Read Makassar Version – KITTA' MATANGKASA MATIUS 19 Bible Online

MATIUS 19 - Makassar Version – KITTA' MATANGKASA bible

MATIUS 19

¹Le'ba'na Napau ngaseng Isa sikammaya anjo, Nabokoimi Galilea, nampa a'lampa mange ri daera Yudea, ri ba'leanna Binanga Yordan.

²Jaimi tau ampinawangi. Naballeimi sikamma tau garring niaka anjoreng.

³Battumi tu Farisia ero' ampa'boyangi kasalang. Akkuta'nammi ke'nanga angkana, “Manuru' ri atorang agamata, maka akkulleji taua antallaki bainenna manna napassala' apa mamo?”

⁴ Appialimi Isa Nakana, “Maka tena ngasempa nubacai lalang ri Kittaka angkanaya ri uru nipare'na rupataua ri Allata'ala, Napareki bura'nea siagang bainea?

⁵ Na le'ba'na Napare' Nakanamo, ‘Iaminjo saba'na nanabokoi anrong-manggena bura'-bura'nea namange a'jari se're siagang bainenna, sa'genna a'jari se'remi sipa'rua.’

⁶Jari tenamo narua ke'nanga, mingka a'jari se'remi. Jari iaminjo saba'na naapa le'baka Napa'jari se're Allata'ala, takkulleai napasisa'la' rupataua.”

⁷ Akkuta'nammi pole tu Farisia ri Ia angkana, “Punna paleng kamma, apa saba'na nanasuro taua Musa assarei sura' talla' bainenna punna natalla'?”

⁸Appialimi Isa Nakana, “Tena napisangkaiko Musa antallaki bainennu lanri susanu ngaseng niajara'. Mingka sikontutojenna uru-uruna takammayai anjo.

⁹ Jari, pilangngerimi anne: Inai-nai antallaki bainenna — nateaija passala' a'gau' salimara' — na ribokoanganna na'baine poleang baine maraeng, a'gau' salimara' minjo taua.”

¹⁰Jari angkanami ana'-ana' gurunNa Isa ri Ia, “Punna kammaja anjo pakkalabinianga, bajikangangi tenaya na'bunting taua.”

¹¹Appialimi Isa Nakana, “Tayangasenga taua akkulle antarimai anne Kupaua, pantaranganna tau le'bakamo Napattantu Allata'ala.

¹²Nasaba' nia' tau takkulleai a'bunting lanri naerang memang tongi battu ri lassu'na. Mingka nia' todong takkullea a'bunting lanri panggaukanna tau maraenga. Nania' todong tau ia memang todong tea a'bunting sollanna akkulle a'jari palayanNa Allata'ala. Inai akkulle antarimai anne pangngajaranga, ia tommo antarimai.”

¹³Nia' siapa are tau angngerangi ana'na mae ri Isa sollanna nibarakkaki siagang nipappala' doangang anjo ana'-anaka. Mingka nikalarroimi ri ana'-ana' gurunNa Isa anjo taua.

¹⁴Nakanamo Isa ri ana'-ana' gurunNa, “Lappassangi namae ri Nakke anjo ana'-anaka, teako pisangkai. Nasaba' tau kammayami anne la'jari umma'Na Allata'ala.”

¹⁵Naangka'mi limanNa Isa naNabarakkaki ngaseng anjo ana'-anaka. Le'baki anjo a'lampami ambokoi anjo tampaka.

¹⁶Ri se'reang allo, nia' se're tau bura'ne battu mae ri Isa angkana, “O Guru, panggaukang apa baji' kugaukang sollanna akkulle kugappa katallassang sitojennaya siagang mannannunganga?”

¹⁷Appialimi Isa Nakana, “Angngapa nukkuta'nang ri Nakke ri passala' apa bajika? Se'reji bawang baji'. Punna erokko salama', turukimi sikamma apa Napassuroanga Allata'ala.”

¹⁸ Akkuta'nammi anjo tau rungkaya angkana, “Apa passuroNa Allata'ala?” Appialimi Isa Nakana, “Teako ammunoi; teako a'gau' salimararri; teako a'lukkaki; teako a'balle-ballei;

¹⁹ pakala'biriki anrong-manggenu; siagang kamaseangi parannu tau sangkamma nukamaseanna batangkalennu.”

²⁰Appialimi pole anjo tau rungkaya angkana, “Yangaseng anjo parenta kammaya le'ba'mi kugaukang. Jari apapi pole parallu kugaukang?”

²¹Akkanami pole Isa ri ia, “Punna ma'nassa erokko a'jari tau ganna', a'lampamako ambalukang ngasengi barang-barannu. Passareammi ballinna mae ri tu kasi-asia, nama'nassa lanugappamo sallang pa'barang-barangang niaka ri suruga. Punna le'ba'mo nugaukang anjo kammaya, battu mako mae amminawang ri Nakke!”

²²Nalangngere'na akkana kamma Isa, a'lampami anjo tau rungkaya; si'na sikali atinna nasaba' akkalumanynyang sikali.

²³Nakanamo Isa ri ana'-ana' gurunNa, “Kukanamo ri kau ngaseng, teai sipato' susana tau kalumanynyanga la'jari umma'Na Allata'ala.

²⁴Siagang Kukana pole ri kau ngaseng; la'bi akkulleangangi sikayua unta antama' ri so'bolo' jarunga kala tau kalumanynyanga lantama' ri Lino BeruNa Allata'ala.”

²⁵Lannasa' ngasemmi ana'-ana' gurunNa Isa nalangngere'na akkana kamma Isa. Nakanamo ke'nanga, “Punna paleng kamma, jari inai mami akkulle salama'?”

²⁶Nicinikimi ke'nanga ri Isa; nampa Nakana Isa ri ke'nanga, “Anjo tena memang nantama' ri akkala'na rupataua. Mingka tena tamakkulle punna Nakaerokang Allata'ala.”

²⁷Nakanamo Petrus, “Kicini' minne, ikambe nibokoi ngasemmi sikamma apa niaka ri kambe lanri erotta amminawang ri Katte. Na apa sallang lanagappa ikambe?”

²⁸ Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka!

²⁹Na inai-nai ambokoi balla'na, yareka sari'battanna bura'nea, yareka sari'battanna bainea, yareka anrong-manggena, yareka ana'na ngaseng, yareka kokonna, passabakkang iNakke, iami sallang langgappai ammotere' sikamma apa nabokoia a'lappi sibilangngang jaina. Siagang iami langgappai katallassang sitojennaya siagang mannannunganga.

³⁰ Mingka jai tau ri dallekanga ri kamma-kammaya anne la'jari tau ri boko dudui sallang. Na tau ri boko dudua ri kamma-kammaya anne la'jari tau ri dallekang dudui sallang.”