Read Makassar Version – KITTA' MATANGKASA MARKUS 2 Bible Online

MARKUS 2 - Makassar Version – KITTA' MATANGKASA bible

MARKUS 2

¹Siapa are allo ribokoanganna, ammotere'mi Isa mange ri Kapernaum. Tassiara'mi kabaraka angkana niaki ri balla'.

²Jaimi tau battu. A'lipummi ke'nanga anjoreng ri ballaka, sa'genna tenamo tampa' assabang. Manna ri pakke'buka rassi ngaseng tau. Napabattumi Isa biritta battua ri Allata'ala mae ri ke'nanga.

³Lalang a'bicaraNa Isa, nia'mo tau appa' battu a'bule' tau peso', ero' naerang mae ri Isa.

⁴Mingka lanri jaina tau, takkulleami ke'nanga battu mae ri Isa. Jari angngambi'mi ke'nanga nai' ri pattongko'na ballaka. Nampa nasungke ke'nanga pattongko' niaka irateanganna Isa. Le'baki anjo naoloro'mi ke'nanga naung anjo tau pesoka siagang tappere'na.

⁵Nacini'na Isa antekamma lompona tappa'na ke'nanga, Nakanamo ri anjo tau pesoka, “O anakKu, nipammopporammi dosa-dosanu.”

⁶Nia' siapa are guru agama ammempo anjoreng. Nakanamo lalang ri pa'mai'na ke'nanga.

⁷“Baranina anne taua akkana kamma! Nahinai Allata'ala. Inai akkulle ampammopporangi dosaya, pantaranganna Allata'ala bawang?”

⁸Anjo wattua Naasseng memammi Isa pikkiranna ke'nanga. Jari Nakanamo, “Angngapa nukkuta'nang kamma ngaseng lalang ri pa'mai'nu?

⁹Maka kereanga gampangangang: angkanaya, ‘Nipammopporammi dosanu’ yareka angkanaya, ‘Ambangungko nai', angkaki tappere'nu, nu'jappa’?

¹⁰Mingka kamma-kamma anne eroki Kupa'butti mae ri kau ngaseng angkanaya ri tompo'na anne buttaya makoasai Ana' Ma'rupataua ampammopporangi dosa-dosaya.” Nampa Nakanamo Isa ri anjo tau pesoka,

¹¹“Ambangungko nai', angkaki tappere'nu, ammotere' mako!”

¹²Ambangummi nai' anjo taua, na naalle memang tappere'na, nampa a'lampa assulu' niciniki ri tau jaia. Sanna' ngaseng lannasa'na anjo tau jaia. Ammuji-mujimi ke'nanga ri Allata'ala. Nakanamo ke'nanga, “Tena le'bakkapaki' accini' kajariang kammaya anne!”

¹³Ammotere'mi pole Isa mange ri biring Tamparang Galilea. Jaimi tau battu mae ri Ia. Naajara' ngasemmi ke'nanga.

¹⁴Lalang a'jappaNa Isa anjoreng, nia'mo Nacini' pasingara' sima niarenga Lewi, ana'na Alfeus. Sitabangi ammempo lalang ri kantoro' simaya. Nakanamo Isa ri ia, “Amminawangko ri Nakke.” Ammentemmi Lewi nampa amminawang ri Isa.

¹⁵Ri wattunna angnganre Isa ri balla'na Lewi, jaimi pasingara' sima siagang tau nicini' kodia ri tau jaia, angngagangi Isa siagang ana'-ana' gurunNa angnganre. Nasaba' jaimi ke'nanga amminawang ri Isa.

¹⁶Nia'mo siapa are guru-guru agamana tu Farisia anciniki Isa angnganre siagang anjo pasingara' simaya siagang anjo tu nicini' kodia ri tau jaia. Jari akkuta'nammi ke'nanga ri ana'-ana' gurunNa Isa angkana, “Angngapa nasiagang gurunnu anjo pasingara' simaya siagang anjo tu kodi kammaya ngaseng, angnganre?”

¹⁷Nalangngereki Isa akkuta'nang kamma ke'nanga, appialimi Nakana, “Tau tenaya nagarring, tena naparallu ri dottoro', passangalinna tau garringaji. Teai tau nakanaya kalenna baji' battu Kuboya, passangalinna tau nicini' tunaya.”

¹⁸Nia' se're wattu nappuasa ana'-ana' gurunna Yohanes Paje'ne' siagang tu Farisia. Nia'mo tau battu akkuta'nang ri Isa angkana, “Angngapa nappuasa ana'-ana' gurunna Yohanes Paje'ne' siagang ana'-ana' gurunna tu Farisia, mingka ana'-anatTa Katte tena?”

¹⁹Appialimi Isa Nakana, “Maka tena nangnganre toanaya ri passua'-suarranna pa'buntinganga? Punna nia' ija bunting bura'nea angngagangi ke'nanga, mattantu angnganrena ke'nanga.

²⁰Mingka lania' wattunna na lanialle bunting bura'nea battu ri ke'nanga. Nampami tangnganrea ke'nanga anjo wattua.

²¹Punna nia' tau annampeng baju toa, teai kaeng beru napatampeng. Nasaba' punna akkungkung anjo kaeng beru nipatampenga lata'besoki anjo baju toaya sa'genna kekke' poleang, napila' laluara' kekke'na.

²²Kammayatompa pole, punna nia' tau ammoli' anggoro' beru, tena nanjoreng ri pammoneang toaya na pammoliki. Nasaba' lareppeki anjo pammoneang toaya napakamma anjo anggoro' berua. Kale'bakkanna lanipela' rua-ruami. Jari anjo anggoro' berua, parallui niboli' ri pammoneang berua todong!”

²³ Nia' se're wattu, ri allo Pammari-marianga, a'jappai Isa ri se'reang koko gandung. Angngattili'mi ana'-ana' gurunNa gandung.

²⁴Nakanamo tu Farisia ri Isa, “Angngapai anjo ana'-ana' gurunNu na nadakkai atoranga ri agamata, kanagaukangi apa nipappisangkanga nigaukang ri allo Pammari-marianga?”

²⁵ Appialimi Isa Nakana, “Tale'bakapi nubaca apa nagaukanga Daud ri wattunna Abyatar a'jari imang lompo? Anjo wattua cipuruki Daud siagang ana'-ana'na. Na tenamo kanrena ke'nanga. Jari antama'mi ke'nanga ri Balla'Na Batara, nampa nakanre roti le'baka nipakkoro'bangngang mae ri Allata'ala. Napassareang tommi anjo rotia mange ri ana'-ana'na. Na situru' atoranga ri agamata, imang-imangaji bawang akkulle angkanrei anjo rotia.”

²⁷Nampa Nakana pole Isa, “Nipa'niaki anjo allo Pammari-marianga untu' rupataua; teai rupataua untu' allo Pammari-marianga.

²⁸Jari makoasai Ana' Ma'rupataua, ba'lalo makoasai irateanganna allo Pammari-marianga.”