Read Makassar Version – KITTA' MATANGKASA MATIUS 6 Bible Online

MATIUS 6 - Makassar Version – KITTA' MATANGKASA bible

MATIUS 6

¹ “U'rangi, teako gaukangi apa napassuroanga agamanu ri dallekanna tau jaia, lanri ero'nu ampappiassengangi ri tau jaia. Punna kamma anjo batenu appanggaukang, mattantu tena nulanggappa pahala battu ri Allata'ala Manggenu niaka ri suruga.

²Jari, punna assareko passidakka mange ri tau kasi-asia, teako pau-paui mange ri tau maraenga, sangkamma sarroa nagaukang tau munapeka ri balla' sambayanga yareka ri tangngana aganga, lanri eroki nipalece ri taua. U'rangi angkanaya ia tommi anjo pappalecea a'jari pahalana ke'nanga. Pantaranganna anjo pappalecea tenamo pahala maraeng lanagappa.

³Mingka ikau ngaseng, punna assareko passidakka, teako paui ri tau maraenga sollanna tena tau maraeng angngassengi anjo passidakkanu.

⁴Boli'mi kamma na Allata'ala Manggenu ri suruga bawang anciniki siagang angngassengi anjo passidakkanu. Iami sallang assareko pahala lanri assarenu passidakka.”

⁵ “Punna assambayangko, teako sangkammai tau munapeka. Anjo ke'nanga nangai ammenteng assambayang lalang ri balla' sambayanga, yareka ri panyingkulu'na aganga, lanri eroki nicini' ri tau jaia. U'rangi angkanaya iatommi anjo pahalana ke'nanga punna nicini'mo ri tau jaia assambayang. Pantaranganna anjo, tenamo pahala maraeng lanagappa ke'nanga.

⁶Jari, ikau punna erokko assambayang, antamakko ri bili'nu nampa nutongko' pakke'bu'nu, nunampa assambayang ri Allata'ala Manggenu, tenaya naniciniki. Na Manggenumi anciniki anjo sambayannu nugaukanga ri pammantangang taccokkoa. Iami sallang lassareko pahala lanri anjo sambayannu.[2]

⁷Na punna assambayangko, tea' mako la'bu dudui bicarannu, sangkamma tau kapereka. Nasaba' napikkiriki anjo tau kapereka angkanaya punna la'bu sambayanna, iaminjo lanitarima ri Allata'ala.

⁸Teako kau appakammai anjo batenu assambayang. Kale'ba' Naasseng riolomi Allata'ala parallunu ri tenanapa nuppala'.

⁹Jari, punna erokko assambayang pakammaminne batenu: ‘O, Manggea ri suruga: IKattemi Allata'ala Tenaya Ruanna Poro iKatte nisomba siagang nipakala'biri'.

¹⁰IKattemi Karaenna ikambe. Poro iKattemi ammarenta ri lino, na nituruki erotTa ri lino kamma ri suruga.

¹¹Kisarei ikambe anne alloa apa naparalluanga ikambe.

¹²Kipammopporangi dosa-dosana ikambe, Sangkamma napammopporammi ikambe tu salaya ri kalenna ikambe.

¹³TeaKi' balang parekangi ikambe nibeta ri paccobaya passangalinna Kipakabellai ikambe battu ri maja'dalaka [IKattemi Karaeng makoasaya siagang kaminang mala'birika satunggu-tungguna. Aming!]’

¹⁴ Punna nupammopporang tu kasalanga ri kalennu, Napammopporang tongi Allata'ala Manggenu ri suruga dosanu.

¹⁵Mingka punna tena nupammopporangi parannu tau, tena todong Napammopporangi Allata'ala Manggenu ri suruga dosanu.”

¹⁶“Punna appuasako, teako pinra-pinrai tanja'nu a'jari susa, kamma tau munapeka. Anjo tau munapeka nangai napinra-pinra tanja'na a'jari kamma tau susa punna appuasai, lanri ero'na niasseng ri taua angkanaya appuasai. U'rangi angkanaya ia tommi anjo pahalana ke'nanga punna niassemmo ri taua angkanaya appuasai. Pantaranganna anjo tenamo nalanggappa pahala maraeng ke'nanga.

¹⁷Mingka ikau ngaseng, punna appuasako, pira'nyuki rupannu siagang a'jangka baji'-bajikko,

¹⁸sollanna tena naassengi tau maraenga angkanaya appuasako; passangalinna Manggenu bawang ri suruga angngassengi. Na iaminjo Manggenu ri suruga lassareko sallang pahala lanri appuasanu.”

¹⁹ “Teako pa'barang-barangang bawang nupasse're ri lino. Nasaba' pa'barang-baranganga ri anne linoa akkullei nakanre kacoa', siagang bu'bu', yareka akkullei nilukka' ri palukkaka.

²⁰Jari appasse're mako pa'barang-barangang lanueranga mange ri suruga. Nasaba' ri suruga, tena kacoa' siagang bu'bu' langkanrei anjo pa'barang-baranganga, yareka tena palukka' akkulle allukkaki.

²¹Lanri kemae ammantang pa'barang-barangannu, anjoreng tommi ta'dongko' nyawanu.”

²²“Anjo mataya rapangi sulo ri batangkalea. Punna tangkasaki siagang corai matannu, singara' ngaseng tommi antu sikontu batangkalennu.

²³Mingka punna ra'masaki matannu, sassang ngaseng tommi antu sikontu batangkalennu. Jari punna sassammi lampu niaka ri kalennu, tamakami sassang makkappu'na anjo sassanga!”

²⁴“Takkulleai se'rea tau ampa'jari atai kalenna mae ri ruaya karaeng. Nasaba' nia' lanangai, nania' latanajampangia kananna. Yareka la'bi a'dakkikangngangi mae ri se'reanga na maraengannaya. Ikau kamma tommako anjo. Takkulleako lampa'jari atai kalennu mae ri Allata'ala, punna nupa'jari ata todong kalennu mae ri pa'barang-baranganga.

²⁵Lanri kammana, u'rangi laloi anne; teako ranggaselai ri passala'na katallassannu. Angkanaya apa lanukanre siagang apa lanuinung, kammayatompa apa lanupake ri batangkalennu. Sai la'bi paralluangangi anjo tallasaka naanjo kanrea? Siagang anjo batangkalea naanjo care-carea?

²⁶Cini' sai anjo jangang-janganga ri panri'bakkanna. Tena nangngasseng a'lamung-lamung, tena nakkatto, kammayatompa tena nammoli' wassele' lamung-lamung ri pammoli'-molikanna. Mingka manna nakamma mamo, niparakai tonji ri Manggenu niaka ri suruga. Sai lompoangangi anggarannu nasikamma anjo jangang-janganga?

²⁷Maka inaika akkulle antambai umuru'na manna sike'de' lanri ranggaselana?

²⁸Kammayatompa, angngapa nuranggasela lanri care-carenu? Cini' sai antekamma tallasa'na anjo bunga-bunga rosia attimboa ri paranga. Anjo bunga-bungaya tena nakkulle anjama siagang tena nattannung;

²⁹ u'rangi sai antekamma kalumanynyanna anjo Karaeng Salomo, mingka tenapa nabajikangang pakeanna naanjo bunga-bungaya!

³⁰Anjo ruku'-ruku' niaka ri paranga, attimboi anne alloa nammuko lanitunui sa'genna cappu'. Mingka manna nakamma, nipipakei tonji ri Allata'ala anjo ruku'-rukuka sa'genna ga'ga nicini'. Jari la'biangampa pole ikau! Tena tanipipakeinu! Mingka sayanna kakurang tappakko!

³¹Jari tea' mako bata-batai angkanaya, ‘Apamo lanikanre’, yareka ‘apamo laniinung’, yareka ‘apamo lanipake’?

³²Tau tenayaji natappa' ri Allata'ala tuli angngondang dudui sikammaya anjo. Sikontutojenna le'ba' Naasseng memanji Manggenu ri suruga, angkanaya nuparalluang ngasengi anjo sikammaya.

³³Jari, boyami la'bi riolo antekamma nasollanna Allata'ala ammarenta lalang ri katallassannu, siagang nanugaukang ero'Na. Na sikontu anjo kaparalluannu maraenganga laNasare tonjako Allata'ala.

³⁴Lanri kammana, tea' mako bata-batai ri passala'na lanukaparalluanga ammuko, nasaba' untu' ammukoa nia' todong bata-batana. Anne alloa angga'nami lanukasusanga, tea' mako tambai ba'lalo susanu.”