Read Makassar Version – KITTA' MATANGKASA MARKUS 1 Bible Online

MARKUS 1 - Makassar Version – KITTA' MATANGKASA bible

MARKUS 1

¹Iaminne Kabara' Baji' ri passala'na Isa Almasi, Ana'Na Allata'ala.

² Pakkaramulanna anjo Kabara' Bajika sangkammai le'baka natulisi' Na'bi Yesaya angkanaya, “Nakana Allata'ala, ‘Iaminne tunisuroKu; Kusuroi a'lampa rioloanganNu, sollanNu nasungkeang oloang.’

³ Nia' tau akkiok-kio' ri parang lompoa angkana, ‘Pasadiai oloanNa Batara; Lappari ngasengi oloang laNaoloa.’ ”

⁴Sangkamma le'baka tattulisi', nia'mi battu Yohanes ri parang lompoa. Naje'ne'mi taua siagang napabattumi Kabara' battua ri Allata'ala. Nakanamo Yohanes, “Paralluko toba' battu ri dosa-dosanu siagang nije'ne', sollanna Napammopporangko Allata'ala.”

⁵A'lampa ngasemmi tuniaka ri pa'rasangang Yudea siagang kota Yerusalem, mange ampilangngeri Yohanes. Namangakuimi dosa-dosana ke'nanga, nampa nije'ne' ri Yohanes lalang ri Binanga Yordan.

⁶ Na ia Yohanes, bulu unta napare' juba; kukkulu' napare' passikko' aya'; na katimbang siagang bani romang napare' kanre.

⁷Iaminne Kabara' napabattua, nakana, “Ri bokoangangku, nia' tau labattu, lompoanganga na inakke. Manna a'dundua ansungkeangi passikko' sapatuNa tena todong kusiratang.

⁸Inakke je'ne'ji kuje'nekangko, mingka Ia sallang RohNa Allata'ala laNaje'nekangko.”

⁹Anjo wattua nia'mi Isa battu ri Nazaret ri daera Galilea, na nije'ne' ri Yohanes ri Binanga Yordan.

¹⁰Kamma assulu'Na ri binangaya, tassungkemi langika Nacini'; na nia' RohNa Allata'ala naung attompo' ri Ia, sangkamma jangang-jangang bodobangkeng.

¹¹ Nampa nia' sa'ra Nalangngere' iamintu sa'ranNa Allata'ala battu rate ri langika angkana, “IKaumi AnakKu Kukamaseanga. IKaumi nakate'neanga atingKu.”

¹²Le'baki anjo nipalampa memammi Isa ri RohNa Allata'ala mange ri parang lompoa.

¹³Patampulo alloi ammantang anjoreng, niso'ri ri Billisika. Jai olo'-olo' liaraka Naagang sipammantangang; na battumo malaekaka allayani.

¹⁴Nitarungkunamo Yohanes, a'lampami Isa mange ri Galilea ampabattui Kabara' Baji' battua ri Allata'ala anjoreng.

¹⁵ Nakana, “Tasalloami nappakkaramula Allata'ala ammarenta. Toba' mako battu ri dosa-dosanu, siagang tappa' mako ri Kabara' Baji' battua ri Allata'ala!”

¹⁶Ri wattunna a'jappa Isa ri biring Tamparang Galilea, nia' Nacini' rua paboya ri juku', iamintu Simon siagang Andreas andi'na. Sitabangi ke'nanga a'jala juku' ri tamparanga.

¹⁷Nakanamo Isa ri ke'nanga, “Amminawangko ri Nakke. LaKuajarakko a'jari sanrapang pajala tau.”

¹⁸Nabokoi memammi silalonna jalana ke'nanga, nampa amminawang ri Isa.

¹⁹Tulusuki jappaNa Isa, nia'mo pole nacini' rua tau massari'battang, iamintu Yakobus siagang Yohanes ana'-ana'na Zebedeus. Lalangi ri biseanna ke'nanga sitabang ampakabajiki jalana.

²⁰Nikio'mi ke'nanga ri Isa. Na nabokoimo manggena ke'nanga siagang tungnganre gajina lalang ri biseanga. Nampa a'lampa ke'nanga amminawang ri Isa.

²¹Battui Isa siagang ana'-ana' gurunNa ri kota Kapernaum. Ri allo Pammari-marianna poleanga, antama'mi Isa ri balla' sambayanga na appakkaramula angngajara'.

²² Lannasa' ngasemmi sikamma taua allangngereki caraNa angngajara'. Nasaba' lompoi pangaruNa punna angngajaraki. Tena nasangkamma carana guru-guru agamaya.

²³Anjo wattua nia' sitau tu nisoso' ri roh ja'dalaka antama' ri balla' sambayanga. Akkio'-kioki nakana,

²⁴“E, Isa tu Nazaret, apa ero' Nugaukang mae ri kambe? BattuKo ero' anghukkungi ikambe? Kuassengi angkanaya inaiKo antu: iKaumi Tunisuro matangkasaka, battua ri Allata'ala!”

²⁵Niga'gara'mi anjo roh ja'dalaka ri Isa angkana, “A'merekko! Assulukko battu ri anne taua!”

²⁶Naparuntang-runtang sanna'mi roh ja'dalaka anjo taua, nampa ammarrang lompo siagang assulu' battu ri kalenna anjo taua.

²⁷Sikontu taua lannasa' sikalimi anciniki anjo passalaka. Sa'genna massing nakanamo para ia ke'nanga, “Idende' apami kutadeng anne? Iaminne pangngajarang beru! Lanri kakoasanNa siagang kala'biranNa na Nasuro roh-roh ja'dalaka assulu', siagang amminawang turu' anjo roh-roh ja'dalaka mae ri Ia!”

²⁸Linta'mi tassiara' mange-mange kabara'na Isa ri sikontu daera Galilea.

²⁹A'lampami Isa siagang ana'-ana' gurunNa ambokoi anjo balla' sambayanga, nampa mange ri balla'na Simon siagang Andreas. A'lampa tongi Yakobus siagang Yohanes siagang ke'nanga.

³⁰Anjo wattua sitabangi garring rammusu' matoang bainena Simon ri katinroanga. Jari nipauammi Isa ri wattunna antama' ri balla' siagang ana'-ana' gurunNa.

³¹Mangemi Isa anta'galaki limanna anjo matoang bainena Simon, nampa nabantu ambangung. Ammarimi rammusu', siagang appakkaramulami allayani ke'nanga.

³²Karuenna, ri labunamo alloa, naerang ngasemmi taua sikamma tau garringa mae ri Isa siagang sikamma tau nasosoka setang.

³³A'lipummi sikamma tau niaka ri anjo kotaya ri dallekanna anjo ballaka.

³⁴Sanna' jaina tau nisessa ri garring. A'rupa-rupai garrinna ke'nanga. Nampa Naballei ngasemmo Isa ke'nanga, na'jari baji'. Nabongka ngaseng tommi setanga. Na tena Napa'biangi a'bicara anjo setang-setanga, nasaba' niassengi ri ke'nanga.

³⁵Ammukona, ri wattu subuna ija, ambangummi Isa nampa a'lampa ambokoi ballaka. Mangei ri tampa' sino-sinoa ri pantaranganna kotaya. Mangei anjoreng appala' doang.

³⁶Mingka a'lampami Simon siagang agang-aganna mange amboyai.

³⁷Nabuntulu'na, nakanamo ke'nanga, “Yangaseng taua amboyaKi' Bapa'.”

³⁸Mingka appialimi Isa Nakana, “Umba kipatulusuki lampata mange ri kota-kota maraenga, ambania anrinni. Parallu tongA' akkato'ba anjoreng. Nasaba' untu' iaminjo naKubattu mae.”

³⁹ Jari a'lampami Isa a'la'bang ri sikontu Galilea. Akkato'bami lalang ri sikamma balla' sambayanga. Siagang Nabongka ngasemmi setang-setanga battu lalang ri kalenna sikamma tau nisosoka ri setang.

⁴⁰Nia' sitau tau garring sala battu mae ri Isa. Akkulantu'mi anjo taua na nakana, “Punna Kikaerokangi Bapa', akkulleKi' amballeia' ku'jari baji'.”

⁴¹Tu'guru'mi pangngamaseanNa Isa anciniki anjo taua. Jari Nata'gala'mi anjo taua na Nakana, “Kukaerokangi, a'jari baji' mako!”

⁴²Ammari memammi garrinna anjo wattua, na'jari baji'mo anjo taua.

⁴³Nampa Nasuro Isa a'lampa anjo taua. Na Napasang angkana,

⁴⁴ “Jagako, tea' laloko caritai anne passalaka manna pole ri nai. Mingka a'lampamako mae ri imanga assuro paressai kalennu mattantunu baji'mo. Punna le'ba' anjo, a'lampamako assare koro'bang passidakka situru' napassuroanga Musa, lanri a'jari baji'numo. Iaminjo a'jari butti ri taua angkanaya ma'nassa baji' mako ri garrinnu.”

⁴⁵Mingka a'lampaji anjo taua na tuli nacarita mange-mange anjo apa kajarianga. Sa'genna takkulleami Napappicinikang KalenNa Isa punna antama' ri kotaya. Pantaranganna mami kotaya ri tampa' sino-sinoa ammantang. Mingka tuli jaina tau battu ri kere-keremae, battu mae ri Ia.