Read Makassar Version – KITTA' MATANGKASA MATIUS 28 Bible Online

MATIUS 28 - Makassar Version – KITTA' MATANGKASA bible

MATIUS 28

¹Allalonamo allo Pammari-marianga, iamintu ri allonna Minggua, ri bari'basa' dudua, a'lampami Maria Magdalena siagang Maria maraenganga, mange assiara ri jera'Na Isa.

²Ti'ring ta'ge'goso' sanna'mi buttaya. Nampa nia'mo malaeka'Na Batara manaung battu ri suruga mange anggulungi assulu' anjo batu antongkokiai jera'Na Isa, nampa nai' ammempo ri tompo'na anjo batua.

³Accayai rupanna nicini' anjo malaekaka kamma kila', na pakeanna sanna' sikali kebo'na.

⁴Annekkere'mi anjo sikamma surudadu a'jagaya napakamma malla', sa'genna pi'lasa' ngaseng tanja'na kamma tau matea.

⁵Nakanamo anjo malaekaka ri anjo bai'-bainea, “Teako mallakki! Kuassengi angkanaya Isa, le'baka nisalli', battu nuboya.

⁶Mingka tenami anrinni. Nasaba' attallasa' poleammi situru' kananNa pirangalloang. Mae mako na nucini' le'ba' pammantanganNa.

⁷A'lampamako linta' mange ampauangi ana'-ana' gurunNa angkanaya, ‘Atallasa' poleammi battu ri kamateanNa, na kamma-kamma anne a'lampa riolomi mange ri Galilea. Anjoremmi sallang lanucini'!’ U'rangi laloi anne kupabattua.”

⁸Akkaro-karomi anjo bai'-bainea a'lampa ambokoi anjo jeraka. Sanna' malla'na ke'nanga, mingka sanna' todong rannuna ngaseng nyawana. Larimi ke'nanga mange ampabattui ri ana'-ana' gurunNa Isa.

⁹Ti'ring nia'mi Isa ampappicinikangi KalenNa ri anjo bai'-bainea, siagang angkanami, “Salama'!” A'reppese'mi ke'nanga mange ero' anrakaki bangkenNa siagang ansombai Isa.

¹⁰Nakanamo Isa ri ke'nanga, “Teako mallakki, a'lampamako mae ri sikamma sari'battangKu na nupauang sollanna a'lampa ke'nanga mange ri Galilea; anjorempA' sallang nacini' ke'nanga.”

¹¹Lalang a'lampana anjo bai'-bainea, nia'mo siapa are Surudadu a'jagaya ri jeraka, ammotere' ri kotaya. Mangei nalaporo' ke'nanga ri imang-imang kapalaya sikamma anjo apa le'baka kajariang.

¹²Sipa'bicarami anjo imang-imang kapalaya siagang pamimping-pamimpinna tu Yahudia. Assikongkolo'mi ke'nanga, nampa nasare doe' sijaiang anjo Surudadu a'jagaya.

¹³Siagang napasammi ke'nanga angkanaya, “Paui ri taua angkana battui ana'-ana' gurunNa allukkaki maya'Na ri bangngia ri wattunnu attinro ngaseng.

¹⁴Na punna nalangngere' Pilatus anne passalaka, ikambepa anynyonyoki sollanna tena nunia' anggappa susa.”

¹⁵Naallemi Surudadu pajagaya anjo doeka, na nagaukang anjo apa nipappasanganga ri ke'nanga. Lanri kammana minjo natassiara'mo anjo caritaya ri tangnga-tangngana tu Yahudia sa'genna anne alloa.

¹⁶ A'lampami mange se'reang bonto ri Galilea asse're ana'-ana' gurunNa Isa, situru' le'baka Napappasangang Isa ri ke'nanga.

¹⁷Nacini'na ke'nanga Isa anjoreng, su'ju'mi ke'nanga anynyomba ri Ia. Mingka nia' todong ri ke'nanga bata-bata.

¹⁸A'reppese'mi Isa ri ke'nanga, na Nakana, “Sikontu koasaya, ri suruga siagang ri linoa le'ba' ngasemmi nipassareang ri Nakke.

¹⁹ Jari a'lampamako mange ri sikontu bansaya ri lino, pa'jarimi ke'nanga ana'-ana' gurungKu. Je'neki ke'nanga lalang arenNa Manggea, siagang Anaka, kammayatompa RohNa Allata'ala.

²⁰Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”