Read Makassar Version – KITTA' MATANGKASA MATIUS 25 Bible Online

MATIUS 25 - Makassar Version – KITTA' MATANGKASA bible

MATIUS 25

¹ “Punna battu Ana' Ma'rupataua salaku Batara, lakammai anne pangngebaranna: Nia' sampulo tulolo paerang bunting, massing angngalle sulo, nampa a'lampa mange anruppai bunting bura'nea.

²Nia' lima ri ke'nanga tolo, na lima maraengannaya cara'deki.

³Anjo limaya tulolo toloa, angngerangi sulo mingka tangngerangai minynya' tana pappasadia.

⁴Anjo tulolo cara'deka, angngerangi sulo nangngerang todong minynya' tana pappasadia.

⁵Na talintaka battu anjo bunting bura'nea. Jari appakkaramulami ta'do'do' ngaseng anjo tuloloa, sa'genna attinro.

⁶Ri lantannamo bangngia, nampami nia' sa'ra akkio' angkana, ‘Nia' minjo mae bunting bura'nea! Umba niruppai!’

⁷Ambangummi anjo sampuloa tulolo na massing naparinra sulona ke'nanga.

⁸Nakanamo anjo tulolo toloa mae ri tulolo cara'deka, ‘Sare tongki' minynya' tananu sike'de', kaikatte lamatemi rinrana sulota.’

⁹Appialimi anjo tulolo cara'deka angkana, ‘Takkulleai! Nasaba' kala'busang ngasengki' sallang minynya'. A'lampamako ammalli ri ga'dea.’

¹⁰A'lampami anjo tulolo toloa mange ammalli minynya' tana ri ga'dea. Lalang a'lampana ke'nanga, battumi bunting bura'nea. Antama'mi anjo tulolo cara'deka anrurungangi anjo bunting bura'nea ri tampa' passua'-suarranga, nampa nitongko' pakke'buka!

¹¹ Le'baki anjo nampami battu anjo tulolo maraenga. Akkiok-kio'mi ke'nanga angkana, ‘O Karaeng, o Karaeng, kisungke sai pakke'buka.’

¹²Mingka appialimi anjo bunting bura'nea nakana, ‘Tena ngaseng nakuassengko!’ ”

¹³Le'baki anjo Natongko'mi Isa anjo pangngebaranga Nakana, “Lanri kammana, a'jaga-jaga mako, nasaba' tena nuassengi allonna siagang tette'na nabattu Ana' Ma'rupataua.”

¹⁴ “Punna battu Ana' Ma'rupataua salaku Batara, lakammai anne pangngebaranna: Nia' se're bura'ne ero' a'lampa ri se'reang pa'rasangang bella. Nakio'mi tallua palayanna, nampa napappirannuangang barang-baranna ri ke'nanga.

¹⁵Massing nasaremi anjo palayanna situru' massing pakkullena. Anjo se'rea nasarei limassa'bu doe' ringgi' bulaeng. Maka ruaya nasarei ruassa'bu doe' ringgi' bulaeng. Na makatallua nasarei sisa'bu doe' ringgi' bulaeng. Le'baki anjo a'lampami.

¹⁶Anjo palayang annarimaya limassa'bu doe' ringgi' bulaeng, a'lampa memammi a'danggang; nanggappamo passawallang limassa'bu doe' ringgi' bulaeng.

¹⁷Kamma tomminjo nagaukanga palayang annarimaya ruassa'bu doe' ringgi' bulaeng; nanggappamo passawallang ruassa'bu doe' ringgi' bulaeng.

¹⁸Mingka anjo palayang annarimaya sisa'bu doe' ringgi' bulaeng, a'lampami angngeke kali'bong nampa nacokko doe'na karaenna anjoreng.

¹⁹Sallo sikali le'ba'namo anjo, ammotere'mi anjo karaenga. Nappakkaramulamo assirekengang siagang ke'nanga.

²⁰Battumi anjo palayang annarimaya limassa'bu doe' ringgi' bulaeng, nampa nasare anjo karaenga anjo doeka sampuloa sa'bu. Na nakana ri karaenga, ‘O, karaeng, limassa'bu doe' ringgi' bulaeng le'ba' kisareanga'. Kicini' minne, nia' kugappa limassa'bu passawallang.’

²¹Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako nakisiagang assannang-sannang!’

²²Nampa battu tommi anjo palayang annarimaya ruassa'bu doe' ringgi' bulaeng. Nakana ri karaenga, ‘O karaeng, ruassa'bu doe' ringgi' bulaeng le'ba' kisareanga'. Kicini' minne, nia' kugappa ruassa'bu passawallang.’

²³Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako kisiagang assannang-sannang!’

²⁴Battu tommi anjo palayang annarimaya sisa'bu doe' ringgi' bulaeng. Nakanamo ri karaenga, ‘O karaeng, kuassengki' angkanaya ikatte tau sekkekki'. Angngalleki' rappo-rappoang battu ri poko'-poko' takilamunga; siagang angngalleki' wassele' ri tampa' tenaya naikatte allamungi bine.

²⁵Jari lanri mallakku, a'lampama' ancokkoi doetta rawa ri buttaya. Annemi doetta karaeng.’

²⁶Nakanamo anjo karaenga, ‘Ikau palayang ja'dalakko siagang malasakko. Sai nuassemmi angkanaya angngallea' rappo-rappoang battu ri poko'-poko' takulamunga; siagang angngallea' wassele' ri tampa' tenaya kulamungi bine?

²⁷Punna kamma, siratanna nuboliki doekku ri kantoro' banga, sollanna punna niakka' ammotere' akkullei kualle ammotere' doekku siagang bungana.

²⁸Lanri kammana, allei ammotere' anjo doeka battu ri ia nampa nusareang anjo tau niaka sampulo sa'bu doe' ringgi' bulaenna.

²⁹ Nasaba' tau niakamo ri ia, lanitambaiangi pole la'bi jai, sollanna la'jari kala'biang. Mingka tau tenayapa ri ia, lanialleangi pole apa-apa niaka sike'de' ri ia.

³⁰ Na anjo palayang tenaya matu-matunna pelaki assulukang ri tampa' sassanga. Anjoremmi langngarru' siagang lasessa!’ ”

³¹ “Punna battu sallang Ana' Ma'rupataua a'jari Karaeng siagang nirurungang ri sikontu malaeka'Na, lammempomi irate ri empoang kala'biranNa.

³²Sikontu bansaya lanipa'rappungang ngasemmi ri dallekanNa. Nampa laNasa'la' anjo rupataua a'jari ruang pammantangang, rapang pakalawaki ansa'laki gimbalaka siagang bembea.

³³Sikamma tau le'baka anggaukangi ero'Na Allata'ala laNapa'rappungangi ri sa'ri kananNa, na maraenganga ri sa'ri kairinNa.

³⁴Nampa laNakana anjo Karaenga mae ri anjo tau niaka ri sa'ri kananNa, ‘Mae ngaseng mako kau tu nibarakkakia ri ManggeKu. Antama' mako ri Tampa' le'baka nipasadiang memangko ri uru nia'na linoa.

³⁵Nasaba' ri wattungKu cipuru' nusareA' kanre, ri wattungKu turere nusareA' je'ne inung. Ri wattungKu a'jari tau battu-battu nualleA' nupariballa'.

³⁶Tena care-carengKu nusareA' care-care. GarringA' nuparakaiA'. NitarungkuA' nanutulungA'.’

³⁷Nakana ngasemmo anjo taua, ‘O, Batara, ringngapanna nakucinikKi' cipuru' nakusareKi' kanre, yareka turereKi' nakusareKi' je'ne' inung?

³⁸Ringngapanna nakucinikKi' a'jari tau battu-battu nakupariballakKi'? Ringngapanna natena Kiccare-care nakusareKi' care-care?

³⁹Ringngapanna kucinikKi' garring yareka nitarungku nakutulungKi'?’

⁴⁰Lappiali Karaenga Nakana, ‘Asseng laloi anne: ri wattu nugaukanna sikammaya anjo mae ri kalase'renna sari'battangKu kaminang tunaya, ilalang kammana minjo nanugaukammo ri Nakke!’

⁴¹Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na!

⁴²Nasaba' ri wattungKu cipuru' tanusareA' kanre; ri wattungKu turere tanusareA' je'ne' inung.

⁴³Ri wattungKu a'jari tu battu-battu taerokako ampariballakKa'. Tena Kuccare-care, natanusareA' care-care. GarringA' siagang nitarungkuA', natena nuparakaiA'.’

⁴⁴Appialimi ke'nanga ri Ia angkana, ‘O, Batara, ringngapanna nakucinikKi' cipuru', yareka turere, yareka nitarungku, yareka a'jari tu battu-battu, yareka taccare-carea, yareka garring, natakutulungaKi'?’

⁴⁵Lappialimi anjo Karaenga Nakana, ‘Asseng laloi anne: ri wattunnu taeroka antulungi kalase'renna anne tau kaminang tunaya, lalang kammana minjo nutaeroka antulungA'.’

⁴⁶ Jari lanihukkung ngaseng minjo taua sa'genna satunggu-tungguna. Mingka tau anggaukangai ero'Na Allata'ala, lanakasia'mi katallassang sitojennaya siagang mannannunganga.”