Read Makassar Version – KITTA' MATANGKASA MARKUS 11 Bible Online

MARKUS 11 - Makassar Version – KITTA' MATANGKASA bible

MARKUS 11

¹Wattunna a'reppese'mo mange ri Yerusalem, anrapi'mi ke'nanga ri kota Betfage siagang Betania, ri pungku'na Bonto Zaitun. Anjoreng Nasuroi Isa rua ana' gurunNa a'lampa riolo.

²Nakana Isa ri ke'nanga, “A'lampamako mange ri anjo kampong niaka ri dallekannu. Punna antamakko anjoreng ri kamponga nia' lanucini' sikayu keledai rungka tappaukang, tenayapa nale'ba' nibae ri taua. Lappassangi anjo keledaia nampa nuerang mae anrinni.

³Na punna nia' tau akkuta'nang ri kau angkana apa saba'na nanulappassang anjo keledaia, angkana mako, ‘Naparalluangi Batara, siagang lalinta'ji Napoterang.’ ”

⁴A'lampami anjo ruaya ana' gurunNa Isa, nanagappamo anjo ana' keledaia tappaukang ri pakke'bu' balla' ri biring aganga. Nalappassammi ke'nanga anjo ana' keledaia.

⁵Akkuta'nammi ri ke'nanga tau niaka anjoreng ammenteng angkana, “He, apa nupare' antu? Angngapa nulappassangi antu ana' keledaia?”

⁶Appialimi ke'nanga, sangkamma batena le'baka nipauangi ri Isa. Jari tenamo nipisangkai ke'nanga angngerangi anjo ana' keledaia.

⁷Ri wattunna battumo ke'nanga mae ri Isa nalapakkimi jubana ke'nanga dongko'na anjo keledai. Le'baki anjo nai'mi Isa a'bae.

⁸Jaimi tau ampalaparaki jubana ri agang laNaoloa Isa. Siagang nia' tommo tau angngalle tangke-tangke kayu ri kokoa, nampa napasiara' ri aganga.

⁹ Jaimi tau anrurungangi. Nia' a'jappa ri dallekanNa, siagang nia' a'jappa ri bokoNa. Akkio'-kioki ke'nanga angkana, “Pujimi Allata'ala! Nibarakkakimi Ia battua lalang arenNa Batara!

¹⁰Ammenteng kassa'mi pamarentahanNa labattua, pamarentahanna Daud boeta. Pujimi Allata'ala Kaminang Tinggia!”

¹¹Nampa battumi Isa mange ri Yerusalem. Antama'mi ri Balla'Na Batara. Attammumi Naciniki ngaseng apa niaka ri tammulilinNa. Mingka lanri a'birimmi sassanga, a'lampami mange ri Betania siagang anjo sampuloa anrua ana' gurunNa.

¹²Ammukona, sitabanna a'jappa ke'nanga assulu' battu ri Betania, cipuru'mi Isa.

¹³Nia'mo Nacini' battu bella sipoko' ara sannaka copponna leko'na. Jari mangemi anjoreng ero' anciniki bara' nia'ja rapponna. Mingka wattunna battu mange anjoreng, tena sikali rapponna Nacini'. Sangge leko'na bawang coppong, nasaba' anjo wattua teaipi wattunna a'rappo araya.

¹⁴Nakanamo Isa ri anjo poko' araya, “Appakkaramula ri kamma-kammaya anne, tenanniakkamo manna sitau langkanrei rapponnu!” Nalangngereki ana'-ana' gurunNa anjo apa Napaua Isa.

¹⁵Battumi ke'nanga mange ri Yerusalem. Na'lampamo pole Isa mange ri Balla'Na Batara. Nabongka ngasemmi tau niaka a'balu'-balu' anjoreng. Nabulintakkang ngasemmi mejang-mejanna pasambe doeka, kammayatompa bangko-bangkona pabalu' jangang-jangang bodobangkenga.

¹⁶Siagang tenanniakka manna sitau Napa'biang numalo angngerang manna apa-apa mamo ri parang lakkenna Balla'Na Batara.

¹⁷ Nampa Naajara' ngaseng tau niaka anjoreng. Nakana, “Nia' tattulisi' lalang ri Kittaka angkana: Nakana Allata'ala, ‘BallakKu laniarengi tampa' pappala' doangang untu' sikontu bansaya.’ Mingka ikau ngaseng nupa'jari pa'ru'mungang paella'!”

¹⁸Nalangngereki imang-imang kapalaya siagang guru-guru agamaya anjo kana-kananNa Isa. Jari appakkaramulami ke'nanga a'boya akkala' ero' ambunoi Isa. Malla'mi ke'nanga ri Ia, lanri lannasa' ngasemmi taua allangngereki apa-apa Napangngajarranga.

¹⁹Ri wattunna la'birimmo bangngi a'lampami Isa siagang ana'-ana' gurunNa ambokoi anjo kotaya.

²⁰Ammukona bari'basa', ri wattunna nalaloi ke'nanga anjo poko' araya, matemi nacini' anjo poko' araya sa'genna aka'-aka'na.

²¹Nau'rangimi Petrus apa le'baka kajariang ri subangngi. Jari akkuta'nammi Petrus ri Isa nakana, “O Bapa' Guru, Kicini' sai! Matemi anjo poko' ara le'baka Kitunrai!”

²²Appialimi Isa Nakana, “Tappa' mako ri Allata'ala.

²³ Kapunna tappakko ri Allata'ala, akkulleko angkana ri anne bontoa, ‘Ta'angkakko nutassambila antama' ri tamparanga!’ Tena tanipa'jariannu, assala' tena nubata-bata siagang tappakko angkanaya lakajariang tojeng-tojengi numinasaia.

²⁴Jari u'rangi angkanaya: Punna appala' doangko appala' apa-apa mamo, tappa' mako angkanaya Nasare mako Allata'ala, siagang lanugappami anjo apa nupalaka.

²⁵ Siagang punna appala' doangko, mingka tena nasannang nyawanu ri se'reang tau, pammopporangi rolong anjo taua, sollanna Napammopporang tongi Manggenu ri suruga dosa-dosanu. [

²⁶Punna tena nupammopporangi dosana parannu tau, tena todong na laNapammopporang Manggenu ri suruga dosa-dosanu.]”

²⁷Ammotere'mi pole ke'nanga mange ri Yerusalem. Na ri wattunna a'jappa Isa angnginroi lalang Balla'Na Batara battumi mae ri Ia imang-imang kapalaya, guru-guru agamaya, kammayatompa pamimping-pamimpinna tu Yahudia.

²⁸Akkuta'nammi ke'nanga angkana, “Apa saba'na nakkulle Nugaukang ngaseng anjo sikammaya? Inai assareKo koasa?”

²⁹Appialimi Isa Nakana, “Ero' tongA' akkuta'nang ri kau ngaseng. Pialimi rolong pakkuta'nangKu nampa Kupauangko angkana inai assareA' koasa nakkulle Kugaukang ngaseng sikamma anjo nupakkuta'nanganga.

³⁰Lanri koasa apa nanaje'ne' taua Yohanes; lanri koasaNa Allata'ala yareka koasa rupatau?”

³¹Sipa'bicarami anjo imang-imang kapalaya siagang pamimping-pamimpinna tu Yahudia. Nakanamo para ia todong ke'nanga, “Punna nikana, ‘lanri koasaNa Allata'ala,’ Nakana sallang, ‘Angngapa natena nutappa' ri Yohanes?’

³²Mingka susa tongi lanikana, ‘Lanri koasa rupatau.’ ” Nasaba' mallaki ke'nanga ri tau jaia lanri napatappaki tau jaia ma'nassana na'bi anjo Yohanes.

³³Jari appialimi ke'nanga angkana, “Tanaassengai kambe.” Nakanamo Isa ri ke'nanga, “Punna kamma, tena todong Kukkulle ampauangko angkana lanri koasa battu kemae nakkulle Kugaukang ngaseng sikamma anjo nupakkuta'nanganga.”