Read Makassar Version – KITTA' MATANGKASA HABAKUK 1 Bible Online

HABAKUK 1 - Makassar Version – KITTA' MATANGKASA bible

HABAKUK 1

¹Iaminne pasang Napa'nyataya Batara mae ri Na'bi Habakuk.

²O Batara, sa'ge siapapi salloku musti akkio' appala' tulung mae ri Katte? Angngapapi nampa laKipilangngeri siagang Kipasalama' ikambe battu ri tau anjallakkanga?

³Angngapa Kicini'-cinikia' anciniki kaja'dallang kammaya anjo jaina? Angngapa naKiattahang kamma anciniki gau' sala oloang kammaya jaina? Kemae-kemae nia' nicini' kaancurang siagang katerassang, passiba'jiang, siagang passisala-salang.

⁴Hukkunga nibawang-bawangngangi siagang kaadelanga tale'bakai nipaenteng. Tau ja'dalaka ammetai mae ri tau lambusuka, siagang kaadelanga niputara' baleki.

⁵ Nampa Nakanamo Batara mae ri umma'Na, “Parhatikangi bansa-bansaya ri tammulilinu, nanulalannasa' siagang latakkajannang. Nasaba' ri jammannu nia' apa ero' laKugaukang, tenaya nalanupatappa' punna poro nicarita bawang mae ri kau.

⁶ Bansa Babel sekkeka siagang pallaka laKupa'jari bansa makoasa. A'barrisiki ke'nanga assulu' battu ri pa'rasanganna nampa najappai sikontu linoa untu' ambetai bansa-bansa maraenga.

⁷Kemae-kemae ke'nanga appakamalla'; tampoi ke'nanga antolla' kabusuki sikontu hukkunga pantaranganna situruka siagang ero'na ke'nanga.

⁸Jaranna la'bi gassingi lari na macanga, siagang la'bi sekkeki na serigala cipuruka. Pasukang a'jaranna battui ri pa'rasangang-pa'rasangang bellaya; battui ke'nanga rapang balangkoa' antamberoi apa najakkalaka.

⁹Tantarana majui untu' anggaukangi katerassanga; malla' kabusuki taua anciniki nia' battu ke'nanga. Teai sipato' jaina tau natahanga ke'nanga.

¹⁰Nacau-caui ke'nanga karaeng-karaenga siagang nakakkali pagawe-pagawe tinggia. Nagampangangi sikamma pattahangnganga siagang natambungi butta nampa naalle anjo pattahangnganga.

¹¹Nampa linta' kamma anging a'lampa ngaseng anjo tau ampare' rewatayai kagassingang kalenna.”

¹²O Batara, battu rioloji naiKatte Allata'ala. IKatte Allata'alaku matangkasaka siagang mannannunganga. O Batara, Allata'alaku siagang pa'la'langangku, anjo bansa Babel Kipilei siagang Kipa'jari kassaki untu' anghukkungi ikambe.

¹³Mingka antekamma bateTa akkulle attahang anciniki tau ja'dala' palla' kammaya anjo? Sai iKatte sanna' matangkasatTa untu' anciniki kaja'dallanga? Sai iKatte lanreki anciniki gau' tenaya naadele'? Jari, angngapa natena apa-apa Kikana ri wattunna niancuru' tau bajika ri tau dorakaya?

¹⁴Angngapa rupataua naKikanai sangkamma juku' ri tamparang, siagang rapang kaluara tenaya pamimpinna?

¹⁵Bansa Babel najakkalaki taua siagang pekang, rapang angkana anjo ke'nanga juku'. Anjo taua nare'resangi lalang jala siagang sannang-sannammi anjo tu Babel lanri anjo wassele' nagappaya ke'nanga.

¹⁶Nampa anjo jalaya nasombai ke'nanga siagang nasarei koro'bang, nasaba' lanri iaminjo jalaya nanggappamo ke'nanga dalle' alla'bi-la'bi siagang a'jari kalumanynyang.

¹⁷Masakang tulusu' lanabi'buki ke'nanga pa'danna siagang nabuno bansa-bansaya, tena pangngamaseanna?