Read Makassar Version – KITTA' MATANGKASA MARKUS 12 Bible Online

MARKUS 12 - Makassar Version – KITTA' MATANGKASA bible

MARKUS 12

¹ Nampa appakkaramulami Isa a'bicara pangngebarang mae ri anjo imang-imang kapalaya, guru-guru agamaya kammayatompa pamimping-pamimpinna tu Yahudia. Nakana Isa, “Nia' se're tau a'lamung anggoro' ri kokoa, nampa nakalli' ri tammulilina. Le'baki anjo angngekemi kali'bong eroka napake ammacco' je'ne' anggoro'. Nampa appare' balla' pakkammikang. Le'baki anjo napappitesangammi anjo koko anggoroka mae ri siapa are pajama koko, nampa a'lampa ri se'reang pa'rasangang maraeng.

²Ri wattunna narapi'mo wattunna lanialle rapponna anjo anggoroka, nasuromi palayanna anjo patanna koko mange ampalaki tesanna ri anjo pajamaya ri kokonna.

³Mingka najakkala'mi pajamaya anjo palayang nisuroa. Nampa naba'ji ke'nanga siagang nasuro ammotere' natena apa-apa nasareangi.

⁴Jari nasuromi pole palayanna maraenga anjo patanna koko. Mingka napalu-paluimi pajamaya ulunna anjo palayanga, nampa nabongka a'lampa siagang napakka'-pakkanai.

⁵Nasuromi pole sitau palayanna maraenga anjo patanna koko. Mingka nabunomi ke'nanga anjo palayanga. Na kammaminjo tuli nagaukang ke'nanga mae ri palayang maraenga: nia' naba'ji, na nia' todong nabuno.

⁶Inai mami akkulle nasuro kamma-kamma anne anjo patanna koko? Sitau mami ammantang, iamintu ana' kalenna, sannaka nakamaseanna. Jari kala'busanna nasuromi anjo ana' kalenna mange anjoreng ri pajama-pajamaya. Napikkiriki anjo patanna koko nakana, ‘Mattantu lanapakala'biriki anakku.’

⁷Mingka massing nakanamo anjo pajamaya para ia angkana, ‘Iaminne warisi'na. Umba nibunoi, sollanna akkulle nialle warisi'na!’

⁸Jari najakkala'mi anjo anaka, nampa nabuno. Nampa napela' maya'na assulu' pantaranganna anjo kokoa.”

⁹Le'baki anjo akkuta'nammi Isa Nakana, “Maka apa lanagaukang anjo patanna koko? Mattantu labattui na nabuno ngaseng anjo pajamaya. Nampa napappitesangang anjo kokoa mae ri pajama koko maraenga.

¹⁰ Tantu le'ba'mi nubaca anne aya' niaka ri Kittaka angkanaya, ‘Batu tenaya napakei tukang-tukang batua a'jarimi batu majarre'na bangunanga.

¹¹Iaminne Napareka Allata'ala; teai sipato' ga'gana!’ ”

¹²Nalangngere'na pamimping-pamimpinna tu Yahudia anjo pangngebaranga naassemmi angkanaya kalenna ke'nanga nataba anjo pangngebaranga. Jari usahami ke'nanga ero' ambunoi Isa. Mingka mallaki ke'nanga ri tau jaia. Jari a'lampami ke'nanga ambokoi Isa.

¹³Nia' siapa are tu Farisi siagang siapa are taunna Herodes nisuro mae akkuta'nang ri Isa, ero' napa'boyang kasalang.

¹⁴Battumi ke'nanga mae ri Isa nakkuta'nang angkana, “Bapa' Guru, naassengi kambe angkanaya iKatte tau lambusukKi', siagang manna inai tena Kijampangi panggappana. Punna angngajarakKi' Kipaui silambusu'na apa ero'Na Allata'ala mae ri rupataua. Tena kimmile-mile tau. Jari Kipau sabeki ri kambe, ‘Manuru' ri atoranna agamata, maka akkulleji taua a'bayara' sima mae ri Karaenga yareka tena? Apaka musti nibayaraki anjo simaya yareka tena?’ ”

¹⁵Mingka Naassengi Isa angkanaya munapeki ke'nanga. Jari appialimi Isa Nakana, “Angngapa nuero' ampa'boyangA' kasalang? PicinikiangsA' se're doe' pera'.”

¹⁶Nasaremi ke'nanga Isa se're doe' pera'. Nampa akkuta'nammi Isa Nakana, “Inai pata gambara' siagang areng anne?” Appialimi ke'nanga angkana, “Karaenga.”

¹⁷Nakanamo Isa, “Punna kamma, sareangi Karaenga apa-apanna Karaenga, siagang sareangi Allata'ala apa-apanNa Allata'ala.” Lannasa'mi ke'nanga allangngereki anjo pappialinNa Isa.

¹⁸ Nia' siapa are tu Saduki battu mae ri Isa. (Anne ke'nanga tena natappa' angkanaya lattallasa' poleangi tau matea.)

¹⁹ Nakanamo ke'nanga ri Isa, “Bapa' Guru, nia' atorang natulisi' Musa untu' ikatte angkanaya: ‘Punna nia' sitau bura'ne mate natena ana'na, nania' sari'battanna bura'ne, anjo sari'battang bura'nena musti nabuntingi anjo le'ba' bainenna sollanna nia' sossorang nasareangi anjo tau mateamo.’

²⁰Le'baki nia' tuju bura'ne assari'battang. A'buntimmi anjo bungasaka, mingka matei, natena ana'na.

²¹Nampa anjo baine nabokoia nibuntingimi ri sari'battang makaruana anjo tau mateamo. Mingka mate tongi anjo sari'battang makaruana, na tena todong ana'na. Kammatommi anjo kajarianga ri sari'battanna makatallua,

²²sa'genna mange ri sari'battanna makatujua, a'bunting ngasemmi siagang anjo bainea. Mingka mate ngasengi, natena ngaseng ana'na. Kala'busanna mate tommi anjo bainea.

²³Jari punna attallasa' poleang sallang tau matea, inaimi pata baine anjo bainea. Nasaba' anjo bura'ne tujua le'ba' ngasemmi a'bunting siagang anjo bainea!”

²⁴Appialimi Isa Nakana, “Sala pahang sikaliko antu. Nasaba' tena nupahangi bonena Kittaka siagang koasaNa Allata'ala.

²⁵Nasaba' punna attallasa' poleang tau matea, tenamo nala'bunting pole. Passangalinna lattallasa' kamma mami malaekaka ri suruga.

²⁶ Na passala' attallasa' poleanna tau matea, tena le'bakapi nubaca lalang ri Kitta' Musa passala'na anjo rompo' a'rinraya? Lalang anjo ri Kittaka nia' tattulisi' angkanaya le'baki angkana Allata'ala ri Musa Nakana, ‘INakkemi Allata'alana Abraham, Allata'alana Ishak, siagang Allata'alana Yakub.’

²⁷Anjo Allata'ala, teai Allata'alana tau matea. Iami Allata'alana tau attallasaka. Jari sala pahang sikali ngasengko antu!”

²⁸ Nampa nia'mo sitau guru agama battu ampilangngeri pa'bicaranNa Isa siagang anjo tu Sadukia. Nalangngere'mi anjo guru agamaya angkanaya baji' sikali batena Isa appiali ri anjo tu Sadukia. Jari akkuta'nammi ri Isa nakana, “Kereanga parenta kaminang parallu ri sikontua parentaNa Allata'ala?”

²⁹ Appialimi Isa Nakana, “Parenta lomoro' se'rea iamintu angkanaya: ‘Pilangngerimi ikau bansa Israel! Karaeng Allata'alata, Batara se're-se'rea.

³⁰Kamaseangi Karaeng Allata'alanu ilalang sitepu atinnu, siagang sitepu pa'mai'nu, siagang sitepu akkala'nu, kammayatompa sitepu pakkullenu.’

³¹ Parenta makaruaya iamintu: ‘Kamaseangi parannu tau, sangkamma batenu angkamaseangi batangkalennu.’ Tenamo parenta maraeng la'bi paralluangang naanne parenta ruaya.”

³² Nampa nakanamo anjo guru agamaya ri Isa, “Annaba sikali Pa' Guru! Memang annabai kananTa angkanaya: IKattemi Karaeng Allata'ala tenaya ruanna, tenamo Allata'ala pantaranganTa.

³³ Na sikontu taua musti nakamaseangi Allata'ala ilalang sitepu atinna, siagang sitepu akkala'na, kammayatompa sitepu pakkullena. Siagang musti nakamaseang tongi paranna tau sangkamma batena angkamaseangi batangkalenna. Bajikangangi anjo kala assarea koro'bang nitunua yareka koro'bang maraenga mae ri Allata'ala.”

³⁴Baji' sikalimi Nalangngere' Isa batena appiali anjo guru agamaya. Jari Nakanamo Isa ri ia, “A'birimmako a'jari umma'Na Allata'ala.” Le'baki anjo tenamo manna sitau barani akkuta'nang pole ri Isa.

³⁵Ilalang angngajara'Na Isa ri Balla'Na Batara, akkuta'nammi ri tau niaka hadere' angkana, “Antekamma nakkulle napau guru-guru agamaya angkanaya anjo Karaeng Mappasalamaka sossoranna Daud?

³⁶ Na kalenna Daud, lanri pangngajara'Na RohNa Allata'ala, le'baki angkana, ‘Nakana Batara ri Bataraku: Ammempoko ri sa'ri kanangKu Sa'genna Kusuro ngaseng balinNu akkulantu' ri dallekanNu.’[2]

³⁷Jari punna nakio' ‘Batara’, Daud anjo Karaeng Mappasalamaka, antekamma nakkulle nikana sossoranna Daud?” Anjo tau jaia lalang ri Balla'Na Batara sannang ngasemmi nyawana allangngereki bateNa Isa angngajara'.

³⁸Nakana Isa ri ke'nanga: “Tutuko mae ri guru-guru agamaya. Sarro nangai ke'nanga ammake juba-juba la'bu a'jappa mange-mange siagang sarro nangai ke'nanga nipakalompo ri pasa'-pasaraka.

³⁹Nangai ke'nanga ammempo ri tampa'-tampa' tau nipakalompoa lalang ri balla' sambayanga yareka ri passua'-suarranga.

⁴⁰Sarro nangai tongi ke'nanga natipu janda-jandaya siagang naalleang balla'na. Na sollanna akkulle natongkoki anjo kaja'dallanna ke'nanga, sarro nangai ke'nanga nala'bu-la'bui punna assambayangi. Mingka sanna' battala'na sallang hukkungang lanagappaya ke'nanga!”

⁴¹Ri wattunna ammempo Isa ri dallekanna pammoneang passidakkaya ri Balla'Na Batara, Naciniki tasse're-se'remi taua appantama' doe' passidakka anjoreng ri pammoneang passidakkaya. Jai tau kalumanynyang appantama' doe' sijaiang.

⁴²Nampa nia' tommo battu sitau janda kasi-asi appantama' rua doe' tambaga, iamintu doe' kaminang ca'dia anggaranna.

⁴³Nakio'mi ana'-ana' gurunNa Isa nampa Nakana ri ke'nanga, “Parhatikangi anne: Anjo janda kasi-asia jaiangangi napantama' passidakka ri anjo pammoneang passidakkaya kala yangasenna anjo tau maraenganga.

⁴⁴Nasaba' anjo ke'nanga palla'bi-la'biannaji battu ri pa'barang-baranganna napassareang. Mingka anjo jandaya, manna nakasi-asi, mingka napassareang ngasemmi apa-apa niaka ri ia, sannaka naparalluina untu' katallassanna.”