Read Makassar Version – KITTA' MATANGKASA HAGAI 1 Bible Online

HAGAI 1 - Makassar Version – KITTA' MATANGKASA bible

HAGAI 1

¹ Ri taung makarua pamarentahanna Karaeng Darius ri Persia, ri tanggala' se're bulang makaannang, a'bicarai Batara tete ri Na'bi Hagai. Anjo pasanNa Batara nipatujui mae ri Zerubabel ana'na Sealtiel, guburnur Yehuda, siagang mae ri Imang Lompoa Yosua ana'na Yozadak.

²Nakana Batara Kaminang Koasaya mae ri Hagai, “Anne bansaya nakana teaipi wattunna untu' ambangungi ammotere' BallakKu.”

³Nampa tete ri Na'bi Hagai Nakanamo Batara mae ri umma'Na,

⁴“He ummakKu, maka narapi'mi wattunnu untu' ammantang lalang ri balla' bajika siagang kassaka, nampa BallakKu tuli sangkammana tambungang loro?

⁵Coba sai, parhatikangi pattallassannu!

⁶Appakioro' mako jai bine, mingka sike'de'ji alle polenu. Nia' kanrenu, mingka tanggannakkai untu' ambassori battannu. Nia' anggoro'nu, mingka tanggannakkai untu' ampassukkuki pakkasia'nu. Nia' care-carenu, mingka tanggannakkai untu' angkammuki kalennu. Siagang gaji nagappaya kuli'-kulika tanggannakkai untu' ansambungi tallasa'na ke'nanga.

⁷Tena nusadara' ri kalennu angkanaya angngapai nakajariang anjo kammaya?

⁸Kamma-kamma anne, nai' mako ri bulu'-buluka untu' angngalle kayu, nampa bangummi BallakKu; na lasannammi nusa'ring siagang lanisombaMa' ammotere' sangkamma siratannaya. Coba sai, parhatikangi pattallassannu!

⁹Manrannuangko wassele' jai, mingka kale'bakkanna sike'de' duduji nugappa; nuerangi ammotere', mingka Kutuiki anjo erang polenu, sa'genna cappu' niri'bakang ri anging. Angngapa naKugaukang anjo kammaya? Saba'na iamintu: Lanri anjo BallakKu ammantanginji kamma tambungang loro, nampa a'gassingang ngasengko massing ambangungi balla' kalennu.

¹⁰Iaminjo saba'na natena naturung bosia sa'genna tena lamung-lamung akkulle attimbo.

¹¹Kupabattui kakalotoranga mae ri buttaya siagang bulu'-buluka, mae ri koko-koko gandunga, koko-koko anggoroka siagang koko-koko zaitunga, kammayatompa mae ri sikontu lamung-lamung niaka ri anne buttaya, ba'lalo mae ri rupataua siagang olo'-oloka, kammayatompa mae ri sikontu apa nuusahakanga.”

¹²Nampa Zerubabel siagang Yosua kammayatompa sikontu umma' Israel niakamo ammotere' battu ri pammelakkanga ri Babel, naturukimi kana-kananna Hagai, iamintu suroNa Batara. Nagaukammi ke'nanga apa Naparentakanga Batara mae ri ke'nanga, lanri malla'na ri Batara.

¹³Nampa napabattu Hagai mae ri ra'yaka pasanNa Batara angkanaya a'janji Batara ero' anjagai ke'nanga.

¹⁴Kammami anjo bateNa Batara ampagioki atinna Guburnur Zerubabel, Imang Lompoa Yosua siagang sikontu tau niakamo ammotere' battu ri pammelakkanga, sollanna anjama ngaseng ke'nanga ambangungi Balla'Na Batara Kaminang Koasaya, Allata'alana ke'nanga.

¹⁵Appakkaramulami ke'nanga anjama ri tanggala' ruampulo angngappa' bulang annang, ri taung makarua ri wattu pamarentahanna Karaeng Darius.