Read Makassar Version – KITTA' MATANGKASA MATIUS 8 Bible Online

MATIUS 8 - Makassar Version – KITTA' MATANGKASA bible

MATIUS 8

¹Naungi Isa battu ri bontoa, najaimo tau ampinawangi.

²Anjo wattua nia' tommo se're tau garring sala battu akkulantu' ri dallekanNa Isa angkana, “O, Bapa', punna Kierokangi akkulleKi' amballeia' ku'jari baji' ri garringku.”

³Naangka'mi limanNa Isa naNajama anjo tau garring salaya, na Nakana, “Kuerokangi, a'jari baji' mako!” Apaji nammari memammo silalonna garrinna anjo taua.

⁴ Le'baki anjo Nakanamo pole Isa ri anjo taua, “U'rangi! Tea' laloko caritai anne kajarianga manna pole ri nai. Mingka a'lampamako mange ri imanga, na nusuro paressa kalennu ri ia. Le'baki anjo, a'lampamako mange assare koro'bang situru' napassuroanga Musa; iaminjo a'jari butti ri taua angkanaya ma'nassa baji' mako ri garrinnu!”

⁵Ri wattunna battu Isa ri Kapernaum, nia'mo se're perwira surudaduna Roma mange ambuntuli, ero' appala' tulung.

⁶Nakanamo anjo perwiraya, “O, Bapa', garringi pajamaku ri balla'. Sanna'mi sessana, attinro mami rate ri katinroanga lanri peso'mi.”

⁷Nakanamo Isa, “ErokKa' a'lampa mange amballei, sollanna a'jari baji'.”

⁸Mingka appialimi anjo perwiraya nakana, “Tea' maKi' mangei ri ballakku Bapa'. Nasaba' tena nakusiratang Kibattui ri ballakku. Kiparentakang mami bawang, ma'nassa la'jari baji'mi antu pajamaku.

⁹Nasaba' manna inakke amminawang turu' tonja' ri parentana komandang irateangangku. Irawangangku nia' todong siapa are kupimping surudadu, amminawang turuka todong ri parentaku. Punna nia' surudadu kusuro angkana, ‘A'lampako,’ tena ta'lampana. Yareka punna kukana ri maraenganga, ‘Maeko anrinni,’ tena tabattuna mae; kammayatompa punna kuparenta tunisuro-suroku angkana, ‘Gaukangi anne!’ tena tanagaukanna anjo kupassuroanga.”

¹⁰Nalangngere'na Isa kananna anjo perwiraya, teaimi sipato' lannasa'na. Nakanamo ri sikamma tau niaka amminawang ri Ia, “Teai sipato' anne taua. Tenanniakkapa le'ba' Kubuntulu' tau lompo kammaya anne tappa'na ri alla'na tu Israel!

¹¹ Memang, jai tau lania' battu iraya siagang battu ilau' ero' a'rannu-rannu siagang Abraham, Ishak, siagang Yakub, lalang ri Lino BeruNa Allata'ala.

¹² Padahala' tau siratanga a'jari umma'Na Allata'ala nipelaki assulukang ri sassanga. Anjoremmi ke'nanga langngarru' siagang langkasiaki sessaya.”

¹³Le'baki anjo Nakanamo Isa mange ri anjo perwiraya, “Ammotere' mako mange ri balla'nu, a'jarimi antu apa nukatappakia.” Naanjo wattua baji' memammi ri garrinna pajamana anjo perwiraya.

¹⁴A'lampami Isa mange ri balla'na Petrus. Narapikammi matoang bainena Petrus garring rammusu' irate ri katinroanga.

¹⁵Najamami Isa limanna anjo tau garringa, sa'genna ammari memang silalonna garrinna. Ambangummi nai', nampa mange allayani Isa.

¹⁶Ri wattunna appakkaramulamo karuenga, jaimi tau nisoso' ri setang nierang mange ri Isa. Naporo sibukuji bawang kana Napau Isa naNabongkamo assulu' anjo setang-setanga battu ri yangasenna anjo tunisosoka ri setang, kammayatompa naNaballei ngaseng tommo sikontu tau garringa.

¹⁷ Lanri Nagaukanna ngasemmo Isa anjo sikammaya, a'rupami apa le'baka napau Na'bi Yesaya angkanaya, “Natanggongi sikontu pa'risitta siagang Napammolei sikontu garrinta.”

¹⁸Jai sikali tau antammulili Isa. Nacini'na ngaseng Isa ke'nanga, Nasuromi ana'-ana' gurunNa a'lampa a'limbang ri tamparanga.

¹⁹Nia'mo sitau guru agama battu mae ri Ia angkana, “O Pa' Guru, erokka' amminawang ri Katte, manna pole a'lampa kemae!”

²⁰Appialimi Isa Nakana, “Kongkong romanga nia' pammantanganna; kammayatompa jangang-janganga nia' ru'munna. Mingka Ana' Ma'rupataua manna laNapappadongkoki ulu tena todong.”

²¹Nia'mo pole ana' gurunNa maraenga angkana, “O Bapa', Kisarea' rolong kasampatang ammotere' antarawangi maya'na manggeku.”

²²Mingka appialimi Isa Nakana, “Amminawang mako ri Nakke; lappassang tommi tau matea nanatarawang tau matena.”

²³Naiki Isa ri biseanga, namminawang ngaseng todong ana'-ana' gurunNa.

²⁴Ti'ring battumi anging puttusu' sannaka lompona antujui tamparanga, sa'genna nitunrummi ri bombang anjo biseanga. Na anjo wattua attinroi Isa.

²⁵Battumi ana'-ana' gurunNa akkiok-kio' anronrongi nakana, “Bapa', natujuki' bala, tulungi ana'-anatTa!”

²⁶Nakanamo Isa, “Angngapa numalla' kamma ngaseng? Kurang tappakko ri Nakke?” Nampa ammenteng Isa, naNaga'gara' anjo anginga siagang tamparanga. Sa'genna sannang sikalimo anjo tamparanga.

²⁷Lannasa' ngasemmi ana' gurunNa Isa. Nakanamo ke'nanga, “Tau apamo anne kutaeng? Kamanna anginga siagang bombanga amminawang turu' todong ri parentaNa!”

²⁸Battui Isa ri ba'leanna tamparanga, ri daera Gadara. Anjoreng nia'mo rua tau nasoso' setang battu mae ri Ia. Tenamo tau barani a'reppese' mae ri anjo tau ruaya, lanri sekke'na.

²⁹Battu lalangi ke'nanga assulu' ri pa'jerakkanga akkiok-kio' angkana, “E Ana'Na Allata'ala! Apa ero' battu nugaukang ri kambe? Ero' mako battu ansessai kambe, manna tanarapikapa wattunna?”

³⁰Tena nabella battu anjoreng ri tampaka, jai sikali bawi sitabang a'boya kanre.

³¹Napala' dudumi anjo setang-setanga ri Isa angkana, “Punna lanusuroki' assulu' battu lalang ri kalenna anne taua, suromi kambe antama' anjoreng ri bawi-bawia.”

³²Nakanamo Isa, “A'lampamako!” Assulu'mi anjo setang-setanga battu lalang ri kalenna anjo tau ruaya. Nampa a'lette' antama' anjoreng ri bawi-bawia a'lampa mange ambuangi kalenna naung ri tubirika ri tamparanga sa'genna tallang ngaseng.

³³Lari ngasemmi pakalawakinna anjo bawia, mange ri kotaya; nanacarita ke'nanga anjo apa kajarianga, siagang passala'na anjo tau ruaya nasosoka setang.

³⁴Jari a'lampa ngasemmi anjo tau niaka ri kotaya, mae ri Isa. Nabuntulu'namo ke'nanga Isa, napala' dudumi ke'nanga ri Isa sollanna a'lampamo ambokoi anjo daeraya.