Read Makassar Version – KITTA' MATANGKASA MATIUS 5 Bible Online

MATIUS 5 - Makassar Version – KITTA' MATANGKASA bible

MATIUS 5

¹Wattunna Nacini' Isa anjo tau jaia, nai'mi ri se'reang bonto. Ammemponamo, battu ngasemmi ana'-ana' gurunNa a'reppese'.

²Appakkaramulami Naajara' ke'nanga:

³“Mate'nei tau tanjenga ri Allata'ala lanri naassenna kalenna tau tena kullena; nasaba' iami a'jari umma'Na Allata'ala!

⁴ Mate'nei tau susaya pa'mai'na; nasaba' iami lanisaleori ri Allata'ala!

⁵ Mate'nei tau tuna pa'maika; nasaba' iami langgappai apa le'baka Napa'janjiang Allata'ala!

⁶ Mate'nei tau attojeng-tojenga ero' anggaukangi ero'Na Allata'ala; nasaba' iami lanipasukku' tallasa'na ri Allata'ala!

⁷Mate'nei tau mangngamaseanga ri paranna tau; nasaba' iami lanikamaseang todong ri Allata'ala!

⁸ Mate'nei tau lambusu' pa'maika; nasaba' iami langngassengi Allata'ala!

⁹Mate'nei tau mappasiamaka paranna tau; nasaba' iami laniakui ri Allata'ala a'jari ana'-ana'Na!

¹⁰ Mate'nei tau nisessaya lanri nagaukanna ero'Na Allata'ala; nasaba' iami a'jari umma'Na Allata'ala!

¹¹ Kate'neangi punna nicallako, yareka nisessako siagang nipassalako passabakkang iNakke.

¹² Kasukkurangi siagang karannuangi, nasaba' lompoangangi pahala lanutarimaya sallang battu ri Allata'ala. Kamma tomminjo batena nisessa na'bi-na'bi le'baka battu rioloangannu.”

¹³ “Ikau ngasemmi rapang ce'lana anne linoa. Punna la'bamo ce'laya, maka lakkulleiji nipa'jari ce'la poleang? Ma'nassa tenamo matu-matunna, passangalinna nipela' mami na nionjo'-onjokang ri taua.

¹⁴ Ikau ngasemmi rapang singara'na anne linoa. Kota niaka irate ri bontoa takkulleai nicokko.

¹⁵ Tenanniakka tau apparinra lampu nampa natongko' katoang. Passangalinna naboliki irate ri pa'dongkokanna, sollanna nasingari ngasengi tau niaka lalang balla'.

¹⁶ Kamma todong minjo alarapanna singara'nu, parallui accaya ri dallekanna tau jaia; sollanna nacini' gau' baji'nu, na napakala'biri' Allata'ala Manggenu niaka ri suruga.”

¹⁷“Teako sala pahang kanukana battuA' assuro pelaki atorang agama napabattua Musa siagang napangngajarranga na'bi-na'bia. Tena naKubattu assuro pelaki, passangalinna eroki Kupakasingara' battuanna sitojennaya.

¹⁸ U'rangi laloi! Angkanaya lalang nia'na ija langika siagang linoa, manna se're hurupu' yareka titti' kaminang ca'dina anjo atorang agamaya tena sikali lanipela' punna tenapa na'rupa ngaseng!

¹⁹Lanri kammana, inai-nai andakkai kalase'renna anjo parentaya, manna nakaminang ca'diaja, nampa naajara' todong paranna tau a'gau' kamma, iaminjo taua la'jari kaminang ca'di ri umma'Na Allata'ala. Mingka inai-nai anturuki anjo sikamma parentaya, nampa naajara' todong paranna tau anggaukangi, iaminjo taua sallang la'jari malompo ri umma'Na Allata'ala.

²⁰Jari u'rangi anne: Takkulleako a'jari umma'Na Allata'ala, punna tena nabajikangang batenu anggaukangi ero'Na Allata'ala naanjo guru-guru agamaya siagang tu Farisia!”

²¹ “Nuassemmi apa le'baka nipangngajarrang mange ri boe-boeta riolo angkanaya: Teako ammunoi; inai-nai ammuno, musti laniadeli.

²²Mingka anne kamma Kukana ri kau ngaseng, inai-nai larro ri paranna tau, laniadeli sallang; siagang inai-nai ampali'boi paranna tau musti niadeli ri dallekanna Pangadelang Agamaya. Siagang inai-nai ampakkanai paranna tau, ‘Tolo,’ siratangi nipela' antama' ri pepe'na narakaya.

²³Lanri kammana, punna nia' kalase'rennu sitabang angngerangi koro'bang sukkuru'nu mae ri Allata'ala, na nuu'rangi angkanaya nia' parannu tau pa'risi' pa'mai' ri kau,

²⁴bokoi rolong anjo koro'bannu, nunampa mange assibajiki siagang anjo taua. Punna le'ba' mako assibajiki, nampa mako ammotere' mange ampassareangi anjo koro'bannu mae ri Allata'ala.

²⁵Ebara'na nia' tau antuntukko mange ri pangadelanga, assibajiki memang mako lalang nia'na ija wattu, lalang tenanapa nubattu mange ri pangadelanga. Nasaba' punna tenapa nussibajiki nanubattu mange ri pangadelanga, tena tanapassareannu anjo taua mange ri hakinga; nampa hakinga ampassareangko mange ri pulisia; nampa napantamakko pulisia ri tarungkua;

²⁶Na u'rangi angkanaya: Ma'nassa takkulleako assulu' battu ri anjo tarungkua punna tena nalappasa' ngaseng inrang nipassalanu.”

²⁷ “Nuasseng ngaseng tommi pangngajarang angkanaya: Teako a'gau' salimarri.

²⁸Mingka anne kamma Kukana ri kau ngaseng: Inai-nai accini' baine nabattumo cinnana a'gau' salimara', a'gau' salimara'mi siagang anjo bainea ilalang ri nyawana.

²⁹ Punna passala' mata kanannu nudoraka, kocciki assulu' anjo matannu nampa nupela'! Nasaba' bajikangangi tappelaka anjo mata kanannu, naia punna nipasambilako sibatu kale antama' ri naraka.

³⁰ Punna passala' lima kanannu nudoraka, tattaki anjo lima kanannu nampa nupela'! Nasaba' bajikangangi tappelaka anjo lima kanannu, naia punna antamakko sibatu kale ri naraka.”

³¹ “Nia' todong pangngajarang kammaya anne: Inai-nai antallaki bainenna, parallui nasare sura' talla'.

³² Mingka anne kamma Kukana ri kau ngaseng: inai-nai antallaki bainenna pantaranganna passabakkang a'gau' salimara', iami a'jari saba' na'gau' salimara' anjo bainenna, punna a'bunting poleang anjo bainenna siagang bura'ne maraeng. Na inai-nai bura'ne ambuntingi anjo bainea, tappinawang tommi a'gau' salimara' siagang anjo bainea.”

³³ “Nuasseng ngasemmi angkanaya nia' pangngajarang ri boe-boeta kammaya anne: teako takkaluppai ri janjinnu. Apa le'ba' nupa'janjiang siagang assumpa ri dallekanNa Allata'ala, parallui nupa'rupa.

³⁴ Mingka anne kamma Kukana ri kau ngaseng: tea' laloko assumpai. Teako assumpai lanri langika, nasaba' anjo langika empoang kala'biranNa Allata'ala;

³⁵ yareka lanri buttaya, nasaba' anjo buttaya pa'dongkokang bangkenNa Allata'ala; yareka lanri Yerusalem, nasaba' anjo kotaya, kota kalompoanNa Karaenga.

³⁶Tea tongko assumpai lanri ulunnu, nasaba' takkulleako ampa'jari keboki yareka ampa'jari le'lengi uu'nu manna silawara'.

³⁷Jari angkana mako bawang ‘Iyo’ punna iyo, yareka ‘Tena’ punna tena. La'biangang na anjo, pangngajara'na mami billisika.”

³⁸ “Nuasseng ngaseng tommi angkanaya nia' pangngajarang kammaya anne: mata nisambei mata; gigi nisambei gigi.

³⁹Mingka anne kamma Kukana ri kau ngaseng: teako appasibalasaki gau' kodi mange ri tau le'baka a'gau' kodi ri kau. Passangalinna punna nia' antempaka'rangi pilisi' kanannu, boli'mi kamma natempaka'rang todong pilisi' kairinnu.

⁴⁰Na punna nia' antuntukko mae ri hakinga ri pangadelanga lanri eroki naalle bajunnu, sareang tongi lipa'nu.

⁴¹Punna nia' tummarenta ampassako angngerangangi barang-baranna se're kilometere' bellana, erangangi rua kilometere' bellana.

⁴²Punna nia' tau appala' apa-apa ri kau, sare laloi. Siagang teako pattenangi tau eroka angnginrang apa-apa ri kau punna nia'ja ri kau.”

⁴³ “Nuasseng ngasemmi angkanaya nia' todong pangngajarang kammaya anne: kamaseangi agannu na nukabirisi balinnu.

⁴⁴Mingka anne kamma Kukana ri kau ngaseng: kamaseangi sikontu balinnu siagang pappala' doangangi tau assessayako,

⁴⁵sollannu a'jari ana'-ana'Na Allata'ala Manggenu ri suruga. Nasaba' Napammumbai alloNa Allata'ala sollanna nasiori ngaseng rupataua, baji' natau a'gau' bajika kammayatompa tau a'gau' kodia. Kammayatompa Napaturungi bosiNa Allata'ala sollanna natuju ngaseng rupataua, baji' natau a'gau' bajika kammayatompa tau a'gau' kodia.

⁴⁶Nasaba' punna iaji bawang tau angkamaseangako nukamaseang, apa paralluna Nabalasa' Allata'ala anjo panggaukannu? Sai manna parentea angngasseng tonji anggaukangi kammaya anjo?

⁴⁷Na punna agannuji bawang nujamakki, apa la'bina kabajikannu? Kamanna tau kapereka nagaukang tonji kammaya.

⁴⁸ Ia Allata'ala Manggenu ri suruga sukku' Nakamaseangi sikontu rupataua. Jari parallui nukamaseang todong parannu tau.”