Read Makassar Version – KITTA' MATANGKASA ZAKHARIA 12 Bible Online

ZAKHARIA 12 - Makassar Version – KITTA' MATANGKASA bible

ZAKHARIA 12

¹Iaminne pasanNa Batara ri sesena Israel. LaNaka'rangi Batara langika, Napa'jari buttaya kammayatompa Nasarei katallassang rupataua, Nakana,

²“LaKupa'jari Yerusalem sanrapang piala niaka anggoro'na; sikamma pa'rasangang singngampi'na lanainungi anjo anggoroka nampa ta'royong-royong rapang tau nasa'ringa. Na punna nitammulili Yerusalem ri musua, sikamma kota-kota niaka ija ammantang ri pa'rasangang Yehuda lanitammulili tongi ri musu.

³Mingka punna ta'rapi'mo anjo alloa, laKupa'jari Yerusalem sanrapang batu battalaka; manna pole bansa battu kemae ancobai angngangkaki langgappai bala. Sikontu bansaya ri lino lanapa'jari se'rei kalenna untu' ambunduki Yerusalem.

⁴Anjo alloa laKupa'jari lingu ngasengi jaranga siagang pabaena Kupa'jari pongoroki; laKujagai pandudu'na Yehuda, mingka Kupa'jari butai sikontu jaranna musunna.

⁵Nampa lanakanamo sikamma kaluarga Yehuda lalang pa'mai'na, ‘Batara Kaminang Koasaya assarei kagassingang umma'Na ammantanga ri Yerusalem.’

⁶Anjo alloa sikamma kaluarga Yehuda laKupa'jari rapang pepe' lalang ri pa'gompoang kayu tunua yareka sulo a'rinraya irawanganna gandung-gandung nikawarranga; lanaancuruki ke'nanga sikamma bansa-bansa niaka ri tammulilina. Mingka pandudu'na Yerusalem tuli ammantangi lalang ri kotaya siagang amang.

⁷INakke, Batara, lauru-uru assarei pammetang tantara Yehuda, sollanna tena nalompoangngang kala'birang natarimaya jari-jarina Daud siagang pandudu' Yerusalem, nakala'birang natarimaya pandudu'na Yehuda maraenga.

⁸Anjo alloa iNakke lalla'langngi pandudu'na Yerusalem; siagang manna kaminang lammaya ri alla'na ke'nanga la'jari kammai gassinna Daud. Laniului ke'nanga ri jari-jarina Daud sanrapang niulu ri malaekakKu, ba'lalo sanrapang KalengKu angngului.

⁹Anjo alloa laKuancuruki sikamma bansa eroka ampaccoba-cobai ambunduki Yerusalem.

¹⁰ Nampa jari-jarina Daud siagang pandudu'na Yerusalem laKupa'jari tunangai mangngamaseang pa'mai'na siagang nangai appala' doanga. Lanaciniki ke'nanga anjo tau le'baka nacoka ke'nanga, nampa nakarruki rapang tau angkarruki ana' sitau-tauna matea. Langngarruki ke'nanga pacce pa'mai'na, rapang tau ammoteranga ana' bungasa'na.

¹¹Ri anjo alloa nia' karru' lompo ri Yerusalem, rapang karru' mae ri Hadad-Rimon ri Ka'bung Lappara'na Megido.

¹²Nampa tunggala' kaluarga ri anjo pa'rasanganga massing langngarruki; kaluarga jari-jarina Daud, kaluarga jari-jarina Natan, kaluarga jari-jarina Lewi, kaluarga jari-jarina Simei, siagang sikontu kaluarga maraenga. Tunggala' kaluargaya massing-massing angngarruki, siagang sikamma tu bura'nea battu ri tunggala' kaluargaya langngarruki tassa'la' battu ri sikamma tubai'-bainea.”