo rancanana ammukona bari'basa' lanri nia'na pakkullena untu' anggaukangi.

²Punna ero' ke'nanga ri se'reang koko, narampasaki ke'nanga. Punna eroki ke'nanga ri se'reang balla' naalle passai. Baji' barang-baranga kammayatompa kaluargaya tena nia' amang.

³Lanri kammana anjo Nakana Batara, “Kurancanakangi bala lompoa mae ri kau ngaseng, sa'gennu takkullea ta'lappasa'. Ri anjo wattu sialaka tenamo nula'jappa tampo.

⁴Sarennu lanipakei ri taua a'jari piandere', siagang lappareki ke'nanga kelong-kelong kasusaang kammaya anne, ‘Naallemi Batara anne pa'rasanganna ikambe siagang Napassareang mae ri tau antahangai ikambe. Ancuru' taba sikalimi ikambe.’ ”

⁵Lanri kammana anjo, punna narapi' wattunna anjo pa'rasanganga nipoterang mae ri umma'Na Batara, tena manna sitau battu ri kau lantarimai bageanna.

⁶Akkato'bai sikamma taua mae ri nakke, angkana, “Teako akkato'bai mae ri kambe. Teako akkato'bai ri passala'na sikammaya ngaseng anjo. Tena nalanipakasiri' ikambe.

⁷Teako kapangngi angkanaya anggappami pangngalarroi umma' Israel battu ri Batara. Tena nalaNagaukang Batara kammaya ngaseng anjo. Tena le'bakai tappela' kasa'barranNa. Sai sombereki a'bicara mae ri tau anggaukangai apa annabaya?”

⁸Appialimi Batara angkana, “Ikaumi ambunduki ummakKu rapang musu. Ammotereki taua battu ri pa'bundukanga na narannuang angkanaya laamangi ri balla'na, mingka ba'lalo attayang mako anjoreng untu' anrampasaki balla'na.

⁹Tubai'-bainea ri ummakKu nubongkai battu ri balla' nakarimangngia, siagang nurampasaki sa'genna satunggu-tungguna barakka' Kupassareanga mae ri ana'-ana'na ke'nanga.

¹⁰Ambangung mako siagang a'lampamako, anrinni tenamo naamang. Dosa-dosana appabattui bala appakamalla'-malla' mae ri anne tampaka.

¹¹Erokko ri na'bi nangaia a'balle-balle siagang annipu kammayatompa ambotoai angkanaya langgappako anggoro' siagang inungang terasa' sa'genna alla'bi-la'bi.”

¹²Nakana pole Batara, “He umma' Israel niaka ija tassesa! Ma'nassa laKupa'rappungko siagang Kupasse'reko rapang gimbala' ammotereka mae ri barana. Rapang parang ruku' rassia siagang gimbala', kamma tomminjo pa'rasangannu larassi siagang tau jai.

¹³LanynyungkeA' oloang nampa Kuerangko assulu' battu ri pammelakkanga. Lanulappoi pakke'bu'-pakke'bu' lompoa nampa bebasakko a'lampa. INakke KalengKu, Batara, Karaennu, siagang iNakke lampimpingko assulu'.”