Read Makassar Version – KITTA' MATANGKASA NAHUM 3 Bible Online

NAHUM 3 - Makassar Version – KITTA' MATANGKASA bible

NAHUM 3

¹Cilakai anne kota rassia balle-balle siagang pammunoang; rassia barang-barang nirampasa' yareka nialle passa.

²Pilangngeri sa'ra ba'balaka siagang sa'ra galutturu'na rodaya, sa'ra bangkeng jaranga siagang goccanna karetaya.

³Pasukang a'jaranga lompo sumanga'na maju a'bundu', pa'dang accaya siagang poke accilla'. Tau matea takkulleami nibilang, attambung-tambung maya'na ke'nanga, sa'genna nato'ro sikamma tau a'jappaya.

⁴Anjo Niniwe pasundalaka nihukkungi. Teai sipato' angngonta'na kaga'ganna. Jaimi bansa le'ba' napitabai, siagang nanyonyo' naalle pa'mai'na.

⁵Nakana Batara Kaminang Koasaya, “He Niniwe laKusessako! Kusungkei pakeannu ri dallekanna bansa-bansaya, sa'genna nacini' ngaseng ke'nanga kodinu.

⁶Kupare' kammako apa-apa appakaringi'-ringika, Kusambilako apa-apa ra'masa'; Kuparekko paccini'-cinikang.

⁷Napakabellai kalenna taua punna nacinikko na nakana, ‘Loro mami ammantang Niniwe! Inai todong angngagangi susa? Tena niakka ero' assarei panynyaleori.’ ”

⁸He Niniwe, maka bajikangngangko na Tebe, ibukotana Mesir? Pammantanganna Tebe anjoreng tonji ri biring binanga a'jaria salaku tembo' pannahanna. Binanga Nil, iaminjo benteng pattahanganna.

⁹Tebe ammarentai mae ri Sudan siagang Mesir, na koasana tena sanggana; Libia siagang Put naagangi sita'gala'.

¹⁰Mingka manna nakamma, nijakkala' tonji pandudu'na Tebe na niengka' mange ri pammelakkanga. Ri sikontu panyingkulu' aganga, niba'ji-ba'ji ana'-ana'na sa'genna mate. Sikamma tumalompona nirantei siagang rante siagang nibage-bagei ri tu antahangai.

¹¹He Niniwe, ikau pole latena todong nungngu'rangi napakamma nasa'ring. Nuusahai tongi sollannu ta'lappasa' battu ri musu-musunnu.

¹²Sikontu pattahangannu larapangi poko' ara sannaka jaina rapponna ti'nokamo. Punna nige'goso' anjo poko'na, latu'guruki rapponna ngaseng antama' ri bawana tau eroka angkanrei.

¹³Sikamma tantaranu lammai sangkamma baine, siagang pa'rasangannu tena sikali pakkullena andallekangi musua. Pepeka lanapammutungi sikamma balo' panjolina pakke'bu' lomponu.

¹⁴Anynye'ro' mako je'ne' untu' nupasadia lalang siapa sallonu nikurung, siagang pakkassakammi sikamma tembo'-tembo' pattahangannu! Onjo'-onjokammi peoka untu' appare' batu eja, siagang pasadiami sikamma kataranna!

¹⁵Manna apa nugaukang, tena bua'-bua'na, lanri lala'busukko akkanre yareka lamateko lalang bundu'. Lalanynyakko rapang wassele' koko nikanre ri katimbang. A'bakka' mako katambang jainu rapang katimbang!

¹⁶Sikamma padanggannu la'biangngammi jaina na bintoenga ri langika! Mingka kamma-kamma anne lanynya'mi ke'nanga, rapang katimbang ampaka'rangi ka'nyi'na nampa lanynya' anri'ba'.

¹⁷Sikamma tumalomponu siagang pagawe pamarentanu rapangi lokoang katimbang accokkoa ri tembo'-temboka ri wattu dinginga. Mingka ri wattunna ammumbamo alloa, akkaro-karomi ke'nanga lanynya' anri'ba'; tena manna sitau angngassengi angkana kemae lampana ke'nanga.

¹⁸He karaenna pa'rasangang Asyur! Matemi sikamma guburnurnu, siagang sikamma bupatinu tinro tulusu'mi satunggu-tungguna. Ra'ya'nu tassia'-siara'mi ri moncong-monconga, natena manna sitau akkulle angngerangi ke'nanga ammotere'.

¹⁹Bokka'nu takkulleai niballei, siagang loko'-loko'nu takkulleami pia. Sikontu tau allangngerekai kaancurannu attempa limami napakamma rannu. Nasaba' sessa ngasemmi taua napakamma anjo kaja'dallannu kala'busanga.