Read Makassar Version – KITTA' MATANGKASA MARKUS 15 Bible Online

MARKUS 15 - Makassar Version – KITTA' MATANGKASA bible

MARKUS 15

¹Ri bari'basa' dudua akkaro-karomi sipa'bicara sikontu hakinga ri Pangadelang Agamaya siagang imang-imang kapalaya, pamimping-pamimpinna tu Yahudia kammayatompa guru-guru agamaya. Nasikko'mi ke'nanga Isa nampa naerang mange napassareang ri Pilatus.

²Akkuta'nammi Pilatus ri Isa nakana, “Kammatojengi angkanaya karaennaKo tu Yahudia?” Appialimi Isa Nakana, “Kammaminjo nupaua.”

³Jaimi pole tuduhang napau imang-imang kapalaya mae ri Isa.

⁴Jari akkuta'nammi pole Pilatus ri Isa nakana, “TaerokaKo appiali? Cini' sai antekamma jaina tuduhang napakkanaiangKo ke'nanga!”

⁵Mingka tena sikalimo Nappiali Isa. Sa'genna a'jari lannasa'mi Pilatus.

⁶Punna narapi' Passua'-suarranna allo Paskaya, biasana nia' sitau tu nitarungku nalappassang Pilatus, situru' pappala'na tau jaia.

⁷Lalang ri tarungkua jai tau nitarungku passabakkang pammunoang siagang appare' karicuang ri pa'rasanganga. Nia' kalase'renna niarenga Barabas.

⁸A'rappungammi tau jaia, nampa napala' ri Pilatus sollanna nalappassang sitau tau nitarungkua, sangkamma biasa.

⁹Akkuta'nammi Pilatus ri ke'nanga nakana, “Erokko, naia anne karaenna tu Yahudia kulappassang?”

¹⁰Nasaba' naassengi Pilatus angkanaya nanapassareang Isa ke'nanga ri ia, lanri assereati anjo imang-imang kapalaya.

¹¹Mingka niajara' salami anjo tau jaia ri imang-imang kapalaya sollanna Barabas napala' ke'nanga nilappassang.

¹²Jari nakanamo pole Pilatus ri anjo tau jaia, “Jari punna kamma lakuapami anne tau nugallaraka karaenna tu Yahudia?”

¹³A'gorami ke'nanga angkana, “Allei salli'!”

¹⁴Akkuta'nammi Pilatus nakana, “Mingka apa kaja'dallanNa?” Pila' a'gora-gorami pole ke'nanga angkana, “Allei Salli'!”

¹⁵Lanri eroki napakasannang Pilatus nyawana anjo tau jaia, nalappassammi Barabas. Nampa nasuro taua ancamboki Isa, nampa napassareang nasuro salli'.

¹⁶Nierammi Isa ri surudadua mange ri balla' lompona guburnurka. Nampa nikio' ngaseng a'rappungang pasukanga.

¹⁷Nampa nipipakei juba cura' lame butung ri ke'nanga siagang nipapparekang songko' akkatintinga, nampa napataba ke'nanga ri ulunNa Isa.

¹⁸Le'baki anjo anynyombami ke'nanga ri Isa nakana, “Iye' Karaenna tu Yahudia.”

¹⁹Napalu-paluimi takkang ke'nanga ulunNa Isa, nampa napi'rui rupanNa siagang su'ju' anynyomba ri dallekanNa.

²⁰Le'baki nakarek-karenai Isa, napasulu' poleammi ke'nanga anjo juba cura' lame butunga, nampa napipakei ammotere' pakeang KalenNa Isa. Nampa nierang assulu' Isa, lamange nisalli'.

²¹ Ri tangngana aganga nia'mo sitau nasuro ke'nanga ampisangi kayu salli'Na Isa. Anjo taua beru battui ri desaya ero' antama' ri kotaya. (Niarengi Simon, ana'na Aleksander siagang Rufus tu battua ri pa'rasangang Kirene.)

²²Nierammi Isa ri se'reang tampa' niarenga Golgota, battuanna “Tampa' Tangkora'”.

²³Anjoreng nasaremi ke'nanga Isa anggoro' nicampuruka mur, mingka taerokai Isa angnginungi anjo anggoroka.

²⁴ Nampa nasalli' ke'nanga Isa. Na nabotorimi pakeanNa ero' nabage massing tawana.

²⁵Tette' salapang ri bari'basaka na nisalliki Isa.

²⁶Irateang ri kayu sallika nia'mo nitannang tulisang angkanaya: “Karaeng Tu Yahudia.” Iaminjo tattulisika kasalang nituduangi Isa.

²⁷Nia' todong rua paella' naagang Isa nisalli'. Sitau ri sa'ri kananNa, sitau ri sa'ri kairinNa. [

²⁸ Lanri kammana, a'rupami apa tattulisika lalang ri Kittaka angkanaya, “Lanipasibilangi tau ja'dalaka.”]

²⁹ Sikamma tau niaka numalo anjoreng napammenggong-menggongi ulunna, siagang nahina-hinai Isa angkana, “He, iKaumi eroka anrumbangi Balla'Na Allata'ala nampa Nupabangung poleang ri makatalluna alloa.

³⁰Cobami naungKo mae battu ri antu kayu sallika na Nupasalama' KalenNu!”

³¹Sikamma imang-imang kapalaya siagang guru-guru agamaya amminawang ngaseng tommi ancau-caui Isa. Angkanami ke'nanga para ia, “Napasalamaki tau maraenga, mingka KalenNa tanakulle Napasalama'!

³²Punna ma'nassa karaenna memang tongi tu Israelka, Karaeng Mappasalamaka, baji'mi punna Napanaung KalenNa battu ri anjo kayu sallika, sollanna na nicini' nakitappa' todong ri Ia!” Kammayatompa anjo tau naaganga Isa nisalli', katuru'-turukang tommi anghinai Isa.

³³Ri tangngana alloa, niaki tallung tette' a'jari sassang ri sikontu anjo pa'rasanganga.

³⁴ Na ri wattunna narapi'mo tette' tallu ri karuenga, ammarrang lompomi Isa angkana, “Eloi, Eloi, lama sabakhtani?” battuanna, “O Allata'alaKu, o Allata'alaKu, angngapa na NubokoiA'?”

³⁵Sikamma tau niaka anjoreng nalangngereki ammarrang kammanjo Isa. Nakanamo ke'nanga, “Pilangngeri sai, Nakioki Elia!”

³⁶ Nia'mo sitau battu ri ke'nanga linta' mange angngalle bunga batu karang, nampa napantama' ri anggoro' kaccia. Nampa napatinting anjo bunga batu karanga ri se'reang cappa' kayu; na napamange ri bawaNa Isa siagang nakana, “Tayangi, na nicini', maka laniaki battu Elia ampanaungi battu ri anjo kayu sallika.”

³⁷Nampa ammarrammi Isa, natappu' nyawaNa.

³⁸ Sinre' ta'bage ruami kaeng gordenga ri Balla'Na Batara, battu rate sa'genna naung.

³⁹Anjo perwira surudadua niaki ammenteng ri dallekanna salli'Na Isa ri wattunna mate Isa. Nacini'mi antekamma batena mate Isa. Nakanamo anjo perwiraya, “Ma'nassa Ana'Na tojeng Allata'ala anne taua!”

⁴⁰ Nia' todong siapa are bai'-baine ancini' battu bellai anjo sikamma apa kajarianga. Niaki Salome, Maria Magdalena, siagang Maria amma'na Yakobus loloa, kammayatompa Yoses.

⁴¹Yangaseng minjo ke'nanga, bai'-baine ampinawangi siagang antulungai Isa ri wattunna nia' Isa ri Galilea. Na jai pole bai'-baine maraeng anjoreng, amminawanga todong ri Isa battu ri Yerusalem.

⁴²Ri wattunna ero'mo bangngi nia'mi Yusuf battua ri Arimatea. Anne Yusuf, anggotana tongi haking Pangadelang Agamaya, siagang nikangalikang tongi ri taua. Sallo tommi natayang wattunna na Napakkaramula Allata'ala ammarenta salaku Karaeng. Anjo alloa, allo Pappasadiang (iamintu allo sadiana taua antayangi allo Pammari-marianga, labattua ammuko). Jari napa'baraniammi Yusuf mange andallekang ri Pilatus, ampalaki maya'Na Isa.

⁴³

⁴⁴Lannasa'mi Pilatus ri wattunna nalangngere' angkana matemi Isa. Jari nasuro kio'mi komandang pasukanga na nakuta'nang siapami sallona mate Isa.

⁴⁵Le'ba'na nalangngere' a'laporo' anjo komandanga, nakellaimi Pilatus mange Yusuf angngallei maya'Na Isa.

⁴⁶Ammallimi Yusuf kaeng lenang alusuka, lanapareka pa'roko' maya'Na Isa. Le'baki anjo naerammi maya'Na Isa, na napantama' ri jera' batu a'bontoa. Nampa natongko' batu lompo anjo jeraka.

⁴⁷Anjo wattua, niaki Maria Magdalena siagang Maria amma'na Yoses amminawang, ero' naasseng angkana kemae nitarawang maya'Na Isa.