Read Makassar Version – KITTA' MATANGKASA MARKUS 4 Bible Online

MARKUS 4 - Makassar Version – KITTA' MATANGKASA bible

MARKUS 4

¹ Angngajara'mi pole Isa ri biring Tamparang Galilea. Sanna' jaina tau battu allipungi. Jari nai'mi ammempo ri se'reang biseang attompo' ri je'ne'. Na anjo tau jaia anjoreng ngasengi ri biring tamparanga ammenteng.

²Jaimi apa-apa Naajarrangi Isa ke'nanga. Ammakei pangngebarang Naajara'na ke'nanga. Na kammaminne Naajarrangi ke'nanga.

³“Pilangngeri! Nia' sitau pakoko a'lampa appakioro' bine.

⁴Na ri wattunna napakioro', nia' bine tu'guru' ri aganga. Nampa battu jangang-janganga angkanrei sa'genna la'busu'.

⁵Nia' todong tu'guru' ri butta jaia batu-batunna. Lanri kuranna buttana linta'mi attimbo anjo binea;

⁶mingka wattunna nai'mo alloa pakkaramulami kalumeng, sa'genna kalotoro' nampa mate, lanri tena nabella antama' aka'na ri buttaya.

⁷Nia' todong bine tu'guru' ri alla'na ruku'-ruku' akkatintinga. Mingka ri wattunna accu'la', takkulleami a'rappo lanri nibetai ri anjo ruku'-ruku' akkatintinga.

⁸Na nia' todong bine tu'guru' ri butta copponga. Attimboi anjo binea, sa'genna pila' lompo nampa a'rappo. Nia' a'rappo a'lappi tallumpulo, nia' a'lappi annampulo, kammayatompa nia' a'lappi sibilangngang.”

⁹Le'baki Nacarita Isa anjo pangngebaranga, Nakanamo, “Nasaba' nia' ngaseng tolinnu, pilangngerimi!”

¹⁰Ri wattunna Kale-kalenNa mami Isa, battumi ana'-ana' gurunNa siagang tau le'baka allangngerekai pangngajara'Na. Nasuro pakasingara'mi ke'nanga battuanna anjo pangngebaranga.

¹¹Nakanamo Isa ri ke'nanga, “Le'ba' mako nisare pangngassengang sollanna nuasseng rahasiana angkanaya antekamma batena ammarenta Allata'ala. Mingka tau maraenga ammakepi pangngebarang punna niajara' ke'nanga,

¹² sollanna ‘Lanaciniki tojemmi ke'nanga, mingka tanaassengai apa kajarianga, lanapilangngeri tojemmi ke'nanga, mingka tanapahangai, anne kajariangi sollanna tena naciniki siagang tena napahangi ke'nanga na tea battu mae ri Allata'ala, nampa nipammopporang ri Allata'ala ke'nanga.’ ”

¹³Nampa Nakana Isa ri ke'nanga, “Punna tena nuassengi battuanna anjo pangngebaranga, antekamma lakkulle nuasseng pangngebarang maraenga?

¹⁴Anjo pakioroka, iamintu tau ampasiaraki Kabara' battua ri Allata'ala.

¹⁵Anjo bine tu'guruka ri aganga, iaminjo pangngebaranna tau allangngerekai kabaraka ri passala'na antekamma batena ammarenta Allata'ala, mingka tanapahangai. Mingka kamma nalangngere'na ke'nanga battumi Billisika angngallei anjo apa le'baka nipakioro' lalang ri atinna ke'nanga.

¹⁶Anjo bine tu'guruka ri batu-batua, iaminjo pangngebaranna tau lintaka antarimai siagang rannu nyawana nalangngere'na anjo kabaraka.

¹⁷Mingka tena nantama' aka'na anjo kabaraka ri atinna ke'nanga, sa'genna tena nasallo attahang. Kamma natujuna susa yareka kamma anggappana passessa ke'nanga passabakkang anjo kabaraka, ammono'boko memammi ke'nanga.

¹⁸Anjo bine tu'guruka ri alla'na ruku' akkatintinga, iaminjo pangngebaranna tau allangngerekai anjo kabaraka,

¹⁹mingka ranggaselai ri passala'na katallassanna ke'nanga, kammayatompa ero' dudui kalumanynyang. A'rupa-rupami apa-apa nakacinnai antama' ri atinna ke'nanga. Lanri nibetami anjo kabara' battua ri Allata'ala lalang ri atinna ke'nanga, takkulleami a'rappo.

²⁰Na anjo bine tu'guruka ri butta copponga, iaminjo pangngebaranna tau allangngerekai siagang antarimayai anjo kabaraka. A'rappomi ke'nanga, na jai rapponna: nia' a'lappi tallumpulo, nia' a'lappi annampulo, na nia' todong a'lappi sibilangngang wassele'na.”

²¹ Le'baki anjo Nakanamo pole Isa, “Maka le'baki nia' tau apparinra lampu nampa natongko' katoang, yareka naboli' rawanganna katinroanga? Maka tena napadongkoki irate ri pa'dongkokanna?

²² Tenanniakka apa-apa taccokko talakacinikang; siagang tenanniakka rahasia talatassungke.

²³Jari, punna nia'ja tolinnu, pilangngerimi!”

²⁴ Nampa Nakana pole Isa, “Parhatikangi anne apa nulangngereka. Pa'baku' apa nupake ambakuki parannu tau, iaminjo pa'bakuka laNapake Allata'ala ambakukko — yareka la'biangampa pole.

²⁵ Nasaba' tau niakamo apa-apanna, lanisarei pole jai; mingka tau tenaya apa-apanna, lanialleangi ba'lalo apa-apa niaka sike'de' ri ia.”

²⁶Nasambummi pole bicaranNa Isa Nakana, “Punna ammarenta Allata'ala salaku Karaeng, lakammaminne pangngebaranna. Nia' se're tau a'lamung gandung ri kokonna.

²⁷Punna bangngi attinroi; na punna allo ambangungi. Na lalang kammana anjo attimbo minjo lamung-lamunna sa'genna lompo. Mingka tanaassengai antekamma batena attimbo sa'genna lompo anjo lamung-lamunga.

²⁸Iaminjo buttaya napattimboi sa'genna appa'nia' wassele': uru-uruna tangkenna, nampa bulere'na sa'genna rapponna.

²⁹ Na punna toamo anjo gandunga yareka narapi'mi wattu pakkattoanga, appakkaramulami akkatto.”

³⁰Akkuta'nammi pole Isa Nakana, “Punna ammarenta Allata'ala, apa akkulle nipasanrapangangi? Pangngebarang apa akkulle nipake ampakasingaraki?

³¹Punna ammarenta Allata'ala kammaminne pangngebaranna: Nia' silisere' parekang lamungang sannaka ca'dina lisere'na. Iaminjo lisere' rappo kayu kaminang ca'dia ri lino. Na nia'mo sitau angngallei anjo lisere' kaminang ca'dia, nampa nalamung.

³²Mingka ri wattunna attimbomo, iami a'jari poko' kaminang lompo ri sikamma poko'-poko' lu'muka poko'na. Sanna' copponna tangke-tangkenna, sa'genna akkulle napa'ru'mungi siagang napa'la'langi jangang-jangang.”

³³Kammaminjo bateNa Isa angngajaraki taua. Jai pangngebarang Napake, sollanna akkulle napahang ke'nanga.

³⁴Punna Naajara' taua ammakei pangngebarang. Mingka punna Ia mami siagang ana'-ana' gurunNa, Napakasingara' ngasemmi battuanna anjo pangngebaranga mae ri ke'nanga.

³⁵Ri wattunna karueng, ia todong anjo alloa, Nakanamo Isa ri ana'-ana' gurunNa, “Umba ki'lampa a'biseang a'limbang anta'leang.”

³⁶Jari antama'mi ana'-ana' gurunNa ri biseanga. Nia' memammi Isa antama' riolo ri biseanga. Nabokoimi anjo tau jaia ri biring tamparanga. A'lampami Isa siagang ana'-ana' gurunNa. Nia' todong biseang-biseang maraeng anjoreng.

³⁷Tena nasallo, battumi anging lompoa. Appakkaramulami nitunrung ri bombang lompo siagang napantamakkimi je'ne' biseanna ke'nanga, sa'genna a'birimmi rassi je'ne'.

³⁸Na anjo wattua sitabangi attinro Isa, appa'lungang ri ulunNa biseanga. Battumi ana'-ana' gurunNa anronrongi. Nakana ke'nanga, “O Pa' Guru, natujuki anne bala, angngapa natena Kijampangi?”

³⁹Ambangummi Isa, nampa naga'gara' anjo anginga, siagang Nakana ri anjo tamparanga, “Ammariko siagang sannangko!” Ammarimi anginga, siagang a'jari sannang sikalimi tamparanga.

⁴⁰Nampa Nakana Isa ri ana'-ana' gurunNa, “Angngapa numalla'? Angngapa natena nutappa' ri Nakke?”

⁴¹Sanna'mi malla'na ke'nanga. Na sipa'bicaramo massing para ia ke'nanga angkana, “Inai sitojenna anne taua? Kamanna anginga siagang bombanga amminawang turu' ngaseng ri kananNa.”