Read Makassar Version – KITTA' MATANGKASA MATIUS 15 Bible Online

MATIUS 15 - Makassar Version – KITTA' MATANGKASA bible

MATIUS 15

¹Nia' siapa are tu Farisi siagang guru-guru agama battu ri Yerusalem mae ri Isa. Akkuta'nammi ke'nanga ri Ia angkana,

²“Apa saba'na nanadakkai ana'-ana' gurunNu ada'-ada'na tu riolota? Kapunna langnganre ke'nanga tena na'bissa lima situru' atoranga!”

³Appialimi Isa Nakana, “Mingka angngapa nanudakkai todong passuroNa Allata'ala, lanri ero'nu bawang anggaukangi ada'-ada'na tu riolonu?

⁴ Nasaba' Nakana Allata'ala, ‘Pakala'biriki anrong-manggenu.’ Siagang, ‘Inai-nai ampakka'-pakkanai anrong-manggena, siratangi nihukkung mate.’

⁵Mingka nupangngajarrangi ikau ngaseng angkana: punna nia' tau angkana ri tau toana angkanaya, ‘Le'ba'mi kupassidakkang mae ri Allata'ala anjo doe' lakupassareanga ri katte,’

⁶anjo tau kammaya tenamo nakkulle nikellai dudu ampakala'biriki tau toana. Jari lanri ada'-ada'na tu riolonu nanubalang parekang kana-kana Napangngajarranga Allata'ala.

⁷Munape' ngasengko antu! Annaba sikalimi apa le'baka napau Na'bi Yesaya, ansero kana ngasengko angkanaya:

⁸ ‘Kammaminne kananNa Allata'ala: Napakala'birikKa' anne taua mingka poro ri bawanaji bawang naia atinna sanna' bellana ri Nakke.

⁹Tena matu-matunna anynyomba ke'nanga ri Nakke, nasaba' atorang rupatauji napangngajarrang kamma le'ba' angkana iaminjo atorang Kupassareanga.’ ”

¹⁰Le'baki anjo Nakio'mi Isa tau jaia nampa Nakana ri ke'nanga, “Pilangngerimi sollanna nupahang!

¹¹Teai apa-apa antamaya ri bawaya anrantassi rupataua; mingka apa-apa assuluka battu ri bawaya, iaminjo anrantassi kalenna.”

¹²Battumi ana'-ana' gurunNa angkana, “Maka Kiassenji angkanaya kasi'rikangi anjo tu Farisia nalangngeretTa akkana kamma?”

¹³Appialimi Isa angkana, “Sikamma lamung-lamung tenaya Nalamungi Manggeku ri suruga lanibi'buki.

¹⁴ Tea' mako jampangi anjo tu Farisia. Anjo ke'nanga sangnging pamimping-pamimping buta. Na punna tau buta ammimping tau buta, tena tatu'guru'na rua-rua naung ri solonganga.”

¹⁵Angkanami Petrus, “Kipakasingara' sai battuanna anjo pangngebaranga ri kambe, Bapa'!”

¹⁶Appialimi Isa mae ri ke'nanga Nakana, “Maka tena ijapa nanupahangi?

¹⁷Tenapa nuassengi, angkanaya apa antamaya ri bawaya, iaminjo naung ri parruka nampa assulu' poleang?

¹⁸ Mingka apa assuluka battu ri bawaya, iaminjo battu lalang ri atia; iaminjo anrantassi taua.

¹⁹Nasaba' battu lalammi ri atia ammumba pikkirang-pikkirang ja'dalaka, a'jaria saba' nammuno taua, a'gau' salimara', a'gau' bawang, a'lukka', siagang appitina.

²⁰Yangaseng minjo kammaya a'jari saba' na'jari rantasa' rupataua. Jari teai lanri angnganre ta'bissa lima.”

²¹Le'baki anjo, Nabokoimi Isa anjo tampaka. A'lampami mange ri daera ambania ri kota Tirus siagang Sidon.

²²Nia'mo sitau baine tu Kanaan niaka anjoreng ri daeraya battu mae ri Isa akkiok-kio' angkana, “O Ana'na Daud, Kikamaseanga'! Napantamakki setang ana' baineku. Sanna' dudumi sessana!”

²³Mingka tena sikali Nappiali Isa ri anjo bainea. Napala'mi ana'-ana' gurunNa sollanna Nasuro anjo tu bainea a'lampa. Nakanamo ke'nanga, “Bapa' Kisuro laloi anjo bainea a'lampa. Amminawanji apparicu ri bokota!”

²⁴Appialimi Isa ri anjo bainea, Nakana, “INakke nisuro mangejA' bawang ri bansa Israelka, la'biangampa ri tau sala oloanga.”

²⁵Battumi anjo bainea su'ju' ri dallekanNa Isa angkana, “Kitulullaloa' tuang!”

²⁶Appialimi Isa Nakana, “Tabajikai nialle kanrena ana'-anaka, nampa nipassareang mae ri kongkonga.”

²⁷Appialimi anjo bainea nakana, “Kammatojengi tuang, mingka kanre nakanrea kongkonga, iamintu sesa-sesa kanre tu'guruka battu ri mejang pangnganreanna karaenna.”

²⁸Nakanamo Isa ri anjo bainea: “Ibu', teai sipato' lompona tappa'nu. Boli'mi kamma na'jarimo apa nukaerokia!” Apaji naia memang anjo wattua na'jari baji' poleammo ana'na anjo bainea.

²⁹Nabokoimi Isa anjo tampaka, nampa a'jappa ri birinna Tamparang Galilea. Nampa nai' ammempo ri se'reang bonto.

³⁰Jaimi tau ambattui. Nia' angngerang tau tempang, tau buta, tau peso', tau pepe, siagang a'rupa-rupa garring maraengang. Niboli'mi ri dallekanNa Isa yangasenna anjo tau garringa. Nampa Naballei Isa na'jari baji' ngaseng silalonna.

³¹Lannasa' sikali sikontu tau niaka anjoreng, lanri nacini'na tau pepea akkullemi a'bicara, tau tempanga a'jari baji'mi, tau pesoka a'jappami, siagang tau butaya accini'mi. Ammuji-muji ngasemmi ke'nanga ri Allata'alana bansa Israel.

³²Le'baki anjo Nakio'mi Isa ana'-ana' gurunNa nampa Nakana, “Kukamaseanna anne tau jaia. Tallungallomi angngagangA', natenamo kanrena ke'nanga. Tena nalaKupa'biangi ammotere' ke'nanga punna cipuru', gassingka kodi sallang pakkasia'na ke'nanga ri tangngana aganga!”

³³Akkuta'nammi ana'-ana' gurunNa ri Ia angkana, “Kemaeki' akkulle ampanggappangi kanre tau sikammaya anne jaina ri daera bella kammaya anne?”

³⁴Akkuta'nammi Isa ri ke'nanga angkana, “Siapa mami jaina roti niaka ri kau ngaseng?” Appialimi ke'nanga angkana, “Tuju mami, siagang pirang kayu are juku' ca'di-ca'di.”

³⁵Nasuromi Isa ammempo naung anjo tau jaia.

³⁶Nampa Naalle anjo roti tujumbatua siagang anjo jukuka. Le'baki appala' sukkuru' ri Allata'ala, Nabage-bagemi anjo rotia siagang jukuka nampa Napassareang mae ri ana'-ana' gurunNa. Natawa-tawaimi ke'nanga anjo tau jaia.

³⁷Angnganre ngasemmi anjo tau jaia sa'genna bassoro'. Le'baki anjo napasse'remi ana'-ana' gurunNa Isa kanre niaka tassesa. Nia' tuju baku' jaina rassi ngaseng.

³⁸Na anjo tau angnganrea, nia' patassa'bu tau jaina, natanirekengapa tu bai'-bainea siagang ana'-anaka.

³⁹Le'baki anjo nampami Nasuro Isa ammotere' anjo tau jaia. Nampa Ia KalenNa, nai'mi ri se'reang biseang, Na'lampa mange ri daera Magadan.