Read Makassar Version – KITTA' MATANGKASA MATIUS 12 Bible Online

MATIUS 12 - Makassar Version – KITTA' MATANGKASA bible

MATIUS 12

¹ Nia' se're allo iamintu ri allo Pammari-marianga nanumalo Isa ri se'reang koko ase. Massing angngattili'mi ase ana' gurunNa Isa nampa nakanre lanri cipuru'na ngaseng.

²Ri wattunna nicini' ke'nanga ri tu Farisia angkattiliki anjo asea, akkuta'nammi anjo tu Farisia mae ri Isa angkana, “Cini' sai anjo ana'-ana' gurunNu! Nadakkaimi atorang agamata nasaba' nagaukangi apa nipappisangkanga nigaukang ri allo Pammari-marianga.”

³ Appialimi Isa Nakana, “Tena le'bakapi nubaca lalang ri Kittaka, apa nagaukanga Karaeng Daud siagang taunna ri wattunna cipuru'?

⁴ Antamaki ri Balla'Na Allata'ala, nanakanre roti le'baka nipassareang ri dallekanNa Allata'ala. Padahala', manuru' ri pangatorang agamata takkulleai ke'nanga angkanrei anjo rotia — nasaba' imang-imangaji bawang akkulle angkanrei.

⁵ Yareka tale'bakapi nubaca lalang ri Kitta' Pangngatorang napabattua Musa; angkanaya imang-imang anjamaya ri allo Pammari-marianga lalang ri Balla'Na Batara nadakkai pangatorang allo Pammari-marianga, mingka tena tonja nipasalai?

⁶Pilangngeri bajiki anne kanangKu: niaki anrinni tau lompoanganga na Balla'Na Batara.

⁷ Nia' tattulisi' lalang ri Kittaka angkanaya: Ia Kukaerokia iamintu pangngamaseang, teai koro'bang olo'-olo'. Ebara' nupahang baji'-baji' anjo bicaraya mattantu tena nupasalai tau tenaya salana.

⁸Nasaba' makoasai Ana' Ma'rupataua irateanganna allo Pammari-marianga.”

⁹Nabokoimi Isa anjo tampaka nampa mange ri balla' sambayanga.

¹⁰Anjoreng ri balla' sambayanga nia' se're tau mate siali limanna. Nia'mo siapa are tau ero' ampa'boyangi sala Isa. Jari akkuta'nammi ke'nanga ri Isa angkana, “Maka akkulleji niballei taua ri allo Pammari-marianga?”

¹¹ Appialimi Isa nakana, “Ebara' angkana nia' ri kau ammallaki sikayu gimbala', nampa tu'guru' anjo gimbala'na naung ri kali'bong lantanga ri allo Pammari-marianga, maka taerokako ampanaiki anjo gimbalaka battu ri kali'bonga lanri kaallo Pammari-mariangi?

¹²Anjo rupataua lompoangangi anggaranna na gimbalaka! Lanri kammanami anjo, nakkulleja taua annulung ri allo Pammari-marianga.”

¹³Le'baki anjo Nakanamo Isa ri anjo tau mate sialia limanna, “Pajonjoi limannu.” Napajonjomi limanna anjo taua; apaji na'jari baji'mo limanna anjo taua sangkamma limanna sialia.

¹⁴Mingka a'lampami anjo tu Farisia, nampa sikongkolo' a'boya akkala' ero' ambunoi Isa.

¹⁵Naassengi Isa angkanaya niakkali ero' nibuno ri anjo tu Farisia. Jari a'lampami ambokoi anjo tampaka. Jaimi tau ampinawangi. Naballei ngasemmi sa'genna a'jari baji' sikontu tau garringa.

¹⁶Mingka Napisangkaimi ke'nanga ancaritai anjo apa Nagaukanga Isa mae ri tau maraenga.

¹⁷Lanri kammana, a'rupami apa le'baka Nasuro pabattu Allata'ala ri Na'bi Yesaya angkanaya,

¹⁸ “Iaminne TunisuroKu le'ba' Kupilea, TunikamaseangKu siagang TuKupassiratanga ri atingKu. LaKupassareangi RohKu mae ri Ia, LaNakabarrangi kaadelangKu mae ri bansa-bansaya.

¹⁹Tala'geakai siagang talakkio'-kiokai, yareka talappidatoai ri agang-agang lompoa.

²⁰TalaNata'bangai bulo ta'dundua TalaNabunoai kanjoli ca'dia rinrana. Lappattujuangi sa'genna a'rupa kaadelanga;

²¹nalama'minasa sikontu bansa-bansaya ri Ia.”

²²Le'baki anjo, nia'mo se're tau buta siagang pepe nisosoka ri setang nierang mae ri Isa. Naballeimi Isa anjo taua sa'genna akkullemo accini' siagang a'bicara.

²³Lannasa' ngasemmi siagang angkanami taua, “Maka iaminne Ana'na Daud, le'baka nipa'janjiang?”

²⁴ Nalangngere'na tu Farisia anjo pakkuta'nanga, appialimi ke'nanga angkana, “Nakkulle Nabongka setanga anne taua, lanri le'ba'naji nisare koasa ri pinggawana setanga.”

²⁵Mingka Naassengi Isa nawa-nawana anjo tu Farisia. Jari angkanami Isa ri ke'nanga, “Punna nia' se're bansa ta'bage-bage nampa simusu-musu para ia, ma'nassa tena nalajarre' ammenteng anjo bansaya. Kammayatompa punna nia' tau lalang kota, yareka nia' tau lalang se're balla' ta'bage-bage nampa simusu-musu para ia, mattantu laancuruki.

²⁶Kamma tomminjo lalang ri pamarentahanna Billisika, punna nia' silokoang ambongkai lokoang maraenga, ma'nassa ta'bage-bagemi siagang lanra'bami pamarentahanna anjo Billisika.

²⁷Angkana ngasengko nakkulle Kubongka setanga lanri nasareKu koasa pinggawana setanga. Jari punna kamma, lanri inai pata koasa nanabongka setanga ana'-ana' gurunnu? Kalenna ana'-ana' gurunnu ampa'butti angkanaya sala ngasengko!

²⁸Mingka iNakke nakkulle Kubongka setanga lanri koasa battu ri RohNa Allata'ala. Na iaminjo a'jari pammatei, angkanaya appakkaramulami ammarenta Allata'ala ri tangnga-tangnganu ngaseng.

²⁹Antekamma lakkulle antama' taua ri se'reang balla', angngalle passai barang-baranna punna tau gassing patanna balla'? Mattantu nasikkoki rolong anjo tau gassinga, patannaya balla'. Punna le'ba'mo nasikkokang anjo patannaya balla', nampami akkulle naalle passa barang-baranna.

³⁰ Inai-nai taeroka a'jari agangKu, sikontutojenna a'jari musui ri Nakke. Siagang tau taeroka ambantuA' ri jama-jamangKu, sikontutojenna iami lampanraki jama-jamangKu!

³¹Jari parallui nuasseng angkanaya, punna a'gau' salai siagang a'bicara hinai taua, akkulleji nipammopporang! Mingka punna nahinai RohNa Allata'ala, takkulleami nipammopporang!

³² Punna nia' tau ambali-bali Ana' Ma'rupataua, akkulleji nipammopporang; mingka punna nahinai Rohna Allata'ala, takkulleami nipammopporang ri kamma-kammaya anne kammayatompa ri ahera' sallang!”

³³ “Sollanna akkulle baji' rapponna, parallui coppong se'rea poko'-poko'. Punna tacopponga se'rea poko'-poko', tena todong nalabaji' rapponna. Battu ri rapponnai nicini' antekamma copponna yareka tenana nacoppong se'rea poko'-poko'.

³⁴ Ikau tau ja'dala' ngasengko! Antekammako lakkulle ampaui kabajikanga punna tau ja'dalakko? Apa nupau iamintu bonena lalang atinnu, assulu' battu ri bawanu!

³⁵Tau bajika, tuli apa baji' todong lanapau, nasaba' bajiki lalang atinna. Mingka tau ja'dalaka tuli apa-apa ja'dala' napau, nasaba' ja'dalaki lalang atinna.

³⁶Jari u'rangi laloi anne: ri Allo Kiamaka sallang, massing lanatanggong jawakki rupataua sikontu bicaranna tenaya matu-matunna.

³⁷Nasaba' battu ri bicarannu tonji sallang nalanitappuki ma'nassanu sala yareka tena.”

³⁸ Le'baki anjo, nia'mo siapa are guru-guru agama siagang tu Farisi angkana ri Isa, “O Pa' Guru, eroki anne ikambe ancinikKi' anggaukangi gau' appakalannasaka.”

³⁹ Appialimi Isa nakana, “Teai sipato' ja'dala'na siagang dorakana taua ri anne jammanga. NusuroA' anggaukangi gau' appakalannasaka? Manna se're tania' lanipicinikiangko gau' appakalannasa' pantaranganna gau' appakalannasa' le'baka kajariang ri kalenna Na'bi Yunus.

⁴⁰ Tallungalloi le'ba' ammantang Na'bi Yunus lalang ri battanna juku' lompoa. Kamma tomminjo sallang Ana' Ma'rupataua, latallungalloi ammantang lalang ri battanna buttaya.

⁴¹ Punna Allo Kiama' sallang lambangungi taua ri Niniwe siagang taua ri anne jammanga antudui ke'nanga. Nasaba' anjo taua ri Niniwe toba'mi ri wattunna akkato'ba Na'bi Yunus ri ke'nanga. Mingka kamma-kamma anne nia' anrinni lompoangang na Na'bi Yunus!

⁴² Punna Allo Kiama' sallang, lambangungi karaeng baine battu Timboroka siagang taua ri anne jammanga antuntuki ke'nanga. Nasaba' ri wattu ero'na anjo karaeng bainea allangngereki kacara'dekanna Salomo bella sikalimi najappai, battu ri cappa'na buttaya. Mingka kamma-kamma anne, nia' anrinni lompoanganga na Salomo!”

⁴³“Punna a'lampa roh ja'dalaka ambokoi se'rea tau, la'lampai anjo roh ja'dalaka akkuliling ri tampa'-tampa' kalotoroka, ero' a'boya pammari-mariang. Mingka tena nanggappa tampa'.

⁴⁴Jari nakanamo ri kalenna, ‘Erokka' ammotere' mange ri balla' le'baka kupammantangi.’ Ri wattunna battu mange anjoreng, narapikammi anjo ballaka tena bonena, tangkasa' siagang baji' atoro'na.

⁴⁵Jari a'lampami pole nampa battu angngerang tuju roh ja'dala' maraeng, ja'dallanganga na ia. Nampa antama' ke'nanga ammantang ri kalenna anjo taua. Kale'bakkanna a'jari sannakkangammi kodina anjo taua na ri uru-uruna. Ia tomminjo lakajariang ri katallassanna taua ri anne jammanga.”

⁴⁶Lalang a'bicaraNa Isa siagang anjo tau jaia, battumi amma'Na siagang sari'battanNa. Eroki antama' ke'nanga angngagangi a'bicara Isa.

⁴⁷Nia'mo se're tau angkana ri Isa, “Bapa', niaki ammatTa siagang sari'battanTa pantarang. Eroki ke'nanga angngagangKi' a'bicara.”

⁴⁸Appialimi Isa Nakana, “Inaika ammakKu? Siagang inaika sari'battangKu?”

⁴⁹Najo'jo'mi sikontu tau amminawanga ri Ia nampa Nakana, “Iaminne ammakKu siagang sari'battangKu.

⁵⁰Inai-nai anggaukangi ero'Na ManggeKu ri suruga, iami siratang a'jari sari'battangKu, siagang siratanga a'jari ammakKu.”