Read Makassar Version – KITTA' MATANGKASA MARKUS 13 Bible Online

MARKUS 13 - Makassar Version – KITTA' MATANGKASA bible

MARKUS 13

¹Ri wattunna Nabokoi Isa Balla'Na Batara, nia'mo sitau ana' gurunNa angkana, “Bapa' Guru, Kicini' sai anjo bangunanga ngaseng. Kiparhatikang sai batu-batunna sanna' ngaseng ga'gana!”

²Appialimi Isa Nakana, “Sai nucini' ngasengi bangunang lompoa? Tena manna se're lammantang tassusung anjo batu-batua ri pammantanganna ri anjo bangunang-bangunanga. Nasaba' laniruntung ngasengi.”

³Nampa a'lampa Isa mange ri Bonto Zaitun, nammempo ri tampa' sidallekanga siagang Balla'Na Batara. Battumi Petrus, Yakobus, Yohanes siagang Andreas angngagangi a'bicara kale-kalenna.[3]

⁴Nakana ke'nanga ri Ia, “Kipaumi ri kambe, ringngapanna nalakajariang anjo Kipakkanaya? Siagang apa la'jari pammatei punna narapi'mo wattunna?”

⁵Appialimi Isa Nakana, “Tutu laloko, sollanna tena nitipuko.

⁶Nasaba' lajai tau battu ambalukangi arengKu na nakana, ‘Inakke minne!’ Sa'genna jai tau natipu.

⁷Punna nia' nulangngere' sa'ra pa'bundukang, yareka kabara' pa'bundukang, teako mallakki. Yangasenna anjo lakajariang memangi, mingka tanarapikapi wattu kiamaka.

⁸Se'rea bansa la'bunduki siagang bansa maraenga. Se'rea pa'rasangang lanabunduki pa'rasangang maraenga. Kemae-kemae lata'ge'gosoki buttaya siagang lanaallei taua kacipurang. Na yangasenna anjo nampami pammatei pakkaramulanna kasusaanga siagang sessaya sanrapang pa'risi' nakasiaka tu baine eroka ammana'.

⁹ Paralluko tutu, nasaba' lanijakkalakko siagang lanire'resangko mange ri pangadelang agamaya. Laniba'jiko lalang ri balla' sambayanga. Lanierangko mange ri dallekanna tau koasaya siagang kara'-karaenga, passabakkang amminawangko ri Nakke. Na iaminjo la'jari kasampatang ri kau untu' la'jari sa'bingKu mae ri ke'nanga.

¹⁰Anjo Kabara' Baji' battua ri Allata'ala musti nipa'la'bangi rolong mae ri sikontu bansaya.

¹¹Na punna nijakkalakko siagang nierangko mange ri pangadelanga, teako bata-batai angkanaya antekamma batenu la'bicara. Nasaba' punna narapi'mo wattunnu la'bicara, labattui RohNa Allata'ala angngajarakko a'bicara. Teai bicarannu lanupau, mingka bicara battu ri RohNa Allata'ala. Jari pau mami bicara nipangngajarranga ri kau.

¹²Lanapassareangi taua sari'battang kalenna nasuro buno; kammayatompa se'rea mangge lanapassareangi ana' kalenna nasuro buno. Ana'-anaka lanaewai siagang lanapassareangi nasuro buno anrong-manggena.

¹³ Lanikabirisiko ri taua ngaseng, passabakkang amminawannu ri Nakke. Mingka inai-nai attahang sa'genna kala'busang tallasa'na, iami lanipasalama'.”

¹⁴ “Nia' sallang lanucini' ammenteng ‘Kaja'dallang Lammanra'-manrakia’ ammenteng ri tampa' tasiratanga napammentengi. (Tau ammacaya parallui napahang apa battuanna anne!) Anjo wattua, tau niaka ri Yudea parallui lari nai' ri buluka.

¹⁵ Tau niaka irate ri pattongko'na ballaka teami naungi siagang antama' ri balla' angngalle apa-apa.

¹⁶Tau niaka ri kokoa teami ammoteri angngallei bajunna.

¹⁷Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo!

¹⁸Appala' doangko sollanna tena laloja nawattu bosi nakajariang anjo passalaka.

¹⁹ Ri wattu battuna anjo allo-allo appakamalla'-mallaka, labattumi susa lompo dudua, tenayapa nale'ba' kajariang baku' Napa'jarina Allata'ala linoa sa'genna kamma-kamma anne, siagang tenayamo nalakajariang pole ribokoanganna.

²⁰Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua.

²¹Anjo wattua punna nia' tau angkana ri kau, ‘Ciniki, niaki anrinni Karaeng Mappasalamaka!’ yareka nakana, ‘Niaki anjoreng!’ — teako tappakki ri anjo taua.

²²Nasaba' lania' sallang battu tumappasalama' balle-ballea siagang na'bi-na'bi balle-ballea. Lanapappicinikangi ke'nanga gau'-gau' appakalanna'-lannasaka sollanna akkulle annipu, na punna akkulle manna umma'Na Allata'ala lanatipu todong.

²³Jari tutu laloko! Kupauangko anne la'bi riolo ri tenanapa nakajariang yangasenna anjo passalaka.”

²⁴ “Punna le'ba'mo anjo wattu kasusaanga, la'jari sassammi alloa, na tenamo naccaya singara' bulanga.

²⁵ Latu'guru' ngasemmi bintoenga battu ri langika. Na sikamma tau makoasa niaka lalang lino la'jari sanna'mi ricuna.

²⁶ Anjo wattua lania'mi nicini' battu Ana' Ma'rupataua ri tompo'na rammanga lalang koasa malompoa siagang kala'biranNa.

²⁷LaNasuromi malaeka'-malaeka'Na ampa'rappungangi umma'Na Napilea battu ri sikontu linoa, battu raya sa'genna kalau', kammayatompa battu timboro' sa'genna wara'.”

²⁸“Angngalle mako pappilajarang battu ri pangngebarranna poko' araya. Punna moncongbulomi siagang lu'mu'mi tangke-tangkenna, kammayatompa appakkaramulami accu'la', nuassemmi nubatei angkanaya la'birimmi wattu timoroka.

²⁹Kamma tomminjo, punna nucini'mo kajariang anjo pammateia, akkulle tommi nuasseng angkanaya la'biring dudumi battu anjo wattu kasusaang lompo dudua.

³⁰Asseng memammi! Angkanaya lakajariang ngasemmi anjo Kupaua ri wattu tenanapa namate ngaseng tau niaka attallasa' ri kamma-kammaya anne.

³¹Lalanynya' ngasengi langika siagang buttaya, mingka anne kana-kanangKu tuli laniaki satunggu-tungguna.”

³² “Mingka manna nakamma mamo, tenanniakka tau angngassengi ringngapanna allonna yareka ringngapanna tette'na. Manna malaekaka ri suruga siagang manna Ana' Ma'rupataua tena todong Naassengi. Passangalinna Manggea bawang angngassengi.

³³Jari paralluko a'jaga-jaga siagang tutu, nasaba' tena nuassengi ringngapanna wattunna.

³⁴ Pangngebarranna lasangkammai tau a'lampaya ambokoi balla'na nampa mange ri se'reang pa'rasangang bella. Nasuroi palayang-palayanna angngurusuki balla'na, siagang massing nasarei jama-jamang. Pajaga pakke'bu'na napasangi sollanna a'jaga baji'-baji'.

³⁵Jari paralluko a'jaga-jaga, nasaba' tena nuassengi ringngapanna nalammotere' patanna balla'. Akkulle ri wattu karuenna alloa, akkulle ri tangnga bangngia, akkulle ri wattu subua, yareka ri wattu lammumbana alloa.

³⁶Punna tanusanna-sannayai nabattu, tapporo tena laloja narapikangko attinro.

³⁷Anne apa Kupaua mae ri kau ngaseng, Kupau tongi mae ri yangasenna taua: a'jaga-jaga laloko!”