Read Makassar Version – KITTA' MATANGKASA ZAKHARIA 8 Bible Online

ZAKHARIA 8 - Makassar Version – KITTA' MATANGKASA bible

ZAKHARIA 8

¹Napassareangi Batara Kaminang Koasaya anne pasanga mae ri nakke angkana,

²“Ero' duduA' antulungi Yerusalem lanri sanna' Kukamaseanna pandudu'na, siagang lanri ia anjo pangngamaseangKu, nabambang nyawaKu mae ri musu-musunna anjo kotaya.

³LammoterekKa' mange ri Yerusalem, anjo kota matangkasakKu, nampa ammantang anjoreng. Laniassengi Yerusalem salaku kota tamamminraya, siagang bontoNa Batara Kaminang Koasaya lanigallaraki Bonto Matangkasa'.

⁴Ri paranglakkeng lompona Yerusalem, laniaki pole ammempo sikamma tutoa bura'ne sannakamo toana siagang tutoa baine sannakamo toana sa'genna musti ammake takkang punna a'jappa.

⁵Sikamma agang niaka lalang ri kotaya larassi pole siagang ana'-ana' akkarenaya.

⁶Anjo passalaka nakulle tena nantama' ri akkala'na ri sikamma tau attallasaka ija battu ri anne bansaya, mingka untu' iNakke teai apa tantama' ri akkala'.

⁷LaKupasalamaki ummakKu battu ri sikamma pa'rasangang le'baka napammantangngi ke'nanga nialle,

⁸nampa Kuerang ammotere' ke'nanga battu iraya siagang battu lau', sa'genna ammantang pole ke'nanga ri Yerusalem. La'jari ke'nanga ummakKu siagang iNakke a'jari Allata'alana ke'nanga. INakke lammarenta mae ri ke'nanga lalang kajarrekang siagang kaadelang.”

⁹Nakana Batara mae ri umma'Na, “Pakajarreki pa'mai'nu! Kamma-kamma anne nulangngereki kana-kana ia le'baka todong napau sikamma na'bia ri wattu nipadongko'na batu pundasia, untu' ambangungi BallakKu ammotere'.

¹⁰Rioloangannaya anjo jammanga tena akkulle ansewai kitta' magassinna rupataua yareka olo'-oloka, siagang tena tau amang pakkasia'na battu ri gangguanna musua. Le'ba'mi Kupasisala-sala se'reang tau siagang maraengannaya.

¹¹Mingka kamma-kamma anne sikamma tau niaka attallasa' ija battu ri anne bansaya sisalami gaukKu mae ri ke'nanga siagang rioloa.

¹²Lappakioroki bine ke'nanga siagang amang. La'rappoi poko'-poko' anggoro'na ke'nanga, lanisarei wassele' ke'nanga battu ri buttaya, siagang laturungi alla'bi-la'bi bosia. Sikontu anjo barakkaka Kupassareangi mae ri sikamma tau attallasaka ija battu ri anne bansaya.

¹³He pandudu' Yehuda siagang Israel! Ri jammang allaloa, punna situnra-tunrai bansa maraenga, nakana ke'nanga, ‘Poro battu lalo bala sangkammaya antujui Yehuda siagang Israel antuju tongko!’ Mingka laKupasalama' ngasengko, sa'genna anjo bansa-bansa maraenga lanakana massing ri para ia ke'nanga, ‘Poro anjo barakka' turunga ri Yehuda siagang Israel, turung tongi mae ri kalennu!’ Lanri kammana pakajarreki pa'mai'nu siagang teako mallakki!”

¹⁴Nakana Batara Kaminang Koasaya, “Ri wattungKu napakalarro boe-boenu, Kupattantumi untu' anghukkung sannaki ke'nanga. Tena naKupinrai anjo kaputusangKu, passangalinna Kurupai tojengi.

¹⁵Mingka kamma-kamma anne erokKa' ambarakkaki pandudu'na Yerusalem siagang pandudu'na Yehuda, Jari, teako mallakki.

¹⁶ Iaminne parenta-parenta mustia nugaukang: Punna a'bicarako mae ri parannu tau, a'bicarako sitojennaya. Angngalleko kaputusang adele' ri pangadelanga siagang angngeranga passiamakkang.

¹⁷Teako appareki rancana ja'dala' mae ri parannu tau. Teako appasuluki sumpa a'balle-balle. INakke birisikka' mae ri balle-ballea siagang mae ri tenaya naadele' kammayatompa ri katerassanga.”

¹⁸Napassareangi Batara Kaminang Koasaya anne pasanga mae ri nakke untu' umma'Na, angkana,

¹⁹“Puasa nigaukang lalang bulang makaappa', makalima, makatuju, siagang makasampulo la'jari passua'-suarrang appakarannua siagang appakasannanga mae ri pandudu'na Yehuda. Mangngaiko ri katojengang siagang passiamakkang!”

²⁰Nakana Batara Kaminang Koasaya, “Labattui sallang wattunna nabattu pandudu' battua ri jaia kota mange ri Yerusalem.

²¹Pandudu' se'reanga kota lanakana mae ri pandudu' kota maraenga, ‘Umba ki'lampa mange anynyomba ri Batara Kaminang Koasaya siagang ampalaki barakka'Na. Amminawang mako ri kambe.’

²²Nampa jaimo tau siagang jaimi bansa makassa' labattu mange ri Yerusalem untu' anynyomba mae ri Nakke Batara Kaminang Koasaya siagang ampalaki barakkakKu.

²³Ri anjo allo-allo kammaya, sampulo tau bansa maraeng labattu mange ri se're tu Yahudi na nakana, ‘Ero' tongi ikambe upa' sangkamma ikau ngaseng; nasaba' nalangngereki ikambe angkanaya Nabarakkaki ngasengko Allata'ala.’ ” Kammaminjo kana le'baka Napau Batara Kaminang Koasaya.