Read Makassar Version – KITTA' MATANGKASA MATIUS 2 Bible Online

MATIUS 2 - Makassar Version – KITTA' MATANGKASA bible

MATIUS 2

¹Anjorengi ri kota Betlehem, ri pa'rasangang Yudea, nilassukang Isa, ri wattunna Herodes ammarenta. Anjo wattua nia'mo siapa are tucara'de' accini' bintoeng, battu raya mange ri Yerusalem.

²Battui akkuta'nang mange-mange ke'nanga angkana, “Kemae pammantanganna anjo Ana' beru nilassukanga, la'jari karaenga ri tu Yahudia? Le'baki nia' ammumba bintoeng pammateiNa iraya. Nia' maki' anne battu ero' anynyomba ri Ia.”

³Nalangngere'na Herodes anjo kabaraka, teaimi sipato' ta'bangkana. Kammayatompa sikontu tau niaka ri Yerusalem ta'bangka ngaseng tommi.

⁴Nasuro kio' ngasemmi Herodes sikontu imang-imang kapalaya siagang guru-guru agamana tu Yahudia. Napa'rappungammi ke'nanga nampa nakuta'nang angkana, “Kemae lanilassukang anjo Karaeng le'baka Napa'janjiang Allata'ala?”

⁵Appialimi ke'nanga angkana, “Ri kota Betlehem, ri pa'rasangang Yudea. Nasaba' kammaminne le'baka natulisi' na'bia,

⁶ ‘Ikau Betlehem, ri pa'rasangang Yudea, Tena sikali naikau kaminang tuna ri alla'na sikamma kota lompo niaka ri Yudea, Nasaba' battu ri kaumi lammumba sitau pamimping eroka ampimpingi ummakKu Israel.’ ”

⁷Nalangngere'na Herodes pappialina ke'nanga, nasuro kio' cokko-cokkomi anjo tucara'deka accini' bintoeng. Nampa nakuta'nang ke'nanga angkanaya ringngapanna nappakkaramula ammumba anjo bintoenga.

⁸Le'baki anjo nasuromi ke'nanga a'lampa mange ri Betlehem. Na napasang ke'nanga angkanaya, “A'lampamako mange amboya baji'-bajiki anjo Anaka. Napunna nubuntulu'mo, pauang tonga', sollangku mange todong anynyomba ri ia.”

⁹A'lampami ke'nanga. Nalalang a'jappanamo ke'nanga, nia'mi pole nacini' ke'nanga anjo bintoeng le'baka ammumba iraya. Tamaka rannuna ke'nanga nacini'namo pole anjo bintoenga. A'lolo'mi anjo bintoenga mange ri dallekang, irateanganna ke'nanga. Sa'genna ammantang irateanganna pammantanganna anjo Anaka.

¹¹Antama'mi ke'nanga ri pammantanganna anjo Anaka. Nabuntulu'mi anjo Anaka siagang Maria amma'Na. Su'ju'mi ke'nanga anynyomba ri anjo Anaka. Nampa massing nasungke roko'-roko'na ke'nanga, namassing assare koro'bang, iamintu bulaeng, kamanynyang, siagang mur.[1]

¹²Ri lammotere'na ke'nanga, nipauammi ri Allata'ala lalang so'na, sollanna tea ammoteri ke'nanga mange ri Herodes. Jari oloang maraemmi naolo ke'nanga ammotere' mange ri pa'rasanganna.

¹³Ammotere'namo anjo tucara'deka accini' bintoeng, nia'mi pole malaeka'Na Batara ampappicinikangi kalenna lalang so'na mae ri Yusuf. Nakana anjo malaekaka, “Eroki nasuro boya siagang nasuro buno Herodes antu Anaka. Jari ambangungko nai', erangi antu Anaka siagang amma'Na mange accokko ri Mesir. Ammantang mako anjoreng sa'gennu Kusare poleang kabara'.”

¹⁴Ambangummi Yusuf, na'lampa memang anjo bangngia angngerangi anjo Anaka siagang amma'Na mange accokko ri butta Mesir.

¹⁵ Ammantammi ke'nanga anjoreng sa'genna mate Herodes. Lanri kammana, a'rupami kananNa Batara le'baka Nasuro pabattu ri na'biNa, angkanaya, “Kukioki ammotere' anakKu battu ri Mesir.”

¹⁶Naassenna Herodes angkanaya nitipui ri anjo tucara'deka accini' bintoeng niaka battu raya, tamakami larrona. Appasulu'mi parenta, assuro buno ngasengi sikontu ana'-ana' bura'ne niaka lalang ri Betlehem siagang ri ampi'-ampi'na, ia umuru' ruan taunga siagang irawangannaya. Anjo umuruka appakkaramulai nirekeng ri wattu pammumbana anjo bintoenga, situru' le'baka napau anjo tucara'deka accini' bintoeng.

¹⁷Kammaminjo na'rupamo apa le'baka napau Na'bi Yeremia, angkanaya,

¹⁸ “Nia' sa'ra karru' kalangngerang ri Rama Kunrareng siagang piraung Rahel angkarruki ana'-ana'na; na taeroka nisaleori lanri taena ngasemmi ana'na.”

¹⁹Ri wattunna matemo Herodes, ri nia'na ija Yusuf siagang anjo Anaka siagang amma'Na ri butta Mesir, nia'mi pole malaeka'Na Batara battu ampappicinikangi kalenna lalang so'na ri Yusuf.

²⁰Nakana anjo malaekaka, “Mate ngasemmi sikontu tau eroka ambunoi antu Anaka. Jari ambangung mako, allei antu Anaka siagang amma'Na siagang ammotere' mako mange ri Israel.”

²¹Ambangummi Yusuf, nampa naerang anjo Anaka siagang amma'Na ammotere' mange ri Israel.

²²Mingka nalangngere'na Yusuf angkanaya Arkelaus, iamintu ana'na Herodes ansambeangi manggena a'jari karaeng ri pa'rasangang Yudea, malla'mi Yusuf mange anjoreng. Mingka nipauammi pole ri Batara lalang so'na, sollanna a'lampa mange ri Daera Galilea.

²³ Anjoremmi ammantang ke'nanga, ri se'reang kota nikanaya Nazaret. Lanri kammana, a'rupami apa le'baka napau na'bi-na'bia ri passala'na anjo Anaka angkanaya, “Lanigallaraki Tu Nazaret.”