Read Makassar Version – KITTA' MATANGKASA MARKUS 10 Bible Online

MARKUS 10 - Makassar Version – KITTA' MATANGKASA bible

MARKUS 10

¹Nampa Nabokoi Isa anjo tampaka, Na'lampa mange ri daera Yudea, siagang ri daera ba'leanna Binanga Yordan. Battumi pole tau jaia a'lipung ri tammulilina Isa. Na kamma biasa, Naajara'mi Isa ke'nanga.

²Nia'mo siapa are tu Farisi battu todong ero' ampa'boyangi kasalang Isa. Akkuta'nammi ke'nanga angkana, “Manuru' atoranga ri agamata, maka akkulleji taua antallaki bainenna?”

³Appialimi Isa Nakana, “Apa naparentakangko Musa?”

⁴ Appialimi ke'nanga angkana, “Nakellaiji Musa taua antallaki bainenna, assala' napapparekang rolong sura' talla'.”

⁵Nakanamo Isa ri ke'nanga, “Nanatulisi' Musa anjo parenta kammaya, lanri sukkara'nu ngaseng niajara'.

⁶ Mingka ri pakkaramulanna, ri wattu Napa'jarina Allata'ala rupataua, nipaui angkanaya, ‘Napa'jari Allata'ala ke'nanga bura'ne siagang baine.

⁷ Iaminjo saba'na na lanabokoi anrong-manggena tu bura'nea nampa mange anjari se're siagang bainenna,

⁸jari anjo rupataua anjari se'remi.’ Jari tenamo narua ke'nanga, passangalinna se're mami.

⁹Iaminjo saba'na, na apa le'baka Napa'jari se're Allata'ala, takkulleai napasisa'la rupataua!”

¹⁰Antama'namo ke'nanga ri balla', napakkuta'nangammi ana'-ana' gurunNa Isa anjo passalaka.

¹¹ Nakanamo Isa ri ke'nanga, “Inai-nai antallaki bainenna, nampa a'bunting poleang siagang baine maraeng, a'gau' salimara'mi siagang anjo bainea.

¹²Kamma todong inai-nai baine antallaki bura'nenna, nampa a'bunting siagang bura'ne maraeng, a'gau' salimara' tommi.”

¹³Nia' siapa are tau angngerang ana'-ana' mae ri Isa sollanna Nabarakkaki ke'nanga. Mingka nikalarroimi ke'nanga ri ana'-ana' gurunNa Isa.

¹⁴Nacini'na Isa anjo kammaya, larromi Isa ri ana'-ana' gurunNa. Nakana ri ke'nanga, “Lappassangi anjo ana'-anaka battu mae ri Nakke! Teako pisangkai, nasaba' tau kammaya ngaseng minne a'jaria umma'Na Allata'ala.

¹⁵ U'rangimi anne! Inai-nai tena na'jari sanrapang anne anaka andallekang ri Allata'ala, takkulleai a'jari umma'Na Allata'ala.”

¹⁶Le'baki akkana kamma Isa, Naraka'mi anjo ana'-anaka, nampa massing Napadongkoki lima naNabarakkaki ngaseng ke'nanga.

¹⁷Wattunna Napatulusu' pole lampaNa Isa, nia'mo sitau lari-lari battu mae ri Ia. Su'ju'mi anjo taua ri dallekanNa Isa nampa akkuta'nang nakana, “O Guru baji', apa musti kugaukang sollanna akkulle kugappa katallassang sitojennaya siagang satunggu-tungguna?”

¹⁸Akkuta'nammi Isa Nakana, “Angngapa nukana bajikKa'? Tena tau baji', pantaranganna Allata'ala.

¹⁹ Nuassemmi sikamma parentaNa Allata'ala angkanaya, ‘Teako ammunoi; teako a'gau' assalimarri; teako a'lukkaki; teako assa'bi balle-ballei; teako annipui; pakala'biriki manggenu siagang amma'nu.’ ”

²⁰Nakanamo anjo taua, “Pa' Guru, sikontu anjo parenta kammaya kuturukimi pakkaramula ri wattungku rungka.”

²¹Nacinikimi Isa anjo taua na Nakamaseang. Nampa Nakana ri ia, “Se'repi nuparalluang. A'lampamako ambalukangi barang-barannu; nampa nupassareang doe'na mae ri tu kasi-asia, nanugappa pa'barang-barangang niaka ri suruga. Le'baki anjo ammotere' mako mae numminawang ri Nakke.”

²²Nalangngere'na akkana kamma Isa, la'bami nyawana anjo taua. A'lampami ambokoi anjo tampaka na susa nyawana lanri akkalumanynyang sikali.

²³Nacinikimi Isa ana'-ana' gurunNa, nampa Nakana ri ke'nanga, “Sukkara' sikali tau kalumanynyanga la'jari umma'Na Allata'ala!”

²⁴Lannasa'mi ana'-ana' gurunNa allangngereki anjo apa Napaua Isa. Mingka Nakanamo pole Isa, “Ana'-anakKu, sukkara' memangi taua a'jari umma'Na Allata'ala!

²⁵La'bi lomoangangi sikayua unta antama' ri so'bolo' jarunga kala tau kalumanynyanga antama' ri Lino BeruNa Allata'ala.”

²⁶A'jari lannasa' ngasemmi ana'-ana' gurunNa allangngereki kana-kana kammana Isa. Sa'genna sikuta'-kuta'nammi para ia ke'nanga angkana, “Punna kamma, inaimi lakkulle salama'?”

²⁷Nacinikimi Isa ke'nanga nampa appiali Nakana, “Untu' rupataua tena nantama' ri akkala'; mingka untu' Allata'ala tena takkulle anjari.”

²⁸Nampa nakanamo Petrus, “Cini'mi, ikambe ngaseng le'ba' nibokoimi sikontu apa-apanta lanri untu' amminawang ri Katte Bapa'.”

²⁹Nakanamo Isa, “Patappa'mi angkanaya: inai-nai ambokoimi balla'na, yareka sari'battang bura'nena, yareka sari'battang bainena, yareka amma'na, yareka manggena, yareka ana'-ana'na, yareka tanana siagang kokonna passabakkang Kabara' Baji' battua ri Allata'ala,

³⁰lajaiangangi sallang natarima naia ri kamma-kammaya anne. La'lappi sibilangngangi balla' nagappa, sari'battang bura'ne, sari'battang baine, amma', ana'-ana', tana siagang koko; manna mamo najai passessa nakasia' ri kamma-kammaya anne. Mingka ri jammang labattua sallang, lanagappami katallassang satunggu-tungguna.

³¹ Mingka jai tu ri dallekang kamma-kamma anne, nala'jari tu ri boko dudu sallang. Siagang jai tu ri boko kamma-kamma anne, nala'jari tu ri dallekang dudu sallang.”

³²Sitabangi a'jappa Isa siagang ana'-ana' gurunNa mange ri Yerusalem. Ri dallekangi Isa a'jappa, nalussa' ngaseng ana'-ana' gurunNa. Kammayatompa tau niaka amminawang ri bokoNa Isa malla' ngaseng tommi. Nampa Nakio'mo pole ana'-ana' gurunNa Isa mange anynya'la', na Napauang ke'nanga apa lakajarianga sallang ri KalenNa Isa.

³³Nakana, “Pilangngeri anne; kamma-kamma anne a'lampa maki' mange ri Yerusalem. Anjoreng lanipassareammi Ana' Ma'rupataua mae ri imang-imang kapalaya siagang guru-guru agamaya. Lanihukkung matei, nampa nipassareang mae ri tu kapereka.

³⁴Lanipare' kare'-karenangi ri ke'nanga, nipi'rui, nisessai, nampa nisalli' ri ke'nanga. Mingka ri makatalluna alloa, lattallasa' poleangi.”

³⁵Battumi ana'-ana'na Zebedeus mae ri Isa, iamintu Yakobus siagang Yohanes. Nakana ke'nanga, “O Bapa' Guru, nia' ero' napala' ikambe ri Katte, naporo' akkulle laloja Kigaukang untu' ikambe.”

³⁶Akkuta'nammi Isa Nakana, “Apa nukaeroki laKugaukang ri kau sipa'rua?”

³⁷Appialimi ke'nanga angkana, “Eroki kambe ammempo ri sa'ri kananTa siagang ri sa'ri kairinTa punna ammempoKi' ri empoang kala'biranTa.”

³⁸ Nakanamo Isa ri ke'nanga, “Tanuassengai antu apa nupalaka. Maka lanukulleji angnginung battu ri pangnginungang rassia passessa, laKuinunga? Siagang maka lanukulleji antama' ri pammantangang jaia passessa, laKupantamakkia?”

³⁹Appialimi ke'nanga angkana, “Nakulleji ikambe.” Jari angkanami pole Isa ri ke'nanga, “Langnginung memang jako battu ri pangnginungang rassia passessa laKuinunga. Siagang lantama' tonjako ri pammantangang jaia passessa laKupantamakkia.

⁴⁰Mingka passala' inai lammempo ri sa'ri kanangKu siagang ri sa'ri kairingKu, anjo teai Nakke lampattantui. Allata'ala lampattantui angkana inai-nai lammempo ri anjo tampaka.”

⁴¹Nalangngere'na anjo sampuloa ana'-ana' gurunNa Isa maraenganga, larromi ke'nanga ri Yakobus siagang Yohanes.

⁴² Jari Nakio' ngasemmi Isa ke'nanga, nampa Nakana ri ke'nanga, “Nuassengi angkanaya pamimping-pamimpinga siagang tau malompona bansa tenaya naassengi Allata'ala, najallakkangi ra'ya'na.

⁴³ Mingka takkulleako kau appakamma anjo. Passangalinna inai-nai ero' a'jari tau malompo musti a'jari palayangi ri tangnga-tangnganu.

⁴⁴Mingka inai-nai ri kau ero' a'jari tau ri dallekang dudu, musti napa'jari atai kalenna mae ri sikontu taua.

⁴⁵Nasaba' manna Ana' Ma'rupataua tena Nabattu untu' nilayani. Mingka battui untu' allayani, siagang untu' ampassareangi nyawaNa sollanna akkulle Napasalama' tau jaia.”

⁴⁶Battumi ke'nanga mange ri Yerikho. Na ri wattunna Nabokoi Isa siagang ana'-ana' gurunNa, kammayatompa tau jaia anjo tampaka, nia'mo se're tau buta ammempo appala'-pala' ri biring aganga. Arenna nikana Bartimeus, ana'na Timeus.

⁴⁷Ri wattunna nalangngere' angkanaya Isa battu ri Nazaret anjo numaloa, akkiok-kio'mi nakana, “O Isa, Ana'na Daud! Kamaseanga' kodong!”

⁴⁸Nikalarroimi siagang nisuromi ammakkang ri tau jaia. Mingka pila' akkio' lompomi pole nakana, “O Ana'na Daud, kamaseanga' kodong!”

⁴⁹Ammantammi Isa nampa Nakana, “Kioki mae.” Jari nakio'mi ke'nanga anjo tau butaya. Nakana ke'nanga ri ia, “Sannang mako! Ambangungko nai', Nasuro kiokko Isa!”

⁵⁰Napasambilami jubana anjo tau butaya, nampa akkaro-karo ammenteng na'lampa mae ri Isa.

⁵¹Akkuta'nammi Isa ri ia Nakana, “Apa nukaeroki Kugaukang ri kau?” Appialimi anjo tau butaya nakana, “O Pa' Guru, erokka' accini'.”

⁵²Nakanamo Isa, “A'lampamako, nipakabaji' mako ri tappa'nu.” Anjo wattua accini' memammi silalonna anjo tau butaya. Nampa a'lampa amminawang ri Isa.