Read Makassar Version – KITTA' MATANGKASA MATIUS 11 Bible Online

MATIUS 11 - Makassar Version – KITTA' MATANGKASA bible

MATIUS 11

¹Le'baki Naajara' Isa anjo sampuloa anrua ana' gurunNa, a'lampami ambokoi anjo tampaka. A'lampami mange angngajara' siagang ampa'la'bangi pappasanNa Allata'ala ri kota-kota ambania anjoreng.

²Nalangngere'mi Yohanes, niaka lalang ri tarungkua, sikamma apa le'baka Nagaukang Isa Almasi. Nasuromi siapa are ana'-ana' gurunna mange akkuta'nang ri Isa angkana,

³“Maka iKatte mintu le'baka Napa'janjiang Allata'ala? Yareka musti lanitayanginji maraenganga?”

⁴Appialimi Isa Nakana, “Ammotere' mako mae ri Yohanes nanupauang apa le'baka nucini' siagang nulangngere', iamintu:

⁵ accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, kammayatompa nibirittakammi Kabara' Baji' battua ri Allata'ala mae ri tu kasi-asia.

⁶Mate'nemi tau tenaya nasorongbokoA'!”

⁷A'lampanamo ana'-ana' gurunna Yohanes, Nabicarami Isa mae ri anjo tau jaia passala'na Yohanes. Nakana, “Apa mange nucini' ri parang lompoa? Ruku' silawaraka nairi' anging?

⁸Apa ero' mange nucini' anjoreng? Tau ammake pakeang ga'ga? Niaki ri balla' lompona karaenga tau ammakeang ga'gaya!

⁹Jari angngapa nu'lampa mange ri parang lompoa? Erokko mange accini' na'bi? Annabai, ba'lalo la'biangampa na na'bia.

¹⁰ Nasaba' iaminjo Yohanes niaka nisero kana lalang ri Kittaka angkanaya, ‘Nakana Allata'ala, iaminne tunisuroKu, Kusuroa a'lampa rioloanganNu sollanNu nasungkeang oloang.’

¹¹U'rangi laloi anne! Tenanniakka tau le'ba' nia' ri lino lompoanganga na Yohanes Paje'ne'. Mingka manna nakamma mamo, inai-nai kaminang tuna ri umma'Na Allata'ala, lalompoangangi na Yohanes.

¹² Battu ri pakkaramula nabirittakanna Yohanes anne kabaraka sa'genna kamma-kamma anne, tuli nisusaina umma'Na Allata'ala battu ri tau eroka angkoasai passai ke'nanga.

¹³Ri tenanapa nabattu Yohanes le'ba'mi napassareang ngaseng Musa sikontu pangngatorang agamaya. Kammayatompa sikontu apa lakajarianga le'ba'mi napau la'bi riolo na'bi-na'bia.

¹⁴ Na ka'de' ero'jako tappa', iaminjo Yohanes le'baka nisero kana kabattuanna. Mingka nukanai Elia anjo Yohanes.

¹⁵Jari punna nia' tolinnu, pilangngerimi!

¹⁶Apa laKupasanrapangangi anne taua ri jammanga? Sanrapangi ana'-ana' pakarenaya ri passua'-suarranga.

¹⁷Nia' angkana, ‘Kelong a'rannu-rannu nikelongang, mingka taerokako akkarena! Kelong tu kamateang nikelongang, mingka taerokako angngarru'!’

¹⁸Battui Yohanes — nappuasa siagang tangnginunga anggoro'; nanupakkanaimo, ‘Tu setangngang!’

¹⁹Battuiseng Ana' Ma'rupataua — Nangnganre siagang angnginung; nanipakkanaimo ri taua, ‘Cinissai anjo taua, balalana siagang painunna! Manna pasingara' simaya siagang tau kodi sipaka Naagang ngaseng sipa'rappungang.’ Mingka manna nakamma mamo, lanipa'butti tonjia ero'Na Allata'ala lanri a'nyatana wassele'na.”

²⁰Le'baki anjo appakkaramulami Nacalla Isa sikamma tau niaka ammantang anjoreng ri kotaya, lanri tenana naero' toba' ke'nanga. Na punna nipikkiri', anjoreng minjo ri kota-kotaya jai gau' appakalannasa' le'ba' Nagaukang Isa ri ke'nanga.

²¹ “Cilaka mako ikau ngaseng tau niaka ammantang lalang ri Korazim! Kammayatompa ikau ngaseng tau niaka ammantang lalang ri Betsaida, cilaka ngaseng tommako! Ebara' angkana le'ba' tommi nigaukang anjo gau'-gau' appakalannasaka ri tangnga-tangnganu ri Tirus siagang Sidon, ma'nassa sallomi le'ba'na toba' siagang nasassala' kalenna tau niaka anjoreng.

²²U'rangi laloi angkanaya, punna narapi' Allo Kiamaka sallang, akkulleangangi Napammopporang Allata'ala dosa-dosana tau niaka anjoreng ri Tirus siagang Sidon nakala ikau ngaseng!

²³ Kammayatompa ikau tau niaka ri Kapernaum! Gassingka nukana lanipakatinggiko nai' ri suruga? Tena! Passangalinna lanipelakko antama' ri naraka! Nasaba' ka'de' anjorengi ri kota Sodom le'ba' nigaukang anjo gau'-gau' appakalannasaka, mattantu nia' iji kota Sodom sa'genna kamma-kamma anne!

²⁴ U'rangi laloi angkanaya, punna narapi' Allo Kiamaka sallang, akkulleangangi Napammopporang Allata'ala dosa-dosana tau niaka anjoreng ri kota Sodom nakala ikau ngaseng!”

²⁵Anjo wattua appala' doammi Isa Nakana, “O ManggeKu, Batara Makoasaya ri langika siagang ri linoa! Appala' sukkurukKa' ri Katte, lanri Kirahasiakanna ngaseng anne mae ri tau cara'deka siagang tau niaka pangngassenganna; mingka Kipappiassengangi mae ri tu tenaya sikolana.

²⁶Iaminjo ampakasannangi atinTa.”

²⁷ Nampa Nakana Isa, “Yangaseng-ngasenna le'ba'mi Kipassareang mae ri Nakke. Tenanniakka manna sitau angngassengi AnatTa, pantaranganna iKatte. Tenanniakka todong angngassengKi', pantaranganna AnatTa, siagang sikamma tau le'baka Kupauang.

²⁸Battu ngaseng mako mae ri Nakke ikau tau posoa siagang tau battalaka erangnganna; laKupakabajiki pakkasia'nu.

²⁹ Amminawang mako ri parentaKu, siagang appilajara' mako ri Nakke. Nasaba' inakke baji' pa'maikKa' siagang sa'barakKa'. Jari lasannammi nusa'ring.

³⁰Nasaba' lanukarannuangi apa Kupassuroanga, siagang laringangi nusa'ring apa Kupappieranganga ri kau.”