Read Makassar Version – KITTA' MATANGKASA MARKUS 14 Bible Online

MARKUS 14 - Makassar Version – KITTA' MATANGKASA bible

MARKUS 14

¹ Ruangallo mami na allo Paska siagang allo Passua'-suarrang Roti Tenaya Nammake Pa'gambang. A'boyami akkala' imang-imang kapalaya siagang guru-guru agamaya sollanna akkulle najakkala' cokko-cokko siagang nabuno Isa.

²Nakana ke'nanga, “Mingka teako na ri allonna passua'-suarranga, nanigaukang anjo kammaya, nasaba' akkullei sallang a'jari karicuanga.”

³ Ri wattunna nia' Isa ri Betania, ri balla'na Simon le'baka garring sala, nia' sitau baine battu mae ri Ia. Angngerangi sibotolo' minynya'-minynya' bau', sannaka ka'jala'na ballinna nipareka battu ri aka'-aka' kayu bauka. Ri wattunna ammempo angnganre Isa nasungkemi anjo bainea anjo botoloka nampa natumpa anjo minynya'-minynyaka ri ulunNa Isa.

⁴Siapa are tau niaka anjo wattua a'jari larroi nacini'na anjo bainea appakamma anjo. Na nakana ke'nanga para ia, “Apa matu-matunna nipa'labo-laboang kamma anjo minynya'-minynya' bauka?

⁵Akkullei nibalukang la'bi tallum bilangngang doe' pera' anjo minynya'-minynyaka. Nakkulle nipassareang ballinna mae ri tu kasi-asia!” Jari larromi ke'nanga mae ri anjo bai'-bainea.

⁶Mingka Nakanamo Isa, “Lappassammi nagaukang kammaya! Angngapa nuero' ansusa-susai? Apa baji' siagang apa akkulle nipuji nagaukang mae ri Nakke.

⁷ Tu kasi-asia tuli nia'na ri tangnga-tangnganu ngaseng. Punna erokko tena masala wattu nakkulle nutulung ke'nanga. Mingka iNakke, tena Kutuli lania' angngagangko.

⁸Anne bainea le'ba'mi nagaukang apa akkullea nagaukang. Lanri naminynya'-minynyakingKu, napasadiaMa' lanitarawang genteng tenanapa narapiki wattunna.

⁹Patappaki! Angkanaya, kemae-kemae ri sikontu linoa nipa'la'bang Kabara' Baji' battua ri Allata'ala, tuli lanicaritai siagang laniu'rangi tongi anne apa nagaukanga anne bainea, anjari pangngu'rangi mae ri ia.”

¹⁰A'lampami kalase'renna battu ri sampuloa anrua ana' gurunNa Isa, iamintu Yudas, mae ri imang-imang kapalaya. Eroki napassareang nabalukang Isa ri ke'nanga.

¹¹Teai sipato' sannanna nyawana ke'nanga nalangngere'na pattujunna Yudas. A'janjimi ke'nanga lanasare doe' Yudas. Jari appakkaramulami Yudas a'boya akkala' antekamma nakkulle napassareang Isa.

¹²Ri allo makase'rea, ri wattunna Passua'-suarrang Roti Tenaya Nammake Pa'gambang, ammolongi taua gimbala' untu' Paska. Akkuta'nammi ana'-ana' gurunNa Isa angkana, “Kemae Kikellai nipasadia kanre Paskaya untu' iKatte Bapa'?”

¹³Jari Nasuromi Isa rua ana' gurunNa Nakana, “A'lampa mako mange ri kotaya. Anjoreng nia' sitau bura'ne angngerang bongki niaka je'ne'na lanuagang assibuntulu'.

¹⁴Amminawang mako mange ri balla' napammantangia, na nupauang patanna balla' angkana, ‘Akkuta'nangi Pa' Guru angkana keremae tampa' eroka Napake angnganre Paska siagang ana'-ana' gurunNa.’

¹⁵Lanajo'jokang mako anjo taua se're bili' lompo bageang rateang. Le'ba' atoro'mi anjo bilika, siagang sikamma apa-apa niparalluanga. Pasadia ngaseng minjo untu' ikatte.”

¹⁶Jari a'lampami anjo ruaya ana' gurunNa Isa mange ri kotaya. Battuna mange anjoreng nia' tojemmo nabuntulu' ke'nanga sangkamma ngaseng le'baka Napau Isa. Napasadiami ke'nanga kanre Paskaya.

¹⁷Wattunna bangngimo, battumi Isa siagang anjo sampuloa anrua ana' gurunNa.

¹⁸ Lalang ammemponamo ke'nanga angnganre, Nakanamo Isa, “Pilangngeri sai: kala se'rennu, ia niaka kamma-kamma anne angngagangA' angnganre, ampasikongkolangA' sallang.”

¹⁹Nalangngere'na akkana kamma Isa, sanna' ngasemmi si'nana pa'mai'na ana'-ana' gurunNa Isa. Akkuta'nang tasse're-se'remi ke'nanga mae ri Isa angkana, “Sai teaiji nakke nataba kananTa Bapa'?”

²⁰Appialimi Isa Nakana, “Inai-nai kalase'rennu anne sampuloa anrua angngagangA' a'julu piring angnganre iaminjo taunna.

²¹Lamate memang tojenji Ana' Ma'rupataua sangkamma niaka tattulisi' lalang ri Kittaka. Mingka teai sipato' cilakana tau ampasikongkolangai Ana' Ma'rupataua! Bajikangangi ka'de' tena sikali nale'ba' nianakkang anjo taua!”

²²Ri wattunna angnganre ke'nanga, angngallemi roti Isa, nampa appala' sukkuru' ri Allata'ala. Le'baki anjo Nabage-bagemi anjo rotia siagang limanNa, nampa Natawa-tawai ana'-ana' gurunNa, na Nakana, “Allemi, siagang kanremi, iaminne pangngebarranna batangkalengKu.”

²³Le'baki anjo angngallemi se're canteng pangnginungang anggoro'. Appala' sukkuru'mi ri Allata'ala, nampa Napassareang anjo canteng le'baka nabonei anggoro' mae ri ana'-ana' gurunNa. Nainummi ana'-ana' gurunNa anjo anggoroka.

²⁴ Le'baki anjo Nakanamo Isa, “Iaminne pangngebarranna cerakKu, iamintu cera' nipasolonga untu' tau jaia, ampa'assayai parjanjianNa Allata'ala.

²⁵Patappa'mi angkanaya: Tenamo nalaKuinung pole anne anggoroka, sa'genna narapi' wattungKu angnginung anggoro' beru siagang ikau ngaseng, lalang ri Lino BeruNa ManggeKu.”

²⁶Le'baki anjo akkelommi ke'nanga se're kelong-kelong pammuji ri Allata'ala. Nampa a'lampa ke'nanga mange ri Bonto Zaitun.

²⁷ Le'baki anjo Nakanamo Isa ri ke'nanga, “Lalari ngasengko a'lampa ambokoiA'. Nasaba' nia' tattulisi' lalang ri Kittaka angkanaya, ‘LaNabunoi Allata'ala pakalawakinna, na tassia'-siara'mo gimbala'na.’

²⁸ Mingka punna attallasa' poleamMa', la'lampa rioloA' mange ri Galilea.”

²⁹Appialimi Petrus nakana, “Tena! Manna a'lampa ngaseng ke'nanga ampilariKi', mingka inakke tena sikali kuero' ampilariKi'.”

³⁰Nakanamo Isa, “U'rangi, angkanaya ia memanji anne bangngia, ri tenanapa napinruang attingkoko janganga, napintallung mako ansassaliA'.”

³¹Appiali terasa'mi Petrus nakana, “Manna pole musti matea' siagang iKatte Bapa', tena sikali nakulangkana takuassengaKi' Bapa'!” Akkana kamma ngaseng tomminjo ana'-ana' gurunNa maraenga.

³²Battumi ke'nanga ri se'reang tampa' niarenga Getsemani. Nakanamo Isa ri ana'-ana' gurunNa, “Ammempo mako anrinni naKu'lampa rolong appala' doang.”

³³Nampa Nakio' Petrus, Yakobus siagang Yohanes a'lampa siagang KalenNa. Appakkaramulami si'na siagang lussa' pa'mai'Na.

³⁴Nakanamo Isa ri ke'nanga, “Sanna' si'nana pa'maikKu, kamma Kusa'ring ero'maMa' mate. Ammantang mako anrinni siagang a'jaga-jaga mako!”

³⁵A'lampami Isa bella-bella sike'de', nampa tassu'ju' naung ri buttaya, appala' doang. Lalang appala' doanNa Napala'mi punna akkulleja teami Naoloi anjo wattu passessaya.

³⁶Nakana, “Bapa', o Bapa', tena tamakkulle a'jari punna Kierokang. Kipakabellami anne passessaya battu ri Nakke. Mingka teaKi' erokKu Kituruki, passangalinna erotTamo Kipa'jari.”

³⁷Le'baki anjo ammotere'mi Isa, na Narapikang ana'-ana' gurunNa attinro. Nakanamo ri Petrus, “Simon attinroko? Poro se'reji jang natena nukkulle a'jaga?”

³⁸Nampa Nakana Isa ri ke'nanga, “A'jaga-jagako siagang appala' doangko sollanna tena natabako paccoba. Memang ero'ji nyawanu a'gau' tojeng, mingka tanukulleai nasaba' sipa'na rupataua lammai.”

³⁹A'lampami pole sikalipi Isa mange appala' doang. Na ia kana-kananNa sangkammaji le'baka Napau sumpaeng.

⁴⁰Le'baki anjo ammotere'mi pole mange ri ana'-ana' gurunNa. Na Narapikammo pole attinroiji ana'-ana' gurunNa lanri sanna' ta'do'do'na ke'nanga. Jari tanaassengami ke'nanga apa siratang nakana ri Isa.

⁴¹Ri wattunna ammotere' pole Isa ri ke'nanga ri makapintallunna, Nakanamo, “Attinro ngasenginjako siagang ammari-mari ngasenginjako? Angganna'mi! Narapi'mi wattunna nipassareang Ana' Ma'rupataua mae ri limanna tau dorakaya.

⁴²Ambangung ngaseng mako, umba ki'lampa. Ciniki: Battumi tau ampasikongkolangiA'!”

⁴³Sitabang a'bicarana ija Isa battumi Yudas, kalase'renna anjo sampuloa anrua ana' gurunNa. Jai tau naagang a'rurung, angngerang pa'dang siagang palu-palu. Nisuroi ke'nanga ri imang-imang kapalaya, guru-guru agamaya, siagang pamimping-pamimpinna tu Yahudia.

⁴⁴Le'ba'mi nasare pammatei Yudas anjo taua angkana, “Inai-nai kubau, iaminjo taunNa. Jakkala'mi nanuerang siagang nanujagai baji'.”

⁴⁵Ri wattunna battumo Yudas, mangemi ri Isa na nakana, “O Bapa' Guru!” nampa nabau.

⁴⁶Nampa battu ngasemmo anjo tau naaganga Yudas anjakkalaki siagang ansikkoki Isa.

⁴⁷Mingka nia'mo kalase'renna ana' gurunNa Isa ambi'buki pa'danna nampa nate'ba' tunisurona imang lompoa, sa'genna kaccili' tolinna.

⁴⁸Nakanamo Isa ri ke'nanga, “Apa nucini' tau ja'dalakKa' na nupangngerangngangA' pa'dang siagang palu-palu ero' anjakkalakKa'?

⁴⁹ Allo-alloKu nia' ri dallekannu angngajara' lalang ri Balla'Na Batara, angngapa natena nujakkalakKa'? Mingka musti kamma memangi anjo kajarianna, sollanna a'rupamo apa niaka tattulisi' lalang ri Kittaka.”

⁵⁰Lari ngasemmi ana' gurunNa ampilari Isa.

⁵¹Nia' se're tau rungka, akkalimbuka silawara' bawang kaeng lenang, ampinawangi Isa. Ero'mi nijakkala' ri taua,

⁵²mingka nalappassammi kalimbu'na, nampa lari assola'-solara.

⁵³Nierammi Isa mange ri balla'na imang lompoa. Nia' ngasemmi anjoreng asse're imang-imang kapalaya, pamimping-pamimpinna tu Yahudia, siagang guru-guru agamaya.

⁵⁴Amminawang battu bellami Petrus ri Isa sa'genna antama' ri paranglakkenna imang lompoa. Ammempomi anjoreng siagang pangawalaka ngaseng, a'binrung ri pepeka ambambangi kalenna.

⁵⁵A'boyami butti-butti sikontu imang kapalaya siagang haking-haking Pangadelang Agamaya, ero' ansalakangi Isa, sollanna akkulle nahukkung mate. Mingka tena sikali butti akkulle nagappa ke'nanga.

⁵⁶Jaimi sa'bi nikio', mingka sangnging sa'bi balle-balle ngaseng, lanri simmara'-maraengi batena assare kasa'biang.

⁵⁷Nia' siapa are sa'bi balle-balle ammenteng nakana,

⁵⁸ “Le'baki nalangngere' ikambe anne taua angkana, ‘Eroki Kurumbang anne Balla'Na Allata'ala, napareka rupataua, nampa Kubangung poleang maraenga ri makatalluna alloa, tenaya nasangkamma bate pare'na rupataua.’ ”

⁵⁹Mingka simmara'-maraeng tommiseng batena ke'nanga assare kasa'biang.

⁶⁰Jari ammentemmi imang lompoa ri dallekanna ngaseng ke'nanga, nampa akkuta'nang ri Isa nakana, “Tena Nuero' ampiali anjo napakkanaiangKo ke'nanga?”

⁶¹Mingka a'merekiji Isa. Tena sikali Naero' appiali. Jari sikalipi pole akkuta'nang anjo imang lompoa nakana, “Maka iKaumi Karaeng Mappasalamaka, Ana'Na Allata'ala Kaminang Matangkasaka?”

⁶² Appialimi Isa Nakana, “INakke minne, na lanuciniki sallang Ana' Ma'rupataua ammempo ri sa'ri kananNa Allata'ala Kaminang Makoasaya, siagang lanaung battu ri langika ri tompo'na rammanga!”[4]

⁶³Napasinta'-sinta'mi nakekke' pakeanna anjo imang lompoa siagang nakanamo, “Tenamo naparallu sa'bia!

⁶⁴ Nulangngere' ngasemmi kana-kananNa, anghinai Allata'ala. Kamma-kamma anne antekamma batenu antappuki?” Natappukimi ke'nanga angkanaya salai Isa, siagang siratangi nihukkung mate.

⁶⁵Appakkaramulami siapa areang ri ke'nanga ampi'rui rupanNa Isa. Siagang natongko'mi matanNa nampa naba'ji. Nampa nakana ke'nanga, “Coba sai tappu, inai amba'jiKo?” Amminawang ngaseng tommi pangawalaka antempaka'rangi Isa.

⁶⁶Ri wattunna nia' ija Petrus ri paranglakkenga, nia'mo sitau baine palayanna imang lompoa battu mange anjoreng.

⁶⁷Nacini'na anjo palayanga Petrus nia' anjoreng a'binrung ambambangi kalenna, naciniki baji'-baji'mi tanja'na. Nampa nakana, “Sai siagang tongko anjo Isa tu Nazaretka?”

⁶⁸Mingka assassala'mi Petrus. Nakana ri anjo palayanga, “Takuassengai siagang takupahangai antu bicarannu.” Nampa a'lampami Petrus mange ri pakke'bu' lompona anjo balla'na imang lompoa. [Anjo wattua attingkokomi janganga.]

⁶⁹Nicini'mi pole Petrus ri anjo palayang bainea. Na nakanamo pole ri tau niaka anjoreng, “Ma'nassa aganna memang todong ke'nanga anne taua!”

⁷⁰Mingka assassala'mi pole Petrus. Tena nasallo le'ba'na, nakanamo pole tau niaka anjoreng, “Takkulleako assassala', ma'nassa aganna memang tongko ke'nanga; nasaba' tau battu tongko ri Galilea!”

⁷¹Appakkaramulami Petrus assumpa-sumpa nakana, “Matea' naung, ma'nassa tena nakuassengi antu tau nupakkanaya!”

⁷²Anjo wattua attingkokomi pole janganga makapinruanna. Na nau'rangimi Petrus angkanaya le'baki angkana Isa ri ia, angkana, “Ri tenanapa nattingkoko makapinruang janganga, pintallumMa' nusassali.” Angngu'ranginna Petrus, a'lampami angngarru' tassunge'nge'-nge'nge'.