Read Makassar Version – KITTA' MATANGKASA MATIUS 16 Bible Online

MATIUS 16 - Makassar Version – KITTA' MATANGKASA bible

MATIUS 16

¹ Nia' siapa are tu Farisi siagang tu Saduki battu mae ri Isa ero' ampa'boyangi kodi. Napala'mi ke'nanga sollanna appa'nia' gau' malompo na Napa'butti Isa angkanaya ma'nassa battu tojengi ri Allata'ala.

²Appialimi Isa ri ke'nanga angkana, “Punna lalabu alloa, nanucini' eja langika nuassemmi nubatei angkana talabosiai.

³Na punna bari'basa', nanucini' rammanga le'leng nuassemmi angkana labattui bosia. Jari akkullei nuasseng la'bi riolo angkanaya labosi yareka talabosiai lanri akkullei nubatei ri langika. Mingka pammateina jammanga tanuassengai nubatei.

⁴ Teai sipato' ja'dala'na siagang dorakana ngaseng taua ri anne jammanga. NusuroA' anggaukangi gau' appakalannasaka. Mingka manna sirupa gau' appakalannasa' tena todong lanipicinikiangko, pantaranganna gau' appakalannasa' le'baka kajariang ri kalenna Na'bi Yunus.” Le'baki akkana kamma Isa, a'lampami ambokoi ke'nanga.

⁵Wattunna battumo ana'-ana' gurunNa Isa ri ba'leanna tamparanga nampami naasseng angkanaya nakaluppai ke'nanga angngerang roti.

⁶ Nakanamo Isa ri ke'nanga, “Tutuko ri pa'gambanna tu Farisia siagang tu Sadukia.”

⁷Nalangngere'na ke'nanga akkana kamma Isa, angkanami ke'nanga para ia todong, “Nakkana kamma anjo nasaba' nikaluppai angngerang roti.”

⁸Mingka Naassengi Isa anjo apa nabicaraya ke'nanga. Jari angkanami, “Angngapa napassala' tenana roti massing nubicara? Tena ngaseng najarre' tappa'nu!

⁹ Tena ngasempa nupahangi? Tena nuu'rangi anjo roti limambatua le'baka nipa'bage-bageang, ri limassa'bua tau jaina? Pirang baku' tassesa le'ba' nupasse're?

¹⁰ Siagang antekamma anjo roti tujumbatua nipa'bage-bageanga mae ri patassa'bua tau jaina? Pirang baku' le'ba' tassesa nupasse're?

¹¹Angngapa natanupahanga angkanaya teai passala' roti anjo Kubicaraya ri kau ngaseng sumpaeng? Tutuko ri pa'gambanna tu Farisia siagang tu Sadukia!”

¹²Kale'bakkanna napahammi ana'-ana' gurunNa Isa angkanaya nisuroi ri Isa sollanna tutu ke'nanga ri pangngajarang salana tu Farisia siagang tu Sadukia. Jari teai passala' nikellaina ke'nanga tutu ammake pa'gambang punna appare' roti.

¹³Anjo wattua a'lampai Isa mange ri daera a'reppeseka ri Kota Kaisarea Filipi. Anjoreng, akkuta'nammi Isa ri ana'-ana' gurunNa Nakana, “Turu' pakkanana taua, inai anjo Ana' Ma'rupataua?”

¹⁴ Appialimi ana'-ana' gurunNa nakana, “Nia' angkana Yohanes Paje'ne'. Nia' todong angkana Elia. Maraengannaya angkana Yeremia, yareka kalase'renna na'bi-na'bia.”

¹⁵Akkuta'nammi Isa ri ke'nanga Nakana, “Mingka turu' ri panggappanu ngaseng inaiA' anne?”

¹⁶ Appialimi Petrus nakana, “IKattemi Karaeng Mappasalamaka, Ana'Na Allata'ala Mattallasaka.”

¹⁷Nakanamo Isa, “Upa' sikaliko kau Simon ana'na Yona! Nasaba' teai rupataua ampauangko anne, mingka ManggeKu ri suruga.

¹⁸Lanri kammana, siratangi nuasseng angkanaya, ikau mintu Petrus, batu makassaka. Iratemi ri tompo'na anne batu pa'dongkokanga laKupaenteng garejaKu, tenaya lambetai, manna pole kamateanga.

¹⁹ LaKupassareangi ri kau konci Lino BeruNa Allata'ala. Apa nupappisangkanga ri linoa, nipappisangkang tongi ri suruga. Siagang apa nupattojenga ri linoa, lanipattojeng tongi ri suruga.”

²⁰Le'baki anjo Napasammi ana'-ana' gurunNa sollanna tena napappiassengangi manna ri nai, angkanaya Iami Karaeng Mappasalamaka.

²¹Anjo wattua appakkaramulami a'bicara silambusu'na Isa mae ri ana'-ana' gurunNa, angkanaya takkulleai ta'lampa mange ri Yerusalem angkasiaki passessa jaia. Iamintu passessa battua ri pingga'-pinggawana tu Yahudia, imang-imang kapalaya, kammayatompa guru-guru agamaya. Lanibunoi, mingka lanipattallasa' poleangi battu ri kamateanga ri makatalluna alloa!

²²Nibeso'mi Isa ri Petrus mae ri sa'ri nampa nipauang angkana, “Tapporo Napakabella laloi Allata'ala ri Katte anjo kammaya, Batara! Poro tena lalo nakajariang anjo kammaya ri Katte Batara!”

²³Mingka assailemi Isa ri Petrus nampa Nakana, “A'lampako anrinni, Setang! NualleA' nurompa-rompai. Antu pikkirannu, pikkirang rupatau; teai pikkiranNa Allata'ala!”

²⁴ Nampa Nakana Isa mae ri ana'-ana' gurunNa, “Tau eroka amminawang ri Nakke takkulleai tanapariboko kaparalluang kalenna, nanapisang salli'na, nampa amminawang tuli ri Nakke.

²⁵ Nasaba' inai-nai angkatutui nyawana, iami latappela' nyawana. Mingka inai-nai angkoro'bangkangi katallassanna untu' iNakke iami langgappai katallassanga.

²⁶Nasaba' apa matu-matunna nagappa ngaseng taua anne linoa punna latappela' katallassanna? Maka akkullei anjo katallassanga nipassambe apa-apa maraeng?

²⁷ Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua.

²⁸U'rangi anne! Ri alla'nu anne hadereka anrinni, nia' talamateapi punna tenapa naciniki Ana' Ma'rupataua battu poleang a'jari Karaeng.”