Read Makassar Version – KITTA' MATANGKASA MATIUS 13 Bible Online

MATIUS 13 - Makassar Version – KITTA' MATANGKASA bible

MATIUS 13

¹Anjo memang alloa, a'lampami Isa ambokoi anjo ballaka, nampa mange ammempo ri biring tamparanga.

² Jai sikali tau a'rappungang angkulilingi Isa. Lanri kammana a'lette'mi nai' ammempo Isa ri se'reang biseang. Na anjo tau jaia anjorengi ri biring tamparanga ammenteng.

³Nampa Naajara' Isa ke'nanga a'rupa-rupa pangngajarang, lalang se're pangngebarang. Nakana, “Nia' sitau pamarri appakioro' bine.

⁴Lalang napakioro'na anjo binea, nia'mo takkioro' ri aganga. Apaji nabattumo jangang-janganga angkanrei anjo binea sa'genna cappu'.

⁵Nia' tommo bine takkioro' ri butta jaia batu-batunna, na kuranga buttana. Lanri kuranna buttana anjo tampaka, linta'mi attimbo anjo binea.

⁶Mingka ri wattu nai'namo alloa, appakaramulami kalumeng anjo bine beru accu'laka; nampa kalotoro', sa'genna mate, nasaba' tenana nalantang antama' ri buttaya aka'na.

⁷Kammayatompa, nia' todong bine takkioro' ri alla'na ruku'-ruku' akkatintinga; naipi'mi anjo bine beru accu'laka sa'genna mate.

⁸Mingka nia' todong bine takkioro' ri butta copponga. Baji'mi attimbona anjo binea, coppongi poko'na, najai rapponna; nia' a'lappi sibilangngang, nia' a'lappi annampulo, siagang nia' todong a'lappi tallumpulo jaina rapponna.”

⁹Le'ba'na Nacarita Isa anjo pangngebaranga, Nakanamo Isa ri ke'nanga, “Inai-nai nia' tolinna, pilangngerimi baji'-baji'!”

¹⁰Le'baki anjo battumi ana'-ana' gurunNa Isa akkuta'nang ri Ia angkana, “Angngapa Kimmake pangngebarang punna angngajarakKi' mange ri anne tau jaia?”

¹¹Appialimi Isa Nakana, “Nasaba' ikau nisare ngaseng mako pangngassengang sollanna nupahang rahasiana ri passala' antekamma batena ammarenta Allata'ala. Mingka anjo ke'nanga tanisareai.

¹² Nasaba' tau niakamo apa-apanna lanitambaiangi pole sijaiang, sa'genna kala'biang. Mingka tau tenaya apa-apanna, yareka naniaka sike'de' apa-apanna, lanialleangi ba'lalo ammotere'.

¹³Iaminjo saba'na naKummake pangngebarang punna Kuajara' anjo tau jaia. Nasaba' accini'ji ke'nanga, mingka sanrapangi tau tenaya naccini'. Allangngere'ji ke'nanga, mingka sanrapangi tau tenaya nallangngere' siagang tau tenaya nammahang.

¹⁴ Lanri kammana, a'rupami apa le'baka nasero kana Na'bi Yesaya angkanaya, ‘Nakana Allata'ala: Latuli allangngerekko mingka tanupahangai; Latuli nuparhatikangi mingka tanuassengai apa kajarianga.

¹⁵Nasaba' tattongko' ngasemmi pikkiranna ke'nanga anne, a'jari tamallangngerai tolinna na tatassungkea matanna. Kajariammi anne, sollanna taccinika matanna tallangngera tolinna, tammahanga pikkiranna, na taeroka ammotere' mae ri Nakke, nampa Kupa'jari baji' ngaseng ke'nanga.’ ”

¹⁶ Nakana pole Isa ri ana'-ana' gurunNa, “Ikau, teai sipato' upa'nu ngaseng. Nasaba' ikau accini' baji' ngaseng mako siagang allangngere' baji' ngaseng mako.

¹⁷U'rangi, angkanaya jai na'bi siagang umma'Na Allata'ala ero' anciniki anne apa nucinika ri kamma-kammaya anne, mingka takkulleai nacini' ke'nanga. Eroki ke'nanga allangngereki anne apa nulangngereka ri kamma-kammaya anne mingka takkulleai nalangngere' ke'nanga.”

¹⁸Le'baki anjo Nakanamo Isa, “Pilangngerimi battuanna anjo pangngebarang pakioroka.

¹⁹Anjo bine takkioroka ri aganga, iaminjo a'jari pangngebarang mae ri tau allangngerekami ri passala' antekamma bateNa Allata'ala ammarenta, mingka tanapahangai anjo kabaraka. Battui kaja'dallanga angngalleangi anjo apa le'baka nipakioro' ri atinna ke'nanga.

²⁰Na anjo bine takkioroka ri butta jaia batu-batunna, iaminjo a'jari pangngebarang mae ri tau allangngerekami anjo kabaraka, na natarima memang silalonna siagang te'ne pa'mai'na.

²¹Mingka tena nasallo attahang anjo kabaraka lanri tenana nabaji' angngaka'na anjo kabaraka lalang ri atinna ke'nanga. Punna natabamo susa yareka passessa ke'nanga lanri anjo kabaraka, ta'giling memammi silalonna atinna ke'nanga.

²²Naia bine takkioroka ri alla'na ruku'-ruku' akkatintinga, iaminjo pangngebarang mae ri tau allangngerekami anjo kabaraka, mingka ranggasela iji atinna ke'nanga, siagang ero' dudui kalumanynyang lalang ri katallassanna. Lanri kammana, rapang kasepekammi lalang ri atinna ke'nanga anjo Kabara' battua ri Allata'ala, sa'genna takkullea a'rappo.

²³Na anjo bine takkioroka ri butta copponga, iaminjo pangngebarang mae ri sikamma tau allangngerekami anjo kabaraka siagang napahang baji'-baji'. Jaimi rapponna ke'nanga, nia' a'lappi sibilangngang, nia' a'lappi annampulo, siagang nia' a'lappi tallumpulo wassele'na.”

²⁴Napaccaritammi pole Isa se're pangngebarang maraeng anjo tau jaia. Nakana, “Punna ammarenta Allata'ala, pangngebaranna lakammaminne: Nia' sitau pamarri appakioro' bine ri tanana.

²⁵Nia'mo se're bangngi, ri wattunna attinro ngasemmo taua, battumi musunna anjo pamarria a'lamung rea ri alla'na anjo asea nampa a'lampa.

²⁶Ri wattunna appakkaramulamo attimbo anjo lamung-lamunga, siagang appakkaramulamo kacinikang rapponna, kacinikang tommi anjo ruku' reaya.

²⁷Jari mangemi tungnganre gajina anjo pamarria ampauangi anjo pamarria angkana, ‘O Karaeng, sai lamungang baji'ji bawang le'ba' kilamung ri tanata? Antekamma nakkulle nia' todong ruku' rea attimbo anjoreng?’

²⁸Appialimi anjo pamarria nakana, ‘Anjo panggaukanna musua.’ Jari akkuta'nammi pole anjo tungnganre gajina pamarria nakana, ‘Jari kikellai kisuro bi'bu' anjo reaya?’

²⁹Appialimi anjo pamarria nakana, ‘Tena, nasaba' punna nibi'buki anjo reaya, akkullei ta'bi'bu' todong anjo asea.

³⁰Lappassammi attimbo todong anjo reaya sa'genna narapi' wattu pakkattoanga. Lakusuroi sallang pakattoa angkana: Passe'rei rolong anjo reaya siagang sikko' ngasengi nampa nitunu pepe'. Le'baki anjo passe'remi anjo asea, nampa nuboli' lalang ri pammantanganna.’ ”

³¹Napaccaritammi pole Isa se're pangngebarang anjo tau jaia. Nakana, “Punna ammarenta Allata'ala, pangngebaranna lakammaminne: Nia' silisere' parekang lamungang ca'di dudu nialle ri se'reang tau, nampa nalamung ri kokonna.

³²Anjo lisere' lamunganga, iami lisere' lamungang kaminang ca'di ri linoa. Mingka punna attimbomo anjo lisere' lamunganga, iami a'jari poko' kaminang lompo ri sikamma lamung-lamungang niaka anjoreng. A'jarimi poko' lompo, sa'genna battumo jangang-janganga appare' ru'mung ri tangke-tangkenna.”

³³Nia' pole se're pangngebarang maraeng Nacarita Isa mae ri anjo tau jaia. Nakana, “Punna ammarenta Allata'ala, sanrapangi pa'gambang niallea ri sitau baine, nampa napasileo' siagang patampulo litere' labu'. Sa'genna pila' a'bakka' jaina anjo labuka!”

³⁴Sikontu anjo Napangngajarranga Isa mae ri tau jaia, ammakei pangngebarang.

³⁵ Lanri kammana, a'rupami apa le'baka napau na'bia angkana, “PungKu a'bicara ri ke'nanga pangngebarang Kupake Kupakasingara' ngasengi mae ri ke'nanga apa-apa taccokkoa battu ri uru kajarianna anne linoa.”

³⁶Le'baki anjo, Nabokoimi Isa anjo tau jaia, nampa antama' ri balla'. Battumi ana'-ana' gurunNa akkuta'nang angkana, “Kipakasingara' sai ri kambe battuanna anjo pangngebarang rea attimboa ri alla'na asea.”

³⁷Appialimi Isa Nakana, “Anjo tau appakioroka lamungang baji', iaminjo Ana' Ma'rupataua nataba.

³⁸Anjo tanaya, iaminne linoa nataba. Na anjo lamungang bajika, iamintu tau a'jariamo umma'Na Allata'ala. Na anjo reaya, iamintu tau mannurukia ri Billisika.

³⁹Na ia musu appakioroka rea iamintu Billisika. Wattu pakkattoanga, iamintu Allo Kiamaka, na anjo tau akkattoa, iamintu sikamma malaekaka.

⁴⁰Antekamma batena nipasse're nampa nitunu anjo reaya, lakamma tommi anjo sallang ri Allo Kiamaka.

⁴¹LaNasuroi malaeka'-malaeka'Na Ana' Ma'rupataua ampasse're ngasengi sikontu tau a'jari passabakkanga na'gau' dosa taua, kammayatompa sikontu tau a'gau' ja'dalaka.

⁴²Lanipela' ngasengi ke'nanga antama' ri bara pepe' a'rinra-rinraya; anjoremmi ke'nanga langngarru'-arru', angkasiaki sessaya.

⁴³Na sikontu tau anggaukangai ero'Na Allata'ala laccayami sanrapang mataalloa lalang ri Lino BeruNa Allata'ala, a'jaria Manggena ke'nanga. Jari, punna nia' tolinnu, pilangngerimi baji'-baji'!”

⁴⁴“Punna ammarenta Allata'ala, pangngebaranna lakammaminne: Nia' barang-barang taccokko lalang butta, nanibuntulu' ri se'reang tau, na napoterang pole anjo baranga antama' ri buttaya. Nampa, lanri teai sipato' rannuna, a'lampami anjo taua ambalukang ngasengi sikontu barang-baranna, na nampa ammotere' amballi anjo tampaka sumpaeng.”

⁴⁵“Punna ammarenta Allata'ala, pangngebaranna lakammaminne: Nia' sitau padanggang a'boya mutiara ka'jalaka ballinna.

⁴⁶Ri wattunna ammuntulu' mutiara sannaka ga'gana, a'lampa memammi linta' mange ambalukang ngasengi sikontu barang-baranna, nampa ammotere' amballi anjo mutiara silisereka.”

⁴⁷“Punna ammarenta Allata'ala, lasanrapangi jala nibuanga ri tamparanga, nanggappa a'rupa-rupa juku'.

⁴⁸Ri wattunna rassimo anjo jalaya, niangka'mi nai' ri paboya jukuka, na nierang nai' ri tompo'na buttaya. Nampa ammempo ke'nanga ansa'la'-sa'laki anjo jukuka: anjo juku' bajika napantamaki ri katoanga, mingka anjo juku' kodia nipelaki.

⁴⁹Kammaminjo sallang kajarianna ri Allo Kiamaka: labattui malaeka'-malaeka'Na Allata'ala ansa'laki sikontu tau ja'dalaka siagang tau anggaukangai ero'Na Allata'ala.

⁵⁰Nampa napela' anjo sikontu tau ja'dalaka antama' ri bara pepeka. Anjoremmi ke'nanga langngarru'-arru', angkasiaki sessaya.”

⁵¹Akkuta'nammi Isa Nakana, “Maka nupahang ngasenji anne Kupakkanaya?” Appialimi ke'nanga angkana, “Iye' Bapa', napahanji ikambe.”

⁵²Jari Nakanamo Isa, “Lanri kammana minjo na anjo sikamma guru agama a'jariamo umma'Na Allata'ala, sanrapangi patanna balla' ampasuluka ngasengi barang-barang beruna siagang barang-barang sallona battu ri pammolikang barang-baranna.”

⁵³Le'ba'na Nacarita Isa anjo sikammaya pangngebarang, a'lampami ambokoi anjo tampaka,

⁵⁴nampa ammotere' mange ri pa'rasanganNa. Battuna mange anjoreng, mangemi ri sikamma balla' sambayanga angngajara'; na lannasa' ngasemmo taua allangngereki anjo apa Napangngajarranga. Nakanamo ke'nanga, “Battu kemaei anggappa pangngassengang kammaya anjo anne Taua? Battu kemaei anggappa koasa kammaya lompona Nakkulle anggaukangi gau'-gau' appakalannasaka?

⁵⁵Sai ana'na tukang kayua anne Taua? Sai niarengi Maria amma'Na, siagang assari'battangi Yakobus, Yusuf, Simon na Yudas?

⁵⁶Siagang sari'battanNa bainea anrinni ngaseng tonji ammantang. Battu kemae ngasengi Nagappa anjo sikammaya?”

⁵⁷ Jari tenamo naero' taua antarimai Isa antama' anjoreng ri pa'rasanganga. Nakanamo Isa ri ke'nanga, “Punna na'bi taua, nipakalompoi ri kere-keremae; mingka punna ri kamponNa yareka ri balla' KalenNa tonji, taerokai taua ampakalompoi.”

⁵⁸Jari tenamo Naero' Isa appare' gau' appakalannasa' anjoreng, lanri tenana natappa' ke'nanga ri KalenNa.