Read Makassar Version – KITTA' MATANGKASA MATIUS 20 Bible Online

MATIUS 20 - Makassar Version – KITTA' MATANGKASA bible

MATIUS 20

¹“Punna ammarenta Allata'ala, pangngebaranna lakammaminne: Nia' se're tau ero' a'boya pajama ri koko anggoro'na. A'lampa bari'basa'mi a'boya tau.

²Ri wattunna nia'mo siapa are tau nagappa, sitappukimi angkanaya lanabayaraki ke'nanga se're doe' pera' lalanna sialloa. Le'baki anjo nasuromi ke'nanga a'lampa anjama ri koko anggoro'na.

³Ri tette' salapanna alloa, a'lampami pole anjo patannaya koko. Nia'mo pole nacini' siapa are tau, tenaya jama-jamanna ri pasaraka.

⁴Nakanamo ri ke'nanga, ‘A'lampamako mange anjama ri koko anggorokku, nakubayarakko siapa siratanga.’

⁵A'lampami ke'nanga mange anjama. Kammaminjo pole nakkio'moseng tau anjama ri wattunna a'lampa ri tette' sampulona anrua ri tangngana alloa siagang ri tette' talluna ri karuenga.

⁶Nakira-kira ri tette' limana ri karuenga a'lampami pole. Nanacini'mo pole nia' ija tau tenaya jama-jamanna. Akkuta'nammi anjo patanna koko ri ke'nanga angkana, ‘Angngapa nummantang ngaseng anrinni ammenteng sila'busu' allo tena apa-apa nugaukang?’

⁷Appialimi ke'nanga angkana, ‘Katena tau ampajamaki'.’ Nakanamo anjo patanna koko, ‘Punna kamma padeng, mange ngaseng mako anjama ri koko anggorokku.’

⁸ Ri karueng dudunamo, nakanamo anjo patanna koko ri mandoro' pajama-jamana, ‘Kio' ngasemmi anjo tau anjamaya. Massing bayara'mi gajina appakkaramula battu ri anjo kala'busang dudua antama' anjama sa'genna tau ri dallekang dudua antama'.’

⁹Battumi anjo pajama tette' limaya ri karuenga nappakkaramula anjama. Massing nibayara'mi tasse'renna doe' pera'.

¹⁰Le'baki anjo battu tommi anjo pajama appakkaramulaya anjama ri bari'basaka. Napikkiriki ke'nanga angkanaya lala'bi lanatarima ke'nanga. Mingka kajarianna se're tonji doe' pera' nibayarrangi ke'nanga.

¹¹Natarimana doeka ke'nanga, a'moro-moromi ke'nanga ri anjo patannaya koko.

¹²Nakana ke'nanga, ‘Pajama ri boko dudua sitette'ji anjama. Na ikatte sila'busu' alloki' nabambangi allo anjama, mingka kipasangkammaji kipa'gajianga ri ke'nanga siagang ri kambe anne!’

¹³Appialimi anjo patanna koko mae ri kalase'renna ke'nanga, angkana, ‘E gang, tena nakusala ri kau. Sai le'ba' maki' sitappuki angkanaya se're doe' pera' gajinu siallo?

¹⁴Jari, allemi anne gajinu, nu'lampa. Ero' memang tonga' assarei anjo tau ri boko dudua antama' anjama, gaji sangkammaya jaina siagang gaji kupassareanga ri kau.

¹⁵Apa takkullea' angngatoroki pa'barang-barangangku situru' apa nakaerokia nyawaku? Yareka assereatiko lanri lammoro' pa'maikka'?’ ”

¹⁶ Nampa Nakanamo pole Isa, “Kamma tomminjo, tau ri boko dudua la'jari ri dallekang dudui, na tau ri dallekanga la'jari ri boko dudui.”

¹⁷Ri wattunna a'lampa Isa mange ri Yerusalem, ri tangngana aganga Nakio'mi mange ri tampa' tassa'laka ana'-ana' gurunNa. Nampa Nakana ri ke'nanga,

¹⁸“Pilangngerimi! Anne kamma a'lampa maki' mange ri Yerusalem. Punna battuki' mange anjoreng, lanipassareammi Ana' Ma'rupataua mae ri imang-imang kapalaya siagang guru-guru agamaya. Lanihukkung matei,

¹⁹nanipassareang ri tau teai bansa Yahudi. Lanicau-caui ri ke'nanga, lanisessai, nampa nisalli' ri ke'nanga. Mingka ri makatalluna alloa lanipabangungi pole ammotere'.”

²⁰Le'baki anjo battumi bainenna Zebedeus siagang ana'-ana'na andallekang ri Isa. Su'ju'mi ri dallekanNa Isa. Nia' ero' napala'.

²¹Akkuta'nammi Isa Nakana, “Apa nukaeroki?” Appialimi anjo bainea nakana, “Punna a'jari KaraengKi' sallang kupalaki naKipaempo anne anakku ruaya, se're ri kairinTa na se're ri kananTa.”

²²Nakanamo Isa ri ke'nanga, “Tanupahangai antu apa nupalaka. Maka akkullejako lampisa'ringi todongi passessa laKupisa'ringia?” Appialimi ke'nanga angkana, “Iye', akkulleja'.”

²³Nakanamo Isa, “Memang akkullejako ampisa'ringi passessa laKupisa'ringia. Mingka inai sallang lammempo ri sa'ri kairingKu siagang ri sa'ri kanangKu, teai iNakke lampattantui. Anjo tampaka lanipassareangi ri tau le'bakamo Napattantu Manggea.”

²⁴Nalangngere'na ana'-ana' gurunNa Isa sampuloa anjo passalaka, larromi ke'nanga mae ri anjo tau ruaya massari'battang.

²⁵ Lanri kammana nikio' ngasemmi ke'nanga ri Isa. Nakanamo Isa ri ke'nanga, “Nuassemmi angkanaya sikamma pamimpinna bansa kapereka ri anne linoa najallakkangi ra'yaka. Kammayatompa sikamma tumalompona ke'nanga anjallakkang tongi ra'ya'.

²⁶ Mingka ikau takkulleako appakamma anjo. Passangalinna inai-nai ero' a'jari tau lompo parallui a'jari palayang.

²⁷Na inai-nai ero' a'jari tau ri dallekang dudu, parallui a'jari ata.

²⁸Sangkamma minjo Ana' Ma'rupataua; niaki battu teai sollanna nanilayani, passangalinna sollanna na'jari palayang. NaNapassareang nyawaNa, sollanna nakkulle Napasalama' tau jaia.”

²⁹Ri wattunna nabokoimo ke'nanga Yerikho, jaimi tau amminawang ri Isa.

³⁰Nia'mo rua tau buta ammempo ri biring aganga. Nalangngere'na ke'nanga angkanaya niaki Isa numalo, akkiok-kio'mi ke'nanga angkana, “O Ana'na Daud, kamaseangki' anne kodong!”

³¹Nikalarroimi siagang nisuromi ke'nanga a'mere' ri sikamma tau niaka anjoreng. Mingka pila' akkio' lompoji pole ke'nanga angkana, “O Tuang, Ana'na Daud, Kikamaseangki' anne kodong!”

³²Jari ammantammi Isa nampa Nasuro kio' ke'nanga. Akkuta'nammi ri ke'nanga angkana, “Apa ero' nupala' Kugaukang ri kau sipa'rua?”

³³Appialimi ke'nanga angkana, “O Tuang, erokki' anne accini'!”

³⁴Tu'guru'mi pangngamaseanNa Isa ri ke'nanga. Najamami matanna ke'nanga, nakkulle memammo accini' silalonna. Nampa amminawammi ke'nanga ri Isa.