Read Makassar Version – KITTA' MATANGKASA MIKHA 7 Bible Online

MIKHA 7 - Makassar Version – KITTA' MATANGKASA bible

MIKHA 7

¹Cilakama' inakke! Rapanga' tau cipuruka a'lampa mange angngattili' rappo anggoro' ri wattunna allalomo wattu rappoa. Tena rapponna poko' rappo-rappoanga. Rappo anggoroka siagang rappo ara bajika la'busu' kabusu'mi nialle.

²Tau lambusuka lanynya'mi battu ri pa'rasanganga, tau majarreka tappa'na mae ri Allata'ala tenamo nibuntulu'. Tunggala' taua massing attayangi kasampatang untu' ammuno. Massing attannangi sikko' untu' paranna tau.

³Para cara'deki a'gau' ja'dala'. Pagawea siagang hakinga appalaki doe' pacoco', siagang pamimpinga napassakangi ero'na, kammami anjo batena ke'nanga assikongkolo' ngaseng.

⁴Manna kaminang bajika siagang kaminang lambusuka battu ri ke'nanga kontumi romang akkatinting tenaya matu-matunna. Narapi'mi wattunna Allata'ala anghukkungi umma'Na sangkamma le'baka Napappakaingakkang mae ri ke'nanga tete ri na'bi-na'bia. Kamma-kamma anne ammumbami karicuanga ri alla'na ke'nanga.

⁵Teako tappakki mae ri singngampi'nu, teako tanjengi mae ri agannu. Tutuko lalang ri kana-kanannu manna pole nabainennuja allangngereki.

⁶ Nasaba', ri wattu kammaya anne para anggota kaluarga massing lasimusu; ana' bura'nea nahinai manggena, ana' bainea naewai amma'na, siagang mintu bainea a'besereki siagang matoang bainena.

⁷Mingka ikatte manrannuangki' mae ri Batara; jarreki tappatta antayangi Allata'alata. LaNapilangngeri pappala' doanta siagang Napasalamakki'.

⁸Tena alasang mae ri musu-musunta untu' rannu pa'mai'na lanri kaancuranta. Nasaba' manna pole kitu'guru', mingka lambangung poleangki'. Kamma-kamma anne niakki' lalang ri sassanga, mingka laNasingariki' Batara.

⁹Doraka maki' ri Batara, lanri kammana anjo musti nikasiaki pangngalarroinNa. Mingka tasalloami naNaalleiki' siagang Nasareki' kaadelang. LaNaerangki' assulu' mae ri singaraka; lanikasiaki kalenta angkanaya Ia ampasalamakki'.

¹⁰Riolo nahinaki' musua nakana, “Kemaeji anjo Batara, Allata'alanu?” Mingka kamma-kamma anne lanaciniki ke'nanga apa Nagaukanga Batara untu' ikatte, siagang la'jari siri'-siri'mi ke'nanga. Laniciniki anjo musu-musunta nibeta siagang nionjo'-onjokang rapang peo' ri aganga.

¹¹He Yerusalem! Narapi'mi wattunna nubangung ammotere' tembo'-tembo'na kotanu. Anjo alloa lanipakaluaraki daeranu.

¹²Sikamma taunnu lammotereki mae ri kau battu ri kere-keremae: battu raya ri Asyur, battu timboro' ri Mesir, battu ri daera Binanga Efrat, battu ri ba'leang tamparang siagang battu ri bulu'-bulu' bellaya.

¹³Mingka buttaya la'jari kalotoroki lanri kaja'dallanna pandudu'na.

¹⁴O Batara, Kikalawaki laloi ummatTa, iamintu umma' nipileTa. Ammantangi ke'nanga bella ri parang lompoa, ri tangnga-tangngana butta copponga. Lappassammi ke'nanga anggappa kanre ri parang ruku'na Basan siagang ri Gilead sangkamma jammang riolo.

¹⁵Appa'nia' maKi' gau' malompo untu' ikambe, o Batara, sangkamma le'baka Kigaukang riolo ri wattunna Kierang ikambe assulu' battu ri Mesir.

¹⁶Lanaciniki bansa-bansaya anjo passalaka siagang a'jari siri'-siri' lanri nasadarina angkanaya sikontu kagassinganna ke'nanga tena anggaranna. Latakkaluppai ke'nanga sa'genna takkulleamo a'bicara yareka allangngere'.

¹⁷Lakkaloloki ke'nanga ri buttaya rapang ulara'. Mallaki siagang annekkereki ke'nanga lassulu' battu ri pattahanganna ke'nanga, nampa battu mae ri Katte, o Karaeng Allata'alana ikambe.

¹⁸Tena Allata'ala sangkammanTa, o Batara, ampammopporangai dosana umma' nipileNa niaka tassesa. Tena Kituli lalarro; kabalekanna, sannangi nyawaTa ampappicinikangi pangngainTa tenaya sanggana.

¹⁹LamangngamaseangKi' pole mae ri kambe siagang Kipammopporangi ikambe. LaKionjo'-onjokangi dosa-dosana ikambe nampa Kipasambila antama ri rawanganna tamparanga!

²⁰Mae ri ummatTa, iamintu jari-jarina Abraham siagang Yakub, laKipappicinikangi majarretTa siagang pangngainTa tenaya sanggana sangkamma Kipa'janjianga mae ri boe-boena ikambe battu riolo dudu.