Read Makassar Version – KITTA' MATANGKASA MATIUS 9 Bible Online

MATIUS 9 - Makassar Version – KITTA' MATANGKASA bible

MATIUS 9

¹Nai'mi Isa ri biseanga, nampa a'limbang anta'leang ammotere' mange ri kamponNa.

²Battuna mange anjoreng, nia'mo se're tau peso' nierang rate ri katinroanga mae ri Isa. Nacini'na Isa antekamma lompona tappa'na ke'nanga, Nakanamo ri anjo tau pesoka, “Sa'barakko na'! Nipammopporammi dosa-dosanu.”

³Anjo wattua nia' todong siapa are guru-guru agama anjoreng. Nakanamo lalang nyawana anjo guru-guru agamaya, “Anne taua nahinai Allata'ala!”

⁴Na anjo nawa-nawanna ke'nanga Naassengi Isa. Jari Nakanamo Isa ri ke'nanga, “Angngapa naja'dala' kamma batenu ngaseng appikkiri'?

⁵Kereanga la'bi gampang: angkanaya ‘Nipammopporammi dosanu’, yareka angkanaya ‘Ambangungko nai' nu'jappa’?

⁶Mingka kamma-kamma anne erokKa' ampa'buttiangko angkanaya makoasai Ana' Ma'rupataua ampammopporangi dosaya ri lino.” Nampa Nakana Isa ri anjo tau pesoka, “Ambangungko nai', angkaki katinroannu, siagang ammotere' mako!”

⁷Ambangummi nai' anjo tau pesoka, nampa ammotere' mange ri balla'na.

⁸Ri wattunna nacini'mo tau jaia anjo apa kajarianga, malla' ngasemmi ke'nanga; nammuji-mujimo ke'nanga ri Allata'ala, lanri Napa'nyatanamo Allata'ala koasa kammaya lompona mae ri tu linoa.

⁹Le'baki anjo a'lampami Isa ambokoi anjo tampaka. Lalang a'jappaNa, nia'mo Nacini' sitau pasingara' sima niarenga Matius, sitabang ammempo lalang ri kantoro'na. Nakanamo Isa ri ia, “Maeko amminawang ri Nakke!” Ammentemmi Matius nampa amminawang ri Isa.

¹⁰ Ri wattunna angnganre Isa ri balla'na Matius, jaimi pasingara' sima siagang tau nicini' kodia ri tau jaia battu ngaseng todong angngagangi Isa siagang ana'-ana' gurunNa angnganre.

¹¹Nia'mo siapa are tu Farisi anciniki ke'nanga sipangnganreang. Akkuta'nammi anjo tu Farisia ri ana'-ana' gurunNa Isa angkana, “Apa saba'na naNaagang sipangnganreang gurunnu pasingara' simaya siagang tau kodia sipa'na?”

¹²Nalangngere'na Isa pakkuta'nanna ke'nanga, appialimi Isa Nakana, “Tu tenaya nagarring tena naparallu ri dottoro', passangalinna tu garringaji.

¹³ Pappilajarimi apa battuanna niaka nipau lalang ri Kittaka angkanaya: ‘Pangngamaseang Kukaeroki, jari teai koro'bang olo'-olo'’. Nasaba' iaji Kunia' battu lanri tu dorakaya ero' battu Kukio', jari teai tu tojenga.”

¹⁴Le'baki anjo battumi ana'-ana' gurunna Yohanes Paje'ne' mae ri Isa. Akkuta'nammi ke'nanga ri Isa angkana, “Angngapa natappuasaya Katte ana'-ana' gurunTa, na ikambe anne siagang tu Farisia appuasaki'?”

¹⁵Appialimi Isa angkana, “Maka biasai toanaya si'na atinna punna nia' ija bunting bura'nea ri tangnga-tangngana ke'nanga? Antekamma panggappanu? Tantu tena! Mingka lanarapiki sallang wattunna lanialle anjo bunting bura'nea battu ri tangnga-tangngana ke'nanga. Iaminjo wattua nalasi'namo atinna ke'nanga.

¹⁶Tenanniakka tau annampeng baju toamo nakaeng beru ija napatampeng. Nasaba' punna assibeso' anjo baju toaya siagang anjo kaeng beru nipatampenga, tena tapila' a'jari luara'na kekke'na anjo baju toaya.

¹⁷Kammayatompa, tenanniakka tau ammoli' anggoro' beru ri pammantangang lajappokamo. Nasaba' tena tareppe'na anjo pammantanganna, sa'genna tappela'-pela'mo anjo anggoroka. Jari anjo anggoroka musti anjorengi ri pammantangang berua todong niboli', sollanna tuli baji' anjo anggoroka siagang pammoneanna.”

¹⁸Ri wattunna a'bicara Isa siagang ana'-ana' gurunna Yohanes Paje'ne', nia'mo sitau pamimping balla' sambayang battu. Akkulantuki ri dallekanNa Isa nampa nakana, “Silalonna mate ana' baineku. Mingka kuminasaiKi' naKimange ampadongkoki lima, sollanna attallasa' poleang.”

¹⁹Ammentemmi Isa nampa a'lampa siagang ana'-ana' gurunNa amminawang mange ri balla'na anjo taua.

²⁰Ri tangngana aganga, nia'mo sitau baine battu ri boko a'reppese' mae ri Isa. Anjo bainea sampulomi anrua taung garring nalari cera'. Na nakana pikkiranna, “Manna kuseroja bawang jubaNa, akkullema' a'jari baji' ri garringku.” Jari naseromi jubaNa Isa.

²²Anjo wattua assailemi Isa, naNaciniki anjo bainea. Siagang Nakanamo ri anjo bainea, “Sa'barakko na'! Lanri tappa'nu ri Nakke, a'jari baji' mako ri garrinnu!” A'jari baji' memammi silalonna anjo bainea.

²³Le'baki anjo anrapi'mi Isa ri balla'na anjo pamimping balla' sambayanga. Nia'mo nacini' tau assuling-suling kamateyang, kammayatompa jaimi sa'ra gegere' nalangngere'.

²⁴Nakanamo Isa ri ke'nanga, “Assulu' ngasengko! Katena namate anne anaka, mingka attinronaja.” Ammakkala'mi taua angkakkali Isa.

²⁵Mingka assulu'na ngasemmo anjo taua, antama'mi Isa ri kamara'na anjo anaka, naNata'gala' limanna. Ambangummi nai' anjo ana' bainea.

²⁶Alla'bammi anjo kabaraka ri sikontu anjo daeraya.

²⁷A'lampami Isa battu anjoreng ri tampaka. Na ri tangngana aganga, nia'mo rua tau buta ampinawangi. Akkio'-kioki ke'nanga angkana, “O, Ana'na Daud, Kikamaseangi ikambe anne!”

²⁸Ri wattunna antama' Isa ri se'reang balla', battumi anjo ruaya tau buta mae ri Isa. Akkuta'nammi Isa ri ke'nanga Nakana, “Maka nupatappaki angkanaya akkulleko Kubajiki sa'gennu accini'?” Appialimi ke'nanga angkana, “Iye' tappaki ikambe!”

²⁹Jari Najamami Isa matanna ke'nanga siagang Nakana, “Lanri tappa'nu, a'jarimi ri kau apa numinasaia.”

³⁰Apaji nakkullemo accini' ke'nanga. Napakainga' dudumi Isa ke'nanga, sollanna tena napaui ke'nanga anjo kajarianga manna pole ri nai.

³¹Mingka a'lampa tonji ke'nanga napa'la'bang anjo kabara' Nagaukanga Isa ri sikontu anjo daeraya.

³²Ri wattunna a'lampamo anjo tau ruaya, nia'mo pole se're tau pepe siagang nisoso' ri setang nierang mae ri Isa.

³³Nabongkami Isa assulu' anjo setanga battu lalang ri kalenna anjo tau pepea; sa'genna akkulle memammo silalonna a'bicara anjo tau pepea. Lannasa' ngasemmi tau jaia anciniki anjo kajarianga. Nakanamo ke'nanga, “Tena le'bakapaki' accini' kajariang kammaya anjo lalang ri pa'rasangang Israel!”

³⁴ Mingka nakanamo tu Farisia, “Kakapalanaji anjo setanga assarei koasa nakkulle Nabongka assulu' anjo setanga.”

³⁵ Kammaminjo pa'lampanna Isa akkuliling battu ri se'reang kota mange ri kota maraenga; battu ri se'reang kampong mange ri kampong maraenga. Angngajara'mi lalang ri sikamma balla' sambayanga, siagang Napabattumi Kabara' Kasalamakkanga, ri passala' antekamma bateNa ammarenta Allata'ala salaku Karaeng. Naballei ngasemmi tau garringa na'jari baji' ngasemmo. Na anjo tau garringa a'rupa-rupai garrinna siagang kasessanna. Kammayatompa tu sala-salanga nabajiki ngaseng tommi.

³⁶ Na ri wattunna Nacini' ngaseng Isa anjo tau jaia, tu'guru'mi pangngamaseanNa. Lanri sanrapangi ke'nanga gimbala' tappelaka siagang dodonga lanri tenana pakalawakinna.

³⁷ Jari Nakanamo Isa ri ana'-ana' gurunNa, “Jaimi kattoang, mingka sike'de'ji tu lakkatto.

³⁸Jari pala'mi ri patanna tana sollanna nasuro battu pakattona.”