Read Makassar Version – KITTA' MATANGKASA MATIUS 24 Bible Online

MATIUS 24 - Makassar Version – KITTA' MATANGKASA bible

MATIUS 24

¹Ri wattunna a'lampamo Isa ambokoi Balla'Na Batara ri Yerusalem, battumi ana'-ana' gurunNa anjo'jokangi bangunang-bangunanna Balla'Na Batara.

²Nakanamo Isa ri ke'nanga, “Nucini' ngasemmi anjo bangunanga? Assemmi angkanaya, manna se're batu talania' sallang ammantang assusung ri tampa'na, nasaba' lanirumbang ngasengi!”

³Le'baki anjo, a'lampami Isa mange ri Bonto Zaitun. Na ammemponamo, battumi ana'-ana' gurunNa angngagangi a'bicara kale-kalenna. Nakanamo ke'nanga ri Ia, “Kipaumi ri kambe anne, singngapanna nalakajariang ngaseng anjo kammaya? Apa la'jari pammateina punna battu poleangKi' sallang ri allo kala'busang jammanga?”

⁴Appialimi Isa Nakana, “Tutu laloko, sollanna tena nanitipuko.

⁵Nasaba' lajai sallang tau battu ambalukangi arengKu nakana, ‘Inakke minne Karaeng Mappasalamaka!’ Jaimi tau lanatipu ke'nanga.

⁶Lanulangngereki sallang sa'ra bunduka, kammayatompa kabara' pa'bundukanga. Mingka teako mallakki. Nasaba' anjo sikammaya lakajariang ngaseng memang tongi; mingka teaipi anjo wattua nabattu allo kiamaka.

⁷Bansa se'rea la'bunduki siagang bansa maraenga, siagang se'rea pa'rasangang lanabakkai pa'rasangang maraenga. Ri kere-keremae lakajariangi bala kacipuranga siagang lata'ge'gosoki linoa.

⁸Na yangasenna anjo nampami pakkaramulanna, sanrapang tu tianang appisa'ringia ri wattu ero'na lammana'.

⁹ Siagang lanijakkalakko nunipassareang nisessa nampa nibuno. Lanikabirisiko ri sikontu bonena linoa, lanri amminawangko ri Nakke.

¹⁰Na anjo wattua jai tau lammono'boko; jai lanynyaleweng, siagang lasikabirisi massing para ia.

¹¹Jai na'bi patipu lantipui tau jaia.

¹²Teai sipato' jaina kaja'dallang alla'bang ri kere-keremae, sa'genna jai sikalimi tau tenamo nangngasseng angngamaseang.

¹³ Mingka inai-nai attahang sa'genna kala'busang tallasa'na, iami lanipasalama'.

¹⁴Na lanibirittakammo ri sikontu linoa Kabara' Bajika, ri passala' antekamma batena ammarenta Allata'ala, sollanna nalangngere' ngaseng taua. Le'baki anjo nampami battu allo kiamaka.”

¹⁵ “Lanuciniki sallang ammenteng ri tampa' matangkasaka, ‘Kaja'dallang langngancuruka’, sangkamma le'baka napau Na'bi Daniel.

¹⁶Anjo wattua, tau niaka ri pa'rasangang Yudea parallui lari nai' ri buluka.

¹⁷ Tau niaka irate ri pattongko'na ballaka teami naungi angngalle apa-apa battu lalang ri balla'na.

¹⁸Tau niaka ri kokoa teami ammoteri angngallei bajunna.

¹⁹Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo!

²⁰Appala' doangko sollanna tena laloja nawattu bosi yareka wattu allo Pammari-mariang, nuparallu lari!

²¹ Ri wattu battuna anjo allo-allo appakamallaka labattumi susa lompo dudua, tenayapa nale'ba' kajariang baku' nia'na linoa, siagang tenayamo nalakajariang pole ribokoanganna.

²²Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua.

²³Anjo wattua, punna nia' tau angkana ri kau, ‘Ciniki, niaki anrinni Karaeng Mappasalamaka!’ yareka nakana, ‘Niaki anjoreng!’ — teako tappakki ri anjo taua.

²⁴Nasaba' lania' sallang battu siapa are tumappasalama' patipu, siagang na'bi-na'bi patipu. Lanappicinikangi ke'nanga gau'-gau' teai sipatoka lompona siagang appakalanna'-lannasaka, sollanna akkulle, manna umma'Na Allata'ala lanatipu todong.

²⁵Jari, u'rangi memangi! Kupauang mako anne la'bi riolo ri tenanapa nakajariang.

²⁶ Punna nakana taua ri kau, ‘Ciniki, niaki anjoreng ri parang lompoa!’ — teako mangei anjoreng. Yareka punna nakana ke'nanga, ‘Ciniki, niaki anrinni accokko lalang ri kamaraka!’ — teako tappakki.

²⁷Nasaba' kabattuanNa sallang Ana' Ma'rupataua sanrapangi caya kila' tassioroka battu raya sa'genna kalau'.

²⁸ Kemae nia' maya', anjoreng tommi nia' jangang-jangang pakanre mayaka.”

²⁹ “Tena nasallo ri le'ba'na anjo wattu kasusaanga, la'jari sassammi alloa, na tenamo naccaya singara' bulanga. Latu'guru' ngasemmi bintoenga battu ri langika. Na sikamma makoasaya lalang lino, la'jari sanna'mi ricuna.

³⁰ Le'baki anjo lammumbami rate ri langika pammatei kabattuanNa Ana' Ma'rupataua. Na anjo wattua langngarru' ngasemmi sikontu bansa-bansa niaka lalang lino. Lanacini'mi ke'nanga battu Ana' Ma'rupataua ri tompo'na rammanga, lalang koasaNa siagang kala'birang malompoNa.

³¹Nipasa'rami tarompe' lompoa. Na Nasuromo malaeka'-malaeka'Na Ana' Ma'rupataua ampa'rappungangi umma'Na battu ri sikontu linoa, battu raya sa'genna kalau', kammayatompa battu timboro' sa'genna wara'.”

³²“Angngalle mako pappilajarang battu ri poko' araya. Punna lu'mu'mo siagang moncongbulomo tangke-tangkenna, kammayatompa appakkaramulami accu'la', akkullemi nuasseng angkanaya la'birimmi battu bambang alloa.

³³Kamma tomminjo, punna nucini'mo kajariang anjo passala' le'baka Kupauangko, akkullemi nuasseng angkanaya la'biring dudumi battu Ana' Ma'rupataua.

³⁴Assengi! Angkanaya, tenapa namate ngaseng taua nakajariang anjo passalaka.

³⁵Lalanynyaki langika siagang linoa, mingka tuli lania'na kana-kanangKu satunggu-tungguna.”

³⁶“Tena tau angngassengi ringngapanna allonna siagang tette'na; manna malaekaka ri suruga tena todong; kammayatompa manna Ana'Na Allata'ala tena todong Naassengi. Passangalinna Manggea bawang angngassengi.

³⁷ Punna sallang battu Ana' Ma'rupataua, lakammai lampa-lampana ri jammanna Na'bi Nuh.

³⁸Ri allo-allo tenanapa nabattu a'ba lompoa, angnganre-nganrei, angnginung-nginungi, siagang a'bunting-buntingi taua. Kammaminjo tuli nagaukanga taua, sa'genna antama' Na'bi Nuh ri biseang lompo napareka.

³⁹ Ri wattunna battumo a'ba lompoa antujui ke'nanga nampami naasseng ke'nanga apa kajarianga. Kamma tomminjo lampa-lampana sallang punna battu Ana' Ma'rupataua.

⁴⁰Anjo wattua nia' tau rua sitabang anjama ri kokoa: sitau lanierang, na sitau laniboli'.

⁴¹Rua baine sitabang a'dengka ase: sitau lanierang, na sitau laniboli'.

⁴²Jari a'jaga-jagako, nasaba' tena nuassengi ringngapanna nalabattu Bataranu.

⁴³ U'rangi minne! Ka'de' naasseng patanna balla' angkanaya tette' siapa ri bangngia nalabattu palukkaka, tenaja nalattinro, sollanna tena nantama' palukkaka ri balla'na.

⁴⁴Jari parallu tongko sadi'-sadia. Nasaba' tena nuassengi wattunna nati'ring lania' battu Ana' Ma'rupataua.”

⁴⁵Nakanamo pole Isa, “Punna kamma, maka kereanga palayang tuli bajika siagang cara'deka? Iami niangka' ri karaenna a'jari kapala mae ri palayang-palayang maraenga, sollanna nasare ke'nanga kanre punna narapi' wattunna.

⁴⁶Teai sipato' upa'na anjo palayanga, punna ammotere' karaenna nanirapikang anggaukangi siagang baji' jama-jamanna.

⁴⁷Patappa'mi angkanaya lanapappirannuang ngasengi apa-apanna anjo karaenga mae ri anjo palayanga.

⁴⁸Mingka punna kodi sipa' anjo palayanga, lanakanamo lalang ri nyawana,

⁴⁹‘Lasallo iji nampa ammotere' karaenga,’ naallemi naba'ji palayang-palayang maraenga. Nampa angnganre siagang angnginung-nginung siagang tu nangaia angnginung sa'genna nasa'ring.

⁵⁰Nati'ring ammotere' karaenna ri allo siagang ri tette' tenaya naassengi.

⁵¹Niba'jimi anjo palayanga ri karaenna sa'ge patea-teana, nampa nipela' antama' ri pammantanganna tau munapeka. Lasessa sikalimi siagang langngarru'-arru'mi ke'nanga angkarruki sarenna.”