Read Makassar Version – KITTA' MATANGKASA MATIUS 26 Bible Online

MATIUS 26 - Makassar Version – KITTA' MATANGKASA bible

MATIUS 26

¹Le'ba'na Napangngajarrang ngaseng Isa anjo sikammaya, Nakanamo ri ana'-ana' gurunNa,

² “Nuassemmi angkanaya ruangallo mami naallo Lompo Paska, nalaniallemi nipassareang Ana' Ma'rupataua nampa nisalli'!”

³Anjo wattua a'rappungammi imang-imang kapalaya siagang sikamma pinggawana tu Yahudia ri balla' lompona Imang Malompona Kayafas.

⁴A'bicarami siagang a'boyami akkala' ke'nanga, antekamma nakkulle najakkala' cokko-cokko Isa, nampa nabuno.

⁵Mingka nia'mo ri ke'nanga angkana, “Mingka teako jakkali ri allonna passua'-suarranga, sollanna tena nasiricui tau jaia.”

⁶Ri wattunna nia' Isa ri Betania, ri balla'na Simon le'baka garring sala,

⁷ nia'mo sitau baine battu mae ri Ia angngerang sibotolo' minynya'-minynya' bau', sannaka ka'jala'na ballinna. Natumpami anjo minynya'-minynya' bauka ri ulunNa Isa, ri sitabanna angnganre Isa.

⁸Larromi ana'-ana' gurunNa Isa nacini'na appakamma anjo bainea. Nakanamo ke'nanga, “Apa matu-matunna napa'laboang kamma anjo minynya'-minynyaka?

⁹Akkullei nibalukang ka'jala' anjo minynya'-minynyaka nampa nipassareang ballinna mae ri tau kasi-asia!”

¹⁰Nalangngere'na Isa anjo bicaranna ke'nanga, Nakanamo, “Angngapa nanususai kamma anne bainea? Anu baji' siagang anu annaba anne nagaukanga ri Nakke.

¹¹ Ia tau kasi-asia tuli lania'na ri ampi'nu, mingka iNakke tena Kutuli lania' ri ampi'nu.

¹²Punna paleng natiriki minynya'-minynya' bau' KalengKu, naparuruiMa' lamange ri jerakKu.

¹³Patappa'mi angkanaya, kere-keremae nipa'la'bang Kabara' Baji' battua ri Allata'ala ri sikontu linoa, anjoremmi lanibicara todong anne nagaukanga bainea, a'jari pammatei siagang pangngu'rangi ri ia.”

¹⁴Nia'mo kalase'renna anjo sampuloa anrua ana' gurunNa Isa, iamintu Yudas Iskariot, a'lampa mae ri imang-imang kapalaya.

¹⁵ Nakanamo ri ke'nanga, “Apa lanusareanga' punna kupassareang Isa ri kau?” Nisaremi ri ke'nanga tallumpulo doe' pera'.

¹⁶Pakkaramulami anjo wattua a'boyami wattu baji' Yudas antekamma nakkulle napassareang Isa.

¹⁷Ri allo pakkaramulanna allo Passua'-suarrang Roti Tenaya Nammake Pa'gambang, battumi ana'-ana' gurunNa Isa mae ri Ia. Nakanamo ke'nanga, “Kemae erotTa lanipasadia pangnganreang Paskaya?”

¹⁸Appialimi Isa Nakana, “A'lampamako antama' ri kotaya, numange ri se'reang tau anjoreng, angkana, ‘Nakana Gurua: La'birimmi narapi' wattungKu; eroKa' angnganre Paska siagang ana'-ana' gurungKu ri balla'nu.’ ”

¹⁹Nagaukammi ana'-ana' gurunNa Isa anjo Napassuroanga. A'lampami ke'nanga ampasadiai anjo kanre Paskaya.

²⁰Wattunna bangngimo, ammempomi Isa siagang anjo sampuloa anrua ana' gurunNa.

²¹Lalang angnganrena ke'nanga, Nakanamo Isa, “Pilangngeri sai: nia' sallang kalase'rennu ambalukangA'.”

²²Nalangngere'na anjo, sanna' ngasemmi si'nana pa'mai'na ana'-ana' gurunNa. A'le'ba'-le'basa'mi akkuta'nang ri Isa angkana, “Tantu teaiji nakke nataba kananTa?”

²³ Appialimi Isa Nakana, “Ia Kuaganga appada appanaung roti ri mangkoka, iaminjo eroka ambalukangA'.

²⁴Mingka lamate memang tonji Ana' Ma'rupataua, kamma le'ba' tattulisika lalang ri Kittaka. Mingka cilakami anjo tau eroka ambalukangi Ana' Ma'rupataua! Bajikangngangi punna sikali tena nale'ba' nilassukang anjo tau kammaya.”

²⁵Nakanamo Yudas lapung tau la'baluka, “O, Guru, tantu teaiji nakke nataba kananTa?” Nakanamo Isa, “Kamma mintu kanannu!”

²⁶Ri wattu angnganre bangngina Isa, angngallemi roti nampa appala' sukkuru'. Nampa Napue-pue anjo rotia. Le'baki anjo Natawa-tawaimi ana'-ana' gurunNa, Nakana, “Allei, kanremi, iaminne tubuKu.”

²⁷Le'baki anjo angngallemi pangnginungang anggoro' nampa appala' sukkuru' ri Allata'ala. Nampa Napassareang mae ri ana'-ana' gurunNa, na Nakana, “Angnginung ngaseng mako battu ri anne pangnginunganga.

²⁸ Nasaba' iaminne cerakKu, ampakajarrekai janjinNa Allata'ala — cera' nipasolonga, sollanna akkulle nipammopporang sikontu dosana tau jaia.

²⁹Patappaki: Pakkaramula anne wattua, tenamo Kulangnginung anggoro' sa'genna narapi' wattunna Kuinung anggoro' berua siagang ikau ngaseng lalang ri Lino BeruNa ManggeKu.”

³⁰Le'baki anjo, akkelong-kelommi ke'nanga se're kelongang pammuji ri Allata'ala. Nampa a'lampa ke'nanga mange ri Bonto Zaitun.

³¹ Nampa Nakana Isa ri ana'-ana' gurunNa, “Anne bangngia lalari ngasengko ambokoiA' Kale-kalengKu; nasaba' nia' tattulisi' lalang ri Kittaka angkanaya: Nakana Allata'ala, ‘LaKubunoi anjo pakalawakia, nalari ngaseng tassia'-siara' gimbala'na.’

³² Mingka punna attallasa' poleangA', la'lampa rioloA' mange antayangko ri Galilea.”

³³Nakanamo Petrus ri Isa, “Manna a'lampa ngaseng maraenganga ampilariKi', mingka inakke tena sikali kuero' ampilariKi'!”

³⁴Nakanamo Isa ri ia, “U'rangi Petrus! Ia memang jinne bangngia, ri tenanapa nattingkoko janganga napintallumMa' nusassali.”

³⁵Appialimi Petrus nakana, “Manna pole lasikamateangki', mingka tena sikali nakuero' ansassaliKi'!” Kammayatompa ana'-ana' gurunNa maraenga akkana kamma ngaseng tommi.

³⁶Le'baki anjo a'lampami Isa siagang ana'-ana' gurunNa mange ri se'reang tampa' nikana Getsemani. Nakanamo ri ana'-ana' gurunNa, “Ammempo mako anrinni antayangA', erokKa' a'lampa anjoreng appala' doang.”

³⁷Naerang tommi Petrus siagang ruaya ana'na Zebedeus. Paccemi siagang si'na sikalimi Nasa'ring pa'mai'Na.

³⁸Nakanamo ri ana'-ana' gurunNa, “Sanna' si'nana Kusa'ring pa'maikKu, kamma Kusa'ring tau lamatea. Ammantang mako anrinni anrurungangA' a'jaga-jaga.”

³⁹A'lampa bella-bellami Isa sike'de' mange ri dallekang, nampa su'ju' naung ri buttaya appala' doang angkana, “O, ManggeKu, ka'de' nia' kulleanna, pabellami anne passessaya ri Nakke. Mingka teaKi' naerokKu anjari, passangalinna erotTamo anjari.”

⁴⁰Le'baki anjo, ammotere'mi mae ri ana'-ana' gurunNa tallua. Mingka narapikangi attinro ke'nanga. Nakanamo ri Petrus, “Maka takkulleako angngagangA' a'jaga manna sinampe'ja?

⁴¹A'jaga-jaga mako siagang appala' doang mako, sollanna tena nanukasiaki paccobaya. Ero' memanji nyawaya anggaukangi tojenga, mingka tamakkulleai tubua lanri lammana.”

⁴²A'lampami pole Isa appala' doang maka pinruanna angkana, “O, ManggeKu, punna paleng takkulleami nipakabella anne passessaya ri Nakke, natakkullea taKupisa'ringi, boli'mi kamma Kipa'jari erotTa.”

⁴³Le'baki anjo ammotere'mi pole, nanarapikang pole ana'-ana' gurunNa attinro, lanri ta'do'do' duduna ke'nanga.

⁴⁴Sikalipi pole a'lampa ambokoi ke'nanga, mange appala' doang maka pintallunna, kamma sumpaeng.

⁴⁵Nampa ammotere' pole ri ana'-ana' gurunNa, na Nakana, “Attinro ngasengijako siagang ammari-mari ngasengijako? Ciniki, narapi'mi wattunna lanialle Ana' Ma'rupataua, nampa nipassareang mae ri sikamma tau ja'dalaka.

⁴⁶Ambangung mako nai', umba naki'lampa! Nia'mi battu tau le'baka ambalukangA'.”

⁴⁷Lalang a'bicara kammana Isa, nia'mi battu Yudas, kalase'renna anjo ana' gurunNa sampuloa anrua. Nia'mo tau jai anrurungangi, massing angngerang pa'dang siagang palu-palu. Yangaseng minjo tau nasuroa kapa'-kapalana imanga siagang pingga'-pinggawana tu Yahudia.

⁴⁸Le'ba'mi nipato ri Yudas angkanaya, “Kereanga tau kubau sinampe', iaminjo taunna, allemi jakkala'!”

⁴⁹Battuna mange anjoreng ke'nanga, mange memammi Yudas ri Isa na nakana, “Salama', Guru!” Nampa nabau Isa.

⁵⁰Appialimi Isa Nakana, “Apa parallunu battu sari'battang?” Maju ngasemmi anjo tau jaia anjakkalaki Isa, nampa nasikko'.

⁵¹Ti'ring nia'mo sitau ana' gurunNa niaka anrurungangi, ambi'buki kalewanna, nampa nate'ba' kalase'renna anjo tunisurona imang lompoa, sa'genna kaccili' leko' tolinna.

⁵²Mingka angkanami Isa ri ia, “Poterangi antama' ri banoanna antu kalewanga; nasaba' inai-nai akkarena kalewang, iami lanipanraki ri kalewang.

⁵³Maka tenapa nuassengi angkanaya punna erokKa', akkullei Kupala' ri ManggeKu sollanna Nasuro battu silalonna memang surudadu malaeka'Na, sampulo anrua sa'bu battu angngalleiA'?

⁵⁴Mingka punna kamma anjo, antekammami la'rupa apa le'baka napau Kittaka, angkanaya tena takajarianna anjo ri kamma-kammaya anne?”

⁵⁵ Nampa Nakanamo Isa ri anjo tau jaia, “Apaka nucini' ja'dalakKa' numassing angngerang kamma pa'dang siagang palu-palu battu anjakkalakKa'? Allo-alloKu angngajara' lalang ri Balla'Na Allata'ala natena nujakkalakKa'!

⁵⁶Mingka lakajariang ngaseng memanji anne kammaya, sollanna a'rupamo apa le'baka natulisi' na'bi-na'bia lalang ri Kittaka.” Le'baki anjo, apaji nalari ngasemmo ana'-ana' gurunNa Isa, a'lampa ambokoi.

⁵⁷Le'baki najakkala' Isa, a'lampami ke'nanga angngerangi Isa mange ri balla'na Kayafas, Imang Lompoa. A'rappungang ngasemmi anjoreng sikamma guru-guru agamaya siagang sikamma pinggawana tu Yahudia.

⁵⁸Battu bellami Petrus ampinawang bokoi Isa, sa'genna paranglakkenna Imang Lompoa. Antama'mi ammempo ri alla'na pajagaya, ero' naasseng angkanaya antekamma kale'bakkanna lakajarianga ri Isa.

⁵⁹Sikamma imang-imang kapalaya kammayatompa sikamma haking Pangadelang Agamaya, massing a'boyami sa'bi a'balle-balle, sollanna akkulle nihukkung mate Isa.

⁶⁰Mingka takkulleai ke'nanga appa'nia' butti, manna pole najaimo battu sa'bi a'balle-balle ero' ambattali. Kala'busanna nia'mo rua tau battu andallekang angkana,

⁶¹ “Anne taua le'baki angkana, ‘Akkullei Kurumbang anne Balla'Na Allata'ala, nampa Kupabangung poleang ri makatalluna alloa.’ ”

⁶²Ammentemmi imang lompoa na nakana ri Isa, “Apaka tena Nuero' ampiali bicaranna anne sa'bi-sa'bia?”

⁶³Mingka tena Nakkana-kana Isa. Nakanamo pole imang lompoa ri Ia, “Nasaba' Allata'ala mattallasaka, paumi ri kambe, maka Ikau tojeng mintu Karaeng Mappasalamaka, Ana'naya Allata'ala?”

⁶⁴ Appialimi Isa Nakana, “Annaba mintu kanannu. Mingka patappa'mi angkanaya: Anne kamma appakkaramulami lanucini' Ana' Ma'rupataua ammempo ri sa'ri kananNa Allata'ala Kaminang Koasaya. Siagang lanucini' tommi sallang battu poleang irate ri langika ri tompo'na rammanga!”[4]

⁶⁵ Nalangngere'na imang lompoa akkana kamma Isa, naallemi nasinre' jubana na nakana, “Nahinai Allata'ala! Tenamo naparallu pole sa'bia. Massing nilangngere'mi bicaranNa anghinai Allata'ala.

⁶⁶Jari antekamma panggappanu ngaseng?” Appialimi ke'nanga angkana, “A'nassami kasalanna. Jari siratangi nihukkung mate.”

⁶⁷ Massing battumi ke'nanga ampi'rui rupanNa Isa, nampa nasessa naba'ji. Nia' tommo antempaka'rangi,

⁶⁸na nakana, “O, Karaeng Mappasalamaka, tappu sai bedeng siagang pau sai bedeng, inai antempaka'rangKo?”

⁶⁹Anjo wattua sitabang niaki Petrus ammempo pantarang ri paranglakkenga. Nia'mo kalase'renna baine palayang battu angkana ri Petrus, “Sai siagang tongko anjo Isa tu battua ri Galilea?”

⁷⁰Mingka assassala'mi Petrus ri dallekanna ngaseng ke'nanga, nakana, “Tena kupahangi antu apa nupakkuta'nanganga.”

⁷¹Le'baki appiali kamma, a'lampami mange ri pakke'bu' parang lakkenga. Nia'mo pole baine palayang maraeng anciniki; na nakana ri tau niaka ngaseng anjoreng, “Anne taua assiagang tongi sumpaeng Isa, anjo tu battua ri Nazaret.”

⁷²Assassala'mi siagang assumpami Petrus nakana, “Tojenga', tena nakuassengi anjo taua!”

⁷³Tena nasallo le'ba'na anjo, battumi ri dallekanna Petrus tau niaka ammenteng anjoreng, na nakana ke'nanga, “Ma'nassa kalase'rennako battu ri ke'nanga. A'nassa sikali nilangngere' ri batenu a'bicara.”

⁷⁴Assumpa-sumpa tojemmi Petrus nakana, “Matea' naung, tena tojeng nakuassengi anjo taua!” Anjo wattua attingkokomi janganga.

⁷⁵Nau'rangimi Petrus le'baka Napau Isa ri ia angkanaya, “Ri tenanapa nattingkoko janganga na pintallumMa' nusassali.” Assulukammi Petrus angngarru', si'na pa'mai'na.