Read Makassar Version – KITTA' MATANGKASA ZAKHARIA 11 Bible Online

ZAKHARIA 11 - Makassar Version – KITTA' MATANGKASA bible

ZAKHARIA 11

¹He Libanon, sungke ngasengi sikontu pakke'bu'nu, sollanna nakanre pepe' poko'-poko' arasa'nu!

²He poko' daru, appiraungko, lanri rumbammi poko'-poko' camaraya, anra'bami sikamma poko' porea ngaseng. He poko'-poko' lompoa ri Basan, angngarrukko. Nasaba' le'ba'mi nibattasa' romang-romang lompoa sa'genna lappara'.

³Pilangngeri piraunna sikamma tukoasaya, lanynya'mi kalompoanna ke'nanga! Pilangngeri sa'ra ammammu'na singa-singaya ri romang; nasaba' panra'mi pammantanganna ke'nanga ri sikontu birinna Binanga Yordan.

⁴Nakana Karaeng Allata'ala mae ri nakke, “A'gau' sanrapangko pakalawaki angkalawakiai gimbala' lanipolonga.

⁵Sikamma tummallina lanabunoi anjo sikamma gimbalaka natanggappaya hukkungang. Nakana ke'nanga anjo tau ambalukangai dagenna anjo sikamma gimbalaka, ‘Nipujimi Batara! Kamma-kamma anne pila' akkalumanynyangki'!’ Anjo sikamma pakalawakia tena pangngamaseanna mae ri sikamma gimbala' piarana ke'nanga.

⁶TaerokaMa' mangngamaseang pole manna pole mae ri nai anrinni ri pa'rasanganga. KalengKu lampassareangi sikontu pandudu'na mae ri sikamma tukoasaya. Anjo ke'nanga langngancuruki anne pa'rasanganga, nampa tena nalaKurampasa' ammotere' battu ri kakoasanna ke'nanga.”

⁷Nampa inakke, Zakharia, nigajima' ri sikamma padanggang gimbalaka untu' angkalawaki sikamma gimbala' lanipolonga. Inakke nia' rua takkangku; se'reanga kuarengi “Kalammorang” nampa se'reanga pole kuarengi “Sikkokang”. Nampa appakaramulama' anjagai siagang amparakai anjo sikamma gimbalaka.

⁸Nia' tallu pakalawaki angkabirisia' nanapaccappu' kasa'barangku. Kubongkai ke'nanga lalang wattu sibulang.

⁹Nampa kukana ri pa'rappunganna anjo sikamma gimbalaka, “Taerokama' angkalawaki ngasengko. Ia tenaya tamatena lappassammi mange mate, siagang ia tenaya tapanra'na lappassammi mange panra'. Nampa la'binnaya akkullei assibuno-buno para ia.”

¹⁰Nampa kualle anjo takkang kuarenga “Kalammorang” nakutepo' untu' a'jari pammatei angkanaya tanipa'jariai parjanjiang le'baka Napare' Batara siagang sikontu bansaya.

¹¹Anjo memang alloa natanipa'jariamo anjo parjanjianga. Najannangngima' anjo sikamma padanggang gimbalaka, siagang napahammi ke'nanga angkanaya KalenNa Batara a'bicara tete ri sikontu apa kugaukanga.

¹² Kukanamo mae ri ke'nanga, “Punna situju ngasengki', kisareanga' gajiku; punna tena, tea' maki'.” Nampa nasarema' ke'nanga tallumpulo doe' pera' untu' gajiku. Nakana Batara ri nakke, “Pantamaki anjo doeka ri tampa' pammoneang doeka ri BallakKu.” Jari kupantama'mi anjo tallumpuloa doe' pera' ri tampa' pammoneang doeka ri Balla'Na Batara. Sikamma jinjo bawang pangnganggara'na ke'nanga mae ri nakke!

¹⁴Le'baki anjo kutepo'mi takkangku makaruaya, iamintu takkang kuarenga “Sikkokang”, sa'genna reppe'mi kase'reanna Yehuda siagang Israel.

¹⁵Nampa Nakana Batara ri nakke, “Sikalipi pole a'gau' rapangko pakalawaki, mingka kamma-kamma anne salaku pakalawaki kodia.

¹⁶Nasaba' nia' sitau pakalawaki laKusuro untu' anjagai sikamma gimbalakKu, mingka tena najampangi gimbala' tappelaka; tena naboyai gimbala' sala oloanga, tena todong naballei gimbala' bokkaka, kammayatompa tena nasarei kanre gimbala' attallasaka ija. Ba'lalo ia kalenna angkanrei dagenna gimbala' kaminang co'moka siagang nabi'buki sikamma kanukunna anjo olo'-oloka.

¹⁷Nitunraimi anjo pakalawaki tenaya matu-matunna! Nabokoimi pa'rappunganna gimbala'na. Lanipa'le'baki kakoasanna ri pa'bundukanga. La'jari lammai paling-palinna siagang la'jari butai mata kananna.”