Read Makassar Version – KITTA' MATANGKASA NAHUM 1 Bible Online

NAHUM 1 - Makassar Version – KITTA' MATANGKASA bible

NAHUM 1

¹ Iaminne pasanNa Allata'ala ri passala'na Niniwe. Anjo pasanga Napa'nyatai lalang paccini' Napassareanga mae ri Nahum, iamintu sitau na'bi battua ri Elkos assala'na.

²Taerokai Karaeng Allata'ala punna nia' ambaliangi, inai-nai angngewai, ma'nassa anggappai hukkungang. Sanna' larroNa, Na'balasa' mae ri ke'nanga.

³Memang, Batara tena nalinta' larro; mingka sanna' todong makoasaNa sa'genna inai-nai anggaukangi salaya tena nalaNapata'lappasa' battu ri hukkunganga. Kemae-kemae Batara a'jappa, anjorengi ammumba anging lompoa; kemae angngonjo' bangkenNa, anjorengi limbu'buka a'jari rammang.

⁴Naga'garaki tamparanga na'jari kalotoro', Napaccappuki je'ne'na sikontu binangaya. Bulu' Karmel siagang sikamma paranga ri Basan a'jari kalotoroki na kalumeng sikamma bungaya ri Libanon.

⁵Annekkereki sikamma buluka ri dallekanNa; na bontoa assolong kabusu'mi Napakamma. Punna ammumba Batara, amme'bereki buttaya, linoa siagang sikontu pandudu'na annekkereki.

⁶Inai akkulle attahang punna larro Batara? Inai akkulle ta'lappasa' battu ri pangngalarroinNa? Napa'betteseki larroNa a'rinraya ancuruki batua a'jari limbu'bu' ri dallekanNa.

⁷Anjo Batara bajiki, Najagai umma'Na ri wattu susa, Najagai tau a'la'langa mae ri Ia.

⁸Kontui a'ba lompoa battu Naancuruki musu-musunNa. Ia barania angngewai Nalappassangi kamateang sa'genna ancuru'.

⁹Manna pole rancana apa nupare' angngewai Batara, ma'nassa lasalasako. Tena Nalapinruang a'balasa' mae ri musu-musunNa lanri larro boli'-boli'Na.

¹⁰Lanitunuko rapang rarame kalotoro' kontu rompo' akkatinting sikalasaka.

¹¹Battu ri kaumi he Niniwe, le'ba' ammumba sitau sannaka jaina rancana ja'dala'na. Appareki rancana untu' angngewai Batara.

¹²Na Nakanamo Batara ri Israel, umma'Na, “Manna pole anjo tu Asyur kassaki siagang jai taunna, mingka laniancuruki ke'nanga sa'genna lanynya'. He bansaKu, le'ba' mako Kupa'jari ballasa', mingka tenamo nalaKugaukang pole anjo kammaya mae ri kau.

¹³Kamma-kamma anne laKupa'le'ba'mi koasana Asyur mae ri kau ngaseng, siagang Kutappu' rante ansikkokai kalennu.”

¹⁴Iaminne kaputusanNa Batara ri passala'na bansa Asyur, angkana, “Tenamo turunganna ke'nanga untu' ampannarrusuki jari-jarina bansana. Patung-patung barhala niaka lalang ri balla' rewata-rewatana laKuancuruki. Kupasadiami jera'na bansa Asyur nasaba' tenamo nasiratang ke'nanga attallasa'!”

¹⁵ Ciniki, nia' sitau suro battu ri moncong-monconga, angngerang kabara' baji', iamintu kabara' pammetang. He bansa Yehuda, pakalompoi allo lomponu siagang bayaraki tinja'nu mae ri Allata'ala. Tenamo nalanijaja pa'rasangannu ri tau ja'dalaka. Le'ba'mi niancuru' taba sikali ke'nanga.