Read Makassar Version – KITTA' MATANGKASA ZEFANYA 2 Bible Online

ZEFANYA 2 - Makassar Version – KITTA' MATANGKASA bible

ZEFANYA 2

¹He bansa tenaya nangngasseng siri', angngu'rangiko,

²lalang tenanapa nukalumeng siagang kalotoro' rapang bunga! Sadara' mako lalang tenanapa nabattu allo pangngalarroiNa Batara, siagang tenanapa natujuko anjo pangngalarroi a'rinra-rinraNa.

³Ammotere' mako mae ri Batara, he sikontu tau tuna pa'maika ri anne pa'rasanganga, siagang sikontu tau anturukiai parenta-parentaNa. Appanggaukang mako situru' ero'Na Batara, siagang pakatunai kalennu ri dallekanNa. Inai angngassengi gassingka lata'lappasa' jako battu ri hukkunganga ri allo Napa'nyatana kalarroanNa Batara.

⁴ Ri kota Gaza tena manna sitau lanipasalama'. Askelon lasinoi tena bonena. Pandudu'na Asdod lanibongkai lalang pa'bundukang ti'ring battua ri tangngana alloa, siagang pandudu' Ekron lanisuroi a'lampa battu ri kotana ke'nanga.

⁵Nitunrai ngasengko, he tu Filistin, bansa ammantanga ri biring tamparanga. Le'ba'mi Napattantu Batara hukkunganga mae ri kau. LaNapanraki ngasengko, tena manna sitau battu ri kau lakkulle ta'lappasa'.

⁶Daeranu ri ampi'na tamparanga la'jari parang rukuki; balla'-balla' pakalawakia siagang bara-bara gimbalaka lanibangungi anjoreng.

⁷Pandudu'na Yehuda akkullea ta'lappasa' lanaempoi anjo daeranu. Lakkalawaki olo'-olo' ke'nanga anjoreng ri tampaka, siagang punna bangngi latinroi ke'nanga ri balla'na tu Askelon. Nasaba' Batara, iamintu Allata'alana ke'nanga, lanjagai pole ke'nanga siagang laNapa'jari ke'nanga akkalumanynyang poleang.

⁸ Nakana Batara Kaminang Koasaya, “Kulangngere'mi bansa Moab siagang Amon anghinai siagang ancau-caui ummakKu. A'bicara tampoi ke'nanga angkanaya lanarampasaki buttana ummakKu.

⁹ Lanri iNakke mattallasaka, Allata'alana bansa Israel, laKubarrasaki sa'genna tangkasa' bansa Moab siagang Amon, sangkamma Sodom siagang Gomora. Anjo pa'rasangang-pa'rasanganga larassi siagang bungung-bungung ce'la kammayatompa loro-loro napattimboia rompo' sa'genna satunggu-tungguna. Sesanna ummakKu ta'lappasaka lanaellaki pandudu'na, siagang lanaallei buttana ke'nanga.”

¹⁰Kammami anjo pandudu'na Moab siagang Amon lanihukkungi lanri katampoanna siagang kaborroanna ke'nanga, kammayatompa lanri le'ba'na nahina umma'Na Batara Kaminang Koasaya.

¹¹LaNapa'jari Batara malla' ke'nanga. LaNaancuruki rewata-rewata niaka ri tompo'na buttaya. Nampa sikontu bansaya lanynyombai mae ri Batara, massing ri pa'rasanganna ke'nanga.

¹² Kammayatompa pandudu'na Sudan lanihukkung mate tongi ri Batara.

¹³ Le'baki anjo laNapakemi Batara kakoasanNa untu' angngancuruki Asyur. Kota Niniwe lanipa'jari sino sikali siagang nipa'jari butta kalotoro'.

¹⁴Anjorengi sikontu rupanna olo'-oloka lattinro siagang ammari-mari. La'ru'mungi kokocika ri anjo bangunang panraka siagang lakkio'-kioki battu ri jandela-jandelaya. Jangang-jangang kalaaka lakkao'-kaoki ri dallekang ballaka. Sikamma kayu camaraya ri bangunang-bangunanna anjo kotaya lala'busuki nialle.

¹⁵Iaminjo lakajarianga mae ri anjo kota ma'reja-rejaya siagang nakanaya kalenna amang siagang sannang. Pandudu'na nakapangi angkanaya anjo kotana ke'nanga kaminang lompo ri linoa. Teai sipato' sinona anjo daeraya, tena sikali bonena pantaranganna olo'-olo' ri romang a'ru'munga anjoreng! Sikamma tau niaka allalo anjoreng ri kotaya la'jari ta'bangka kabusuki siagang la'jari mallaki nakasia'.