Read Makassar Version – KITTA' MATANGKASA HABAKUK 2 Bible Online

HABAKUK 2 - Makassar Version – KITTA' MATANGKASA bible

HABAKUK 2

¹Eroka' nai' ri menara pa'jagaangku, nampa kutayang apa eroka Napau Batara mae ri nakke, siagang antekamma pappialinNa mae ri kunrarengku.

²Appialimi Batara mae ri nakke kamma anne, “Ukiriki baji' pa'nassana mae ri papang batua, apa Kupa'nyataya mae ri kau sollanna akkulle gampang nibaca.

³ Cataki anjo, nasaba' kamma-kamma anne teaipi wattunna. Mingka tasalloai nabattu anjo wattua, siagang apa le'baka Kupa'nyata mae ri kau tena ta'rupana. Manna pole nasallo ijapa cinikanna, mingka tayang mami! Anjo wattua ma'nassa labattui siagang tena nalanipaunduru'.

⁴ Siagang u'rangi: Tau ja'dalaka tena nalalasalama', mingka tau anggaukangai ero'Na Allata'ala lattallasaki lanri majarre'na mae ri Allata'ala.”

⁵Anjo kakalumanynyanganga tuli appa'dongo'-dongoki. Anjo tau angngoaya tampoi siagang lussaki. Rapang kamateang, tena todong nale'ba' sukku' nasa'ring; tasse're-se're bansa naallei nakammai.

⁶Mingka sikontu anjo nabetaya ampianderi siagang ancau-caui. Lanakana ke'nanga, “Nitunraiko nasaba' appatambungko barang-barang nateai ikau pata! Siapapi sallonu ampakkalumanynyangi kalennu lanri nupassana tau niaka inranna mae ri kau ambayaraki inranna ke'nanga?”

⁷Mingka tena nusadari, nanukoasaimo tau maraenga, lakainrangngang todong na nipassa untu' a'bayara' bunga. Labattui musu-musunnu na lanapa'jari mallakko. Lanaellaki ke'nanga barang-barannu.

⁸Le'ba'mi nuella' jai bansa, mingka bansa-bansa akkullea ta'lappasa' langngellakko, lanri pammunoang le'baka nugaukang, siagang lanri kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

⁹Nitunraiko ikau! Nupa'jari kalumanynyangi kaluarganu battu ri passawallang nugappaya lanri gau' palla'nu, sollanna balla' kalennu a'jari amang siagang bellai battu ri kasusaanga siagang balaya.

¹⁰Mingka anjo rancananu poro kasirikang bawang naerang mae ri kaluarganu. Lanri nuella'na jaia bansa, na nurugikammo kalennu.

¹¹Ba'lalo manna batu-batua ri temboka akkio'-kioki antunraiko, siagang benteng-benteng ballaka napakkiokangi anjo pakkio' kammaya.

¹²Nitunraiko ikau! Appaentengko kota irate ri kaja'dallannu siagang nubangungi lalang pammunoang.

¹³Bansa-bansa nubetaya akkaresoi natena matu-matunna resona, siagang sikontu-kontuna apa napaentenga ke'nanga cappuki nakanre pepe'. Yangasenna anjo kammaya ero'Na Batara Kaminang Koasaya.

¹⁴ Mingka rapang tamparang rassia siagang je'ne', buttaya lanipirassi tongi siagang pangngassengang ri sesena Batara siagang kakoasanNa.

¹⁵Nitunraiko ikau! Nuhinai siagang nupakasiriki singngampi'-ampi' balla'nu; nupa'jari ke'nanga ta'royong-royong rapang tau nasa'ring.

¹⁶Kamma-kamma anne narapi'mi wattunnu untu' nipakasiri', siagang tena nanipakalompoko. Kalompoannu lanipinrai a'jari katunang. LaNapassako Batara angnginung battu ri cangkiri' niboneia ri hukkungang untu' kalennu. Lanuinungi nampa ta'royong-royongko.

¹⁷Nuta'bangi poko'-pokoka ri romanna Libanon, siagang kamma-kamma anne ikau kalennu lanita'bang. Nubunoi olo'-olo'na, siagang kamma-kamma anne napa'jari mallakko anjo olo'-oloka. Nakajariang kabusu' anjo kammaya lanri pammunoang siagang kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

¹⁸Nitunraiko ikau! Nukana mae ri kayu sipolonga, “Ambangnungko!” yareka mae ri batu lompoa angkana, “Ammentengko!” Maka akkullei se'rea patung a'bicara mae ri kau? Nakulle anjo patunga nilapisiki bulaeng siagang pera', mingka tena nyawa ri ia. Apa matu-matunna patung barhalaya? Anjo poro bate pare'na rupataua. Apa nugappaya battu ri ia poro balle-balle bawang. Tena bua'-bua'na katappakkanna papare' barhalaya mae ri bate pare' limanna, tenaya nakkulle appau.

²⁰Niaki Batara lalang ri Balla'Na matangkasaka; siratangi sikontu taua ri tompo'na buttaya a'mereki ri dallekanNa.