Read Makassar Version – KITTA' MATANGKASA MATIUS 18 Bible Online

MATIUS 18 - Makassar Version – KITTA' MATANGKASA bible

MATIUS 18

¹ Anjo wattua akkuta'nammi ana'-ana' gurunNa Isa ri Ia angkana, “Inai akkulle nikana kaminang malompo ri sikontu umma'Na Allata'ala?”

²Akkio'mi Isa sitau ana'-ana', nampa Nasuro ammenteng ri dallekanna ke'nanga.

³ Nampa Nakana Isa, “Patappaki anne kanangKu! Punna a'jari kammako anne ana'-anaka, nampa mako akkulle a'jari umma'Na Allata'ala.

⁴Inai-nai ampakatunai kalenna a'jari sanrapang anne anaka, iami la'jari kaminang malompo ri tangnga-tangngana umma'Na Allata'ala.

⁵Na inai-nai antarimai ana'-ana' sanrapanga anne lanri iNakke, sanrapang iNakkemi natarima.”

⁶“Inai-nai a'jari saba' natenamo natappa' ri Nakke tau ca'di kammaya anne, bajikangangi punna nigentungi batu kallonna nampa nitallangngang naung ri tamparanga.

⁷Teai sipato' cilakana anne linoa lanri jaina passabakkang na'jari doraka rupataua. Mingka memang tuli lania'na anjo passabakkang kammaya. Mingka la'biangampa cilakana tau a'jari passabakkanga nadoraka paranna tau!

⁸ Punna passabakkang limannu yareka bangkennu nudoraka, bajikangang polongi nampa nupela'. Bajikanganji tenaya siali limannu yareka bangkennu assala' Napasalamakko Allata'ala, kala nipelakko antama' ri pepe'na narakaya sibatu kale.

⁹ Na punna passabakkang matannu nudoraka, bajikangang kocciki assulu' nampa nupela'. Bajikangangi tenaya matannu siali assala' Napasalamakko Allata'ala, kala nipelakko antama' ri pepe'na narakaya sibatu kale.”

¹⁰“Tutuko! Tea' laloko hinai kalase'renna anne tau ca'di kammaya. Nasaba' u'rangi angkanaya, tuli niaki malaeka'na ke'nanga ri dallekanNa ManggeKu ri suruga. [

¹¹ Nasaba' tau sala oloanga ero' Napasalama', nabattu Ana' Ma'rupataua!]

¹²Alarapanna, nia' sitau ammallaki sapi sibilangngang kayunna. Na punna tappela' sikayu, maka apa lanagaukang anjo taua? Antekamma panggappanu? Mattantu lanaboliki anjo sapinna salapampuloa assalapang ri bontoa, nampa a'lampa amboyai anjo sapinna sikayua tappelaka.

¹³Tappa' mako angkanaya, punna nabuntulu'mo ammotere' anjo sapinna sikayua, lalompoangangi rannuna ri anjo sapi sikayua kala ri anjo sapi salapampuloa assalapang kayunna, tenaya natappela'.

¹⁴Kamma tomminjo Manggenu ri suruga. Tena Nakellai kalase'renna anne tau beru tappaka ri Nakke sala oloang.”

¹⁵ “Punna sala sari'battannu ri kau, battuko mae ri ia nanupauang kasalanna. Ikau tommo sipa'rua punna nupauangi. Na punna napilangngeriji kanannu, nugappamintu ammotere' anjo sari'battannu.

¹⁶ Mingka punna tena napilangngeriko, akkiokko pole se're yareka rua tau, nu'rurung mange ampauangi pole. Nasaba' nia' tattulisi' lalang ri Kittaka angkanaya, ‘Kaminang kuranna parallui rua yareka tallu tau a'jari sa'bi nampa akkulle se'rea tau nipattantu kasalanna.’

¹⁷Punna tena ija napilangngeri pappakainga'na anjo siapaya tau, nampami nipau mange ri jama'aka. Kale'bakkanna, punna tena ijapa naero' ampilangngeri pappakainga'na jama'aka, pasangkammami pasingara' sima siagang tau kapere' anjo taua siagang tau tena natappa' ri Allata'ala.”

¹⁸ “Assengi angkanaya: Apa nupappisangkanga ri lino, nipappisangkang tongi ri suruga. Siagang apa nupattojenga ri lino, nipattojeng tongi ri suruga.

¹⁹Kammayatompa asseng tongi angkanaya: Punna nia' rua tau ri kau assamaturu' ri apa-apa mamo nampa appala' doang ri Allata'ala laNatarimai ManggeKu ri suruga pappala'na.

²⁰Nasaba' kemae nia' rua yareka tallu tau a'rappungang nasaba' iNakke, laniakKa' hadere' ri tangnga-tangngana ke'nanga.”

²¹ Le'baki anjo mangemi Petrus akkuta'nang ri Isa angkana, “O Batara, punna sala sari'battangku ri nakke, pissiapai akkulle kupammopporang? Sa'genna pintuju?”

²²Appialimi Isa Nakana, “Tena, tena napintujuja, mingka pintujui ri pintujupuloa!

²³Nasaba' punna ammarentamo Allata'ala, lakammai anne pangngebaranna: Nia' se're karaeng ero' assuro lappasi inranna ata-atanna.

²⁴Wattunna appakkaramula ammaressa, nia'mo sitau atanna nierang mange ri dallekanna, a'juta-jutaya inranna.

²⁵Tanakulleami nabayara' anjo inranna. Jari napassuroammi anjo karaenga sollanna nibalukang anjo ataya sipakkalabini siagang ana'-ana'na, kammayatompa sikontu barang-baranna, nampa nabayara' inranna.

²⁶Mingka su'ju'mi anjo ataya ri dallekanna anjo karaenga nappala' tulung angkana, ‘O Tuang, kikamaseangi atanta. Lanabayara' ngasenji atanta anjo inranna ngaseng.’

²⁷Tu'guru'mi pangngamaseanna anjo karaenga, sa'genna nabilang lappasa' ngasemmo inranna anjo atanna.

²⁸Ri wattunna assulu'mo anjo taua, sibuntulammi paranna ata, kainranganga ri ia pirassa'bu are jaina. Nata'gala'mi anjo aganna nanaaccekang kallonna nampa nakana, ‘Bayara' ngasengi inrannu!’

²⁹Su'ju'mi anjo aganna ri dallekanna appala' tulung nakana, ‘Sa'barakko rolong gang, kalakubayara' ngasenji inrangku!’

³⁰Mingka tanajampangiaji anjo aganna. Ba'lalo napantama'ji ri tarungkua anjo aganna sa'genna nabayara' ngaseng inranna.

³¹Nacini'na ata-ata maraenga anjo apa kajarianga, si'nami atinna ke'nanga. Mangemi ke'nanga ampabattui ri karaenga anjo apa kajarianga.

³²Nisuro kio'mi ri karaenga anjo ata kodi sipaka na nakana karaenga ri ia, ‘E kau ata kodi sipaka! Kubilang lappasa' ngasemmi inrannu lanri appala' tulungko ri nakke.

³³Maka tasiratangai nukamaseang anjo agannu sangkamma todong batenu kukamaseang?’

³⁴Teaimi sipato' larrona anjo karaenga. Nasuro pantama'mi ri tarungkua anjo ata kodi sipaka sa'genna nalappasi ngaseng inranna.”

³⁵Na ri kala'busang caritaNa Isa Nakanamo, “Kammatommi anjo sallang laNagaukanga ManggeKu ri kau ngaseng, punna tena nuero' ampammopporangi sari'battannu siagang ati maci'nonnu.”