Read Makassar Version – KITTA' MATANGKASA ZAKHARIA 6 Bible Online

ZAKHARIA 6 - Makassar Version – KITTA' MATANGKASA bible

ZAKHARIA 6

¹Nia' pole paccini' maraeng kugappa. Kamma-kamma anne nia' kucini' appa' kareta pa'bundukang assulu' battu ri alla'na ruaya moncong tambaga.

² Anjo sikammaya kareta massing nibesoki ri ayoka jarang; makase'rea jarang eja, makaruaya jarang le'leng,

³ makatallua jarang kebo' siagang makaappaka jarang balo.

⁴Akkuta'nanga' mae ri anjo malaekaka angkana, “Apa battuanna anne sikammaya kareta pa'bundukanga Karaeng?”

⁵ Appialimi angkana, “A'lampai ke'nanga mae ri appaka oloang ri wattu le'ba'na ke'nanga andallekang mae ri Batarana sikontu linoa.

⁶Kareta pa'bundukang nibesoka ri jarang le'lenga a'lampa mangei Babel ri bageang wara'. Jarang keboka a'lampa kalauki siagang jarang baloa a'lampa mangei ri pa'rasangang niaka ri bageang timboro'.”

⁷Ri wattunna assulu' anjo jarang baloa, tenamo nasa'bara' ke'nanga napakamma ero' a'lampa untu' amparessai linoa. Nakana anjo malaekaka, “A'lampamako untu' amparessai linoa!” Nampa a'lampamo ke'nanga.

⁸Nampa akkio' anjo malaekaka mae ri nakke angkana, “Anjo jarang a'lampaya mange ri Babel napanaummi larroNa Batara.”

⁹Napassareangi Batara anne pasanga mae ri nakke.

¹⁰Nakana, “Allei passare napassareanga Heldai, Tobia siagang Yedaya, iamintu sikamma tau beru ammotereka battu ri tampa' pammelakkanga ri Babel. Erangi linta' anjo passarena ke'nanga mange ri balla'na Yosia ana'na Zefanya.

¹¹Anjo bulaeng siagang pera' napassareanga ke'nanga, pareki se're songko' kalompoang siagang patabai mae ri ulunna Imang Malompo Yosua ana'na Yozadak.

¹² Pauangi angkanaya iNakke Batara Kaminang Koasaya angkana, ‘Tau niarenga I Cu'la', la'jari apa napattujuanga ri tampa' napammantangia siagang ia lambangungi ammotere' Balla'Na Batara.

¹³Ia lambangungi BallakKu siagang lannarimai kala'birang sangkamma se'rea karaeng, siagang ia lammarenta mae ri ra'ya'na. Nia' sitau imang lanrurungangi siagang lasamaturuki ke'nanga siagang siamaki ke'nanga lalang ri jama-jamanna.’

¹⁴Anjo songko' kalompoanga niboliki ri BallakKu untu' ampakaingaki Heldai, Tobia, Yedaya, siagang Yosia.

¹⁵Labattui tau battua ri tampa' bellaya siagang nabantui ke'nanga ambangungi BallakKu. Punna le'ba' anjo pambangunanga, lanaassemmi ke'nanga angkana iNakke Batara Kaminang Koasaya le'ba' assuroko battu mae ri ke'nanga. Sikontu anjo kammaya lakajariang ngasengi punna naturuki tojeng-tojeng ke'nanga sikamma parentaKu, Karaeng Allata'alana ke'nanga.”