Read Makassar Version – KITTA' MATANGKASA MATIUS 17 Bible Online

MATIUS 17 - Makassar Version – KITTA' MATANGKASA bible

MATIUS 17

¹ Annangallo ribokoanganna, Naerammi Isa i Petrus, Yakobus siagang sari'battanna iamintu Yohanes, mange akkale-kale ri se'reang moncong tinggi.

²Anjoreng, ti'ring tappinrami rupanNa Isa ri dallekanna ke'nanga: a'jari singaraki nicini' rupanNa kamma matanna alloa. Kammayatompa accillaki pakeanNa lanri kebo'na.

³Nampa nia'mo battu nacini' ke'nanga Musa siagang Elia, a'bicara siagang Isa.

⁴Nakanamo Petrus ri Isa, “Baji' sikali nikasia' ammantanga anrinni. Punna Kingai, Batara, erokka' appare' tallu balla' pammantangang anrinni: se're pammantanganTa, se're pammantanganna Musa, na se're pammantanganna Elia.”

⁵ Lalang a'bicarana Petrus, nia'mo rammang accaya manaung irateanganna ke'nanga. Nania'mo sa'ra kalangngerang battu lalang ri anjo rammanga angkana, “Iaminne Ana' nikamaseangKu. Napakate'nei atingKu. Pilangngerimi kananNa!”

⁶Nalangngere'na ana'-ana' gurunNa Isa anjo sa'raya, teaimi sipato' malla'na ngaseng, sa'genna tassu'ju'mi ke'nanga naung ri buttaya.

⁷Mingka battumi Isa anta'galaki ke'nanga. Nakana Isa, “Ambangungko nai', teako mallakki!”

⁸Assailena ke'nanga, tenamo tau maraeng nacini' pantaranganna Isa.

⁹Ri wattunna naung ke'nanga battu ri monconga, appasammi Isa ri ke'nanga Nakana, “Teako niakki ancaritai anjo kajariang nucinika sumpaeng manna ri nai, punna tenapa nipabangungi Ana' Ma'rupataua battu ri kamateanga.”

¹⁰ Akkuta'nammi ana'-ana' gurunNa Isa ri Ia angkana, “Angngapa nanakana guru-guru agamana tu Yahudia, angkanaya Elia labattu rioloangang?”

¹¹Appialimi Isa Nakana, “Battu memangi Elia ero' ampasadiai sikamma parallua nipasadia.

¹² Mingka Kukana ri kau ngaseng, battumi Elia mingka tena niassengi ri taua. Sangka' rupami nigaukangi ri ke'nanga. Na kammatommi anjo lanagaukangangi ke'nanga Ana' Ma'rupataua.”

¹³Nampami napahang ke'nanga angkanaya Yohanes Paje'ne' anjo natabaya kananNa Isa.

¹⁴Ri wattunna ammotere' ke'nanga mange anjoreng ri tau jaia, nia'mo sitau bura'ne battu su'ju' ri dallekanNa Isa.

¹⁵Angkanami anjo taua, “O Bapa', Kikamaseang laloi anakku. Natabai garring mate-mate jangang. Nateai sipato' sanna'na garrinna. Pammate sanna'na garrinna sa'genna biasai tu'guru' antama' ri pepeka yareka antama' ri je'neka.

¹⁶Le'ba'mi kuerang mange ri ana'-ana' gurunTa, mingka tanakulleai ke'nanga amballei.”

¹⁷Appialimi Isa angkana, “Teaiko anne sipato' ngaseng! Ma'nassa tau sala oloang ngasengko siagang tena ngaseng tappa'nu. Siapapi salloKu lammantang siagang lasa'bara' ri tangnga-tangnganu ngaseng? Erangi mae anjo anaka!”

¹⁸Nampa Nabongka Isa anjo roh ja'dalaka battu lalang ri kalenna anjo anaka. Assulu'mi anjo roh ja'dalaka, na'jari baji'mo anjo anaka silalonna.

¹⁹Ri wattunna kale-kalenna mami Isa, battumi ana'-ana' gurunNa akkuta'nang ri Ia angkana, “O Bapa', apa saba'na nakitakkullea anne ikambe ambongkai roh ja'dalaka?”

²⁰ Appialimi Isa Nakana, “Nasaba' kurang tappa' ngasengko. U'rangi! Punna nia' tappa'nu manna sillompoja lisere' kaminang ca'di dudua, akkulleko angkana mae ri anne buluka, ‘A'lettekko anrinni mange anjoreng!’ ma'nassa tena ta'lette'na anne buluka. Jari tena takkulle nugaukang punna tappakko! [

²¹Mingka anne roh ja'dala' kammaya pappala' doangang siagang puasaji bawang akkulle ampasuluki.]”

²²Ri wattunna a'rappungang ana'-ana' gurunNa Isa ri Galilea, angkanami Isa ri ke'nanga, “Tenamo nasallo nanipassareammo Ana' Ma'rupataua mae ri kakoasanna rupataua.

²³Lanibunoi, mingka lambangung poleangi ri makatalluna alloa.” Jari sanna' ngasemmi si'nana atinna ana'-ana' gurunNa.

²⁴ Ri wattunna battu Isa siagang ana'-ana' gurunNa mange ri Kapernaum, battumi pasingara' simaya ri Balla'Na Batara ri Petrus angkana, “A'bayara' tonji sima gurunnu yareka tena?”

²⁵Appialimi Petrus nakana, “A'bayaraki.” Ri wattunna ammotere' Petrus, nikuta'nammi ri Isa angkana, “O Simon, antekamma panggappanu? Inai musti a'bayara' sussung yareka sima, mae ri pammarentana anne linoa? Ra'yaka yareka tu battu pantarang pa'rasangang?”

²⁶Appialimi Petrus nakana, “Tu battu pantarang pa'rasanganga.” Angkanami Isa, “Punna kammanjo, tena naparallu ra'yaka a'bayara'.

²⁷Mingka takkulleaki' ansusai nyawana anjo taua. Jari a'lampamako mange ammekang ri tamparanga. Allei juku' uru nubantunga. Nia' doe' lanugappa lalang ri bawana anjo jukuka, anggannaka lanipa'bayarrang sima sipa'rua! Allei anjo doeka, nampa nubayara' simata mange ri Balla'Na Batara!”