Read Makassar Version – KITTA' MATANGKASA MATIUS 27 Bible Online

MATIUS 27 - Makassar Version – KITTA' MATANGKASA bible

MATIUS 27

¹Ri bari'basa' dudua, natappukimi sikontu kapala imanga kammayatompa pamimping-pamimpinna tu Yahudia, angkanaya lanabunoi Isa.

²Nasikko'bokomi Isa, nampa naerang ke'nanga mange napassareang ri Pilatus, wakkele'na pamarenta Roma.

³ Nacini'na Yudas, le'baka ambalukangi Isa, angkanaya nihukkummi Isa, nasassala'mi kalenna. Naerammi mange napoterang anjo doeka tallumpuloa doe' pera' ri imang-imang kapalaya siagang pamimping-pamimpinna tu Yahudia.

⁴Nakanamo ri ke'nanga, “Dorakama' kubalukangi tau tenaya salanna, sa'genna nihukkung mate!” Appialimi ke'nanga angkana, “Ikatte tena naparallu kijampangi; anjo urusannu kau!”

⁵Napasambilami Yudas anjo doeka antama' ri Balla'Na Batara, nampa a'lampa anggentungi kalenna.

⁶Mangemi imang-imang kapalaya anrappungi anjo doeka. Na nakana ke'nanga, “Anne doeka, doe' cera'. Situru' atoranga ri agamaya, anne doe' kammaya takkulleai nipantama' ri pammoneang passidakkanga lalang ri Balla'Na Batara.”

⁷Assamaturu'mi ke'nanga ampaballi anjo doeka se're tampa' niarenga Tampa' Papare' Uring. Anjo tampaka nipare'mi pa'jerakkanna tau battu pantarang pa'rasanganga.

⁸Iaminjo saba'na na sa'genna kamma-kamma anne niarengi anjo tampaka, “Tampa' Cera'”.

⁹ Lanri kammana, a'rupami apa le'baka napau Na'bi Yeremia, angkanaya, “Natarimai ke'nanga tallumpulo doe' pera', iamintu pa'bayara' ballinna KalenNa, napassamaturukianga bansa Israel.

¹⁰Na anjo doeka napakei ke'nanga ammalli Tampa' Papare' uring, situru' le'baka Napassuroang Batara ri nakke.”

¹¹Ri wattunna andallekang Isa ri Pilatus, guburnurna anjo pa'rasanganga, akkuta'nammi Pilatus nakana, “Maka karaennaKo tu Yahudia?” Appialimi Isa Nakana, “Kammaminjo nukanaya.”

¹²Mingka ri wattunna jai sikali nituduangi ri imang-imang kapalaya siagang pamimping-pamimpinna tu Yahudia, tena sikali Naero' akkana Isa.

¹³Jari nakanamo Pilatus ri Ia, “Tanulangngerai anjo apa natuduangKo ke'nanga?”

¹⁴Mingka manna sikali tena todong Naero' appiali Isa, sa'genna lannasa' sikalimi Pilatus.

¹⁵Punna narapi' allo lompo Passua'-suarrang Paska, biasana nia' sitau tu nitarungku nilappassang ri pamarentaya, situru' napilea tau jaia.

¹⁶Anjo wattua nia' se're tu nihukkung, a'la'banga niasseng kaja'dallanna ri tau jaia. Arenna iamintu Isa Barabas.

¹⁷Jari wattunna a'rappungammo tau jaia, akkuta'nammi Pilatus ri ke'nanga nakana, “Kereanga nupala' lakulappassang? Isa Barabas yareka Isa nigallaraka Almasi?”

¹⁸Nakkana kamma anjo Pilatus, kasaba' naassengi angkanaya na napassareang ke'nanga Isa, lanri assereati ke'nanga ri Isa.

¹⁹Ri wattunna ammempo Pilatus anjoreng ri kantoro' pangadelanga nia'mi battu pappasanna bainenna angkana, “Tea' laloko pantama'-tamakki kara-karana antu tau tenaya salana. Nasaba' lanri Iami nakunggappa so'na appakamalla'-malla' dudua, anne alloa.”

²⁰Mingka imang-imang kapalaya siagang pamimping-pamimpinna tu Yahudia, tuli naajara' salai tau jaia sollanna napala' ri Pilatus, na Barabas nilappassang, nampa Isa nihukkung mate.

²¹Akkuta'nammi pole Pilatus ri ke'nanga nakana, “Kereanga anne tau ruaya nupala' kulappassang?” Appialimi ke'nanga angkana, “Barabas!”

²²Akkuta'nammi Pilatus ri ke'nanga nakana, “Jari apa lakugaukangi ri anne Isa, nigallaraka Almasi?” Appialimi ke'nanga angkana, “Allei Salli'!”

²³Akkuta'nammi Pilatus nakana, “Mingka apa kaja'dallanNa?” Pila' akkio' lompomi pole ke'nanga angkana, “Allei Salli'!”

²⁴ Kala'busanna naassemmi Pilatus angkanaya tena memang tommo maraeng akkulle nagaukang. Siagang akkullei a'jallo' anjo tau jaia punna tena niturukiangi ero'na. Jari angngallemi je'ne', nampa nabissai limanna ri dallekanna anjo tau jaia. Na nakana, “Inakke tena nakutanggongi kamateanNa anne taua! Anne urusannu ngaseng kau!”

²⁵Appiali ngasemmi anjo tau jaia angkana, “Boli'mi kamma, ikambepa siagang ana'-ana'na ikambe antanggongi hukkunganga lanri kamateanNa!”

²⁶Nalappassammi Pilatus anjo Barabas. Nampa nasuro taua ancamboki Isa; nampa napassareang nierang mange nisalli'.

²⁷Le'baki anjo nierammi Isa ri surudaduna Pilatus antama' ri balla' lompona guburnurka. A'rappungang ngasemmi surudadua amparitangngai Isa.

²⁸Napusumi ke'nanga pakeanNa Isa, nampa napipakei juba cura' lame butung.

²⁹Appare'mi ke'nanga passikko' ulu akkatintinga, nampa napasongko' ri ulunNa Isa. Nampa napita'galliang takkang bulo ri lima kananNa. Le'baki anjo akkulantu'mi ke'nanga ri dallekanNa Isa. Nacau-caumi Isa nakana, “Iye', Karaeng tu Yahudi!”

³⁰Napi'ruimi rupanNa Isa, nampa naalle anjo takkanga, na napalu-palui ulunNa.

³¹Le'baki nakarek-karenai, napasulu'mi ammotere' ke'nanga anjo juba cura' lame butunga. Nampa napipakei ammotere' pakeang KalenNa Isa. Le'baki anjo nierammi assulu' nampa mange nisalli'.

³²Ri tangngana aganga, sibuntulu'mi ke'nanga siagang sitau tu battu ri Kirene, niarenga Simon. Napassami ke'nanga anjo taua ampisangi kayu salli'na Isa.

³³Anrapi'mi ke'nanga mange ri se'reang tampa' niarenga Golgota, battuanna “Tampa' Tangkora'”.

³⁴ Battuna anjoreng nasaremi angnginung anggoro' Isa, nicampuruka campurang sannaka pai'na. Mingka Naassenna kasia'na teami Isa angnginungi anjo anggoroka.

³⁵ Nampa nasalli' ke'nanga Isa. Na nabotorimi pakeanNa ero' nabage massing tawana.

³⁶Le'baki anjo ammempomi ke'nanga anjagai Isa.

³⁷Ri tompo' ulunNa Isa, nia' natannang ke'nanga tulisang angkanaya, “Iaminne Isa, Karaenna tu Yahudia”. Iaminjo tattulisika nituduangi Isa.

³⁸Nia' todong rua tau paella' naagang Isa nisalli'; se're ri sa'ri kananNa, se're ri sa'ri kairinNa.

³⁹ Sikamma tau niaka numalo, massing napammenggong ulunna, nahina-hinaimi Isa.

⁴⁰ Nakana ke'nanga, “Ikaumi eroka anrumbangi Balla'Na Allata'ala, na nupabangung poleang ri makatalluna alloa! Punna Ana'naKo Allata'ala, naung maKo mae battu ri antu sallika, na Nupasalama' KalenNu!”

⁴¹Kamma tomminjo nagaukang imang-imang kapalaya siagang guru-guru agamaya, kammayatompa pamimping-pamimpinna tu Yahudia. Nacau-cau tommi Isa angkana,

⁴²“Napasalamaki tau maraenga, na KalenNa taNakulle Napasalama'! Punna Karaennai bansa Israel, lappassammi naung battu ri sallika kamma-kamma anne, na kinampa tappa' ri Ia.

⁴³ Na patappaki Allata'ala, siagang Nakanai KalenNa Ana'Na Allata'ala. Jari umbamo niciniki kamma-kamma anne, maka ero' tojenji Allata'ala ampasalamaki.”

⁴⁴Anjo paella' Naaganga nisalli', amminawang turu' tommi anghina-hinai Isa.

⁴⁵Ri tangngana alloa, kira-kira tallung tette', a'jari sassammi sikontu pa'rasanganga.

⁴⁶ Tette' tallu ri karuenga, ammarrang lompomi Isa Nakana, “Eli, Eli, lama sabakhtani?” battuanna, “O, Allata'alaKu, O, Allata'alaKu, angngapa naKibokoiA'?”

⁴⁷Nalangngere'na tau niaka anjoreng akkio' kamma Isa, angkanami ke'nanga, “Nakioki Na'bi Elia!”

⁴⁸ Nia'mo kalase'renna ke'nanga akkaro-karo mange angngalle bunga batu karang, nampa napantama' ri anggoro' kaccia; nampa napasappi' ri cappa' kayu la'bua, na napanai' napa'reppese' mae ri bawaNa Isa.

⁴⁹Mingka nia'mo maraenganga angkana, “Tayangi rolong sinampe'. Umba na niciniki, maka battu tojenji Na'bi Elia ampasalamaKi?”

⁵⁰Ammarrang lompomi pole Isa, nampa tappu' nyawaNa.

⁵¹ Anjo wattua sinre'mi gordenga lalang ri Balla'Na Batara, ta'bage rua battu rate sa'genna naung. Ta'ge'goso'mi buttaya, siagang ta'bage ruami bulu' batua.

⁵²Tassungkemi kuburuka, siagang jaimi tau mate umma'Na Allata'ala nipattallasa' poleang.

⁵³Assulu'mi ke'nanga battu ri jeraka ri wattunna attallasa' poleang Isa battu ri kamateanga, nampa antama' ke'nanga ri Yerusalem. Na jai tau anciniki ke'nanga anjoreng.

⁵⁴Malla'mi komandanna surudadua siagang sikamma surudadu niaka anjagai Isa, ri wattunna nacini' ta'ge'goso' buttaya siagang yangasenna anjo kajarianga. Nakanamo ke'nanga, “Ma'nassa Ana'Na tojeng Allata'ala anne Taua!”

⁵⁵ Jai todong tu baine anjoreng, ancini' battu bellai anjo kajarianga. Ia ngaseng minjo ke'nanga le'baka amminawang siagang ambantui Isa appakkaramula battu ri Galilea.

⁵⁶Nia' tommi anjoreng Maria Magdalena, Maria amma'na Yakobus siagang Yusuf, kammayatompa anrong ana'-ana'na Zebedeus.

⁵⁷Anjo bangngia nia'mo se're tau kalumanynyang battu ri Arimatea niarenga Yusuf, ana' gurunNa todong Isa.

⁵⁸A'lampai andallekang ri Pilatus, na napala' maya'na Isa. Na parentakammi Pilatus sollanna nisareang anjo maya'Na Isa.

⁵⁹Naallemi Yusuf anjo mayaka nampa naroko' kaeng lenang beru.

⁶⁰Nampa naerang anjo maya'Na Isa mange natarawang ri jera' napareka kalenna. Anjo jeraka lalangi ri bulu' batua nipare'. Le'baki napantama' maya'Na Isa, nagulungimi batu lompo nampa natongko' pakke'bu'na anjo jeraka, nampa a'lampa.

⁶¹Mingka Maria Magdalena siagang Maria se'rea, ammantangiji ammempo andallekangi anjo jeraka.

⁶²Ammukona, ri allo Pammari-marianga, a'lampami imang-imang kapalaya siagang tu Farisia mange andallekang ri Pilatus.

⁶³ Na angkana ke'nanga, “Nau'rangi ikambe angkanaya ri wattu attallasa'na anjo patipua le'baki angkana, ‘Ri makatalluna alloa lattallasa' poleangA'.’

⁶⁴Jari suro jagai baji'-baji' anjo jeraka sa'genna tallungalloa, sollanna tena nabattu ana'-ana' gurunNa allukkaki maya'Na, nampa nakabarrang angkana attallasa' poleammi battu ri kamateanga. Na anne pannipuang ri boko dudua lakodiangangi na pannipuang rioloa.”

⁶⁵Nakanamo Pilatus ri ke'nanga, “Nia' surudadu pangawala'nu. A'lampamako suro jagai baji'-baji'anjo jeraka.”

⁶⁶A'lampami ke'nanga mange ri jeraka. Najarrekimi ke'nanga anjo batu pannongko'na jeraka. Nampa nasuro surudadua a'jaga ri dallekanna anjo jeraka, sollanna tena tau angkaccaki.