Read Makassar Version – KITTA' MATANGKASA MATIUS 23 Bible Online

MATIUS 23 - Makassar Version – KITTA' MATANGKASA bible

MATIUS 23

¹Le'baki anjo Nakanamo Isa ri tau jaia siagang ana'-ana' gurunNa,

²“Anjo guru-guru agamaya siagang tu Farisia nisarei pangngissengang ambattuangngi atorang agama napassareanga Musa.

³Lanri kammana pilangngerimi siagang gaukammi apa napassuroanga. Mingka teako gaukangi apa nagaukanga ke'nanga. Nasaba' kalenna ke'nanga tena nagaukangi apa napangngajarranga ke'nanga.

⁴Nasareki' atorang-atorang battala' siagang nakellaiki' anggaukangi apa sannaka susana. Mingka manna sike'de' tena todong natulungki' anggaukangi.

⁵ Sikontu anjo apa nagaukanga ke'nanga poro ero'naja napappicini'-cinikang ri taua. Napakkunjung-kunjungiammi ke'nanga ammake soro'bang siagang juba turunga!

⁶Nangai ke'nanga ammempo ri pammempoang kaminang bajika ri tampa' passua'-suarranga, yareka lalang ri balla' sambayanga.

⁷Nangai ke'nanga punna nipakala'biri' ri pasa'-pasaraka, siagang sannang sikali punna nikio' ‘Bapa' Guru’ ri taua.

⁸Mingka ikau ngaseng teako eroki nikio' ‘Bapa' Guru’, nasaba' se'reji Gurunnu, na ikau assari'battang ngasengko.

⁹Siagang teako akkio' ‘Bapakki’ manna ri nai, nasaba' se'reji Bapa'nu, iamintu Bapa'nu niaka ri suruga.

¹⁰Natea tongko eroki nikio' ‘Pamimping’, nasaba' se'reji pamimpinnu, iamintu Karaeng Mappasalamaka, Napa'janjianga Allata'ala.

¹¹ Inai kaminang la'biri' ri kau parallui a'jari palayang.

¹² Inai-nai ampakalompoi kalenna iami lanipakatuna; na inai-nai ampakatunai kalenna, iami lanipakalompo.”

¹³Nakanamo pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia. Ikau ngasemmi anrompai taua la'jari umma'Na Allata'ala. Ikau ngasenji tea a'jari umma'Na Allata'ala, nanurompai todong tau maraenga, eroka a'jari umma'Na Allata'ala. [

¹⁴Cilaka ngaseng mako ikau guru-guru agamaya siagang tu Farisia lanri nungaina assara-saraia. Nutipui janda-jandaya, nanualleang balla'na. Nalanri ero'na nucokkoi kaja'dallannu, nula'bu-la'buimi punna assambayangko. Lanri kammana minjo nabattala' sikali sallang hukkungannu!]

¹⁵Cilaka ngaseng mako ikau guru-guru agamaya siagang tu Farisia, lanri nungaina assara-saraia! A'lampa bella mako a'limbang tamparang, nujappai ngasemmi tompo'na buttaya, naporo sitauji bawang ero' nupantama' ri agamanu. Na punna antama'mo anjo taua ri agamanu, nupa'jarimi parekang tulantamaka ri naraka, a'lappi ruaya ja'dala'na na ikau ngaseng!

¹⁶Cilaka ngaseng mako ikau pamimping-pamimping butaya! Nuajari taua angkana, ‘Punna assumpa taua na Balla'Na Batara nipau, tenaja naparallu niu'rangi anjo sumpaya; mingka punna assumpai lanri bulaeng lalang ri Balla'Na Batara musti niu'rangi anjo sumpaya.’

¹⁷Ikau ngaseng tu toloa siagang tu butaya! Kereanga paralluangang: bulaenga yareka Balla'Na Batara ampa'jariai matangkasa' anjo bulaenga?

¹⁸Nupangngajarrang tongi angkanaya, ‘Punna assumpa taua na tampa' pakkoro'bangnganga nipau, tenaja naparallu niu'rangi anjo sumpaya; mingka punna assumpa taua na koro'bang ratea ri tampa' pakkoro'bangnganga nipau, parallu niu'rangi anjo sumpaya.’

¹⁹Teai sipato' butanu ngaseng! Kereanga paralluangang? Koro'banga, yareka tampa' koro'banga ampa'jariai matangkasa' anjo koro'banga?

²⁰Jari, punna nia' tau assumpa na napau tampa' koro'banga, battuanna napalalang ngasemmi tampa' koro'banga, kammayatompa pole koro'bang niaka irate ri anjo tampa' koro'banga.

²¹Siagang punna nia' tau assumpa na napau Balla'Na Batara, battuanna napalalang ngasemmi Balla'Na Batara, kammayatompa pole Allata'ala ammantanga ilalang.

²² Siagang punna nia' tau assumpa na suruga napau, battuanna napalalang tommi empoang kala'biranNa Batara kammayatompa pole Allata'ala niaka ammempo irate ri anjo empoang kala'biranga.

²³ Cilaka ngaseng mako ikau guru-guru agamaya siagang tu Farisia, lanri nungai assara-saraia. Assare mako passidakka mae ri Batara; wassele' lamung-lamunnu kammaya lamung-lamung nipareka pa'bumbu lisere'na, lamung-lamung nipareka bumbu yareka pa'minynya'-minynya' siagang lamung-lamung nipareka pa'balle leko'na. Yangasenna anjo nupassidakkammi bage sampulona ri Batara. Mingka kaminang parallua lalang pangatorang agamaya kammaya: Kaadelang, pangngamaseang, siagang akkana sitappaka, tena ngaseng nujampangi. Na sikontutojenna yangaseng minjo parallu nugaukang, nampa nuu'rangi todong maraenganga.

²⁴Ma'nassa pamimping buta ngasengko! Nubongkai katingalo lalanga ri je'ne' inunnu, na unta sikayu nua'lu'!

²⁵Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nubissai sa'genna tangkasa' bageang pantara'na mangkoka siagang piringa. Na lalanganna teai sipato' ra'masa'na napakamma apa-apa tena na hallala' siagang napakamma angngoa dudunu.

²⁶E, tu Farisi butaya! Bissaimi sa'genna tangkasa' ilalanganna anjo mangko'-mangko'nu siagang piring-pirinnu, sollanna tangkasa' ngaseng todong pantaranganna!

²⁷ Cilaka ngaseng mako ikau guru-guru agamaya siagang tu Farisia, lanri nungaina assara-saraia! Sanrapangko jera' nice' keboka; sanna' ga'gana nicini' pantaranganna; mingka lalanganna rassi buku-buku sannaka ngaseng botto'na.

²⁸Kamma ngaseng tommako anjo. Punna nicini' battu pantarang, baji' ngasengko mae ri taua; mingka lalang ri nyawanu, sangnging tu munapekko siagang tena ngaseng nungngasseng atorang.”

²⁹Nakana pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nuga'gai pare'na jera'na na'bi-na'bia. Siagang numode bajiki mesanna tau baji'-bajika katallassanna.

³⁰Siagang nukana ngaseng, ‘Ka'de' ninia' tommo ri wattu attallasa'na boe-boeta, tenaja katte nikaturu'-turukang ambunoi na'bi-na'bia.’

³¹Jari numangakuimi angkanaya sossoranna ngasengko tau ambunoai na'bi-na'bia!

³²Punna kamma gaukang tulimi siagang pa'le'ba'mi dosa-dosa le'baka napakkaramulai boe-boenu!

³³E, ikau ngaseng tau ja'dalaka siagang sossorang tau ja'dalaka! Antekamma lakkulle nuliliang hukkunganga ri naraka?

³⁴Pilangngerimi baji'-baji': LaKusuroi battu ri kau na'bi-na'bia, tu cara'deka, siagang guru-gurua; na nia'mo ri ke'nanga nubuno, nia' tommo nusalli'. Nia' nusessa lalang ri balla' sambayanga, na nia' tommo nuondang mange-mange ri kota-kotaya.

³⁵Jari lanihukkung ngasengko sallang, lanri nubunona tau tenaya salana: Appakkaramula ri nibunona Habel tenaya salana, sa'genna nubunona Zakharia ana'na Berekia lalang ri alla'na Balla'Na Batara siagang tampa' pakkoro'bangnganga.

³⁶Patappa'mi angkanaya: yangasenna anjo panggaukanga lanagappa ngasengi hukkunganna tau niaka ri anne jammanga!”

³⁷“O Yerusalem, O Yerusalem! Kau ambunoi na'bi-na'bia. Nusambilai batu sikamma tunisuroNa Allata'ala sa'genna mate. A'mole-moleMa' ero' anraka' ngasengko sanrapang anrong janganga ancokkoi ana'-ana'na irawangang ka'nyi'na. Mingka tena ngaseng nuero'!

³⁸Lanri kammana minjo Nataerokamo Allata'ala anrurungangko.

³⁹Asseng memammi angkanaya: Appakkaramula ri kamma-kammaya anne tenamo nalanucinikKa', sa'gengKu battu poleang sallang nanukanamo, ‘Nibarakkakimi Ia battua lalang arenNa Batara.’ ”