Read Makassar Version – KITTA' MATANGKASA MARKUS 5 Bible Online

MARKUS 5 - Makassar Version – KITTA' MATANGKASA bible

MARKUS 5

¹Na battunamo Isa siagang ana'-ana' gurunNa ri ba'leanna Tamparang Galilea, ri daera Gerasa.

²Kamma Naunna Isa battu ri biseanga, nia'mo sitau bura'ne assulu' battu ri pa'jerakkanga, mae ri Ia.

³Anjo taua nisosoki ri setang, siagang anjorengi ri pa'jerakkanga ammantang. Takkulleami nisikko', nasaba' manna rantea natappu' ngaseng.

⁴A'mole-molemi nisikko' rante bangkenna siagang limanna, mingka tuli natappuki anjo rantea, siagang anjo bassia ri bangkenna napolong todong. Sanna' sikali gassinna sa'genna tenanniakkamo tau akkulle anta'galaki.

⁵Allo bangngi tuli a'jappa siagang akkiok-kio' ri pa'jerakkanga siagang ri bulu'-buluka, na naloko'-lokoki kalenna ri batua.

⁶Ri wattunna nacini' bella battu Isa, lari-larimi anruppai Isa nampa su'ju' ri dallekanNa.

⁷Ammarrang lompomi nakana, “O Isa, Ana'Na Allata'ala Kaminang Tinggia! Apa ero' Nugaukang ri nakke? Nasaba' Allata'ala, kupalaki ri Katte, tea' laloKi' sessaia'!” (

⁸Nakkana kamma anjo taua, lanri Nakanana Isa ri ia, “Ikau roh ja'dalaka, assulukko battu lalang ri kalenna anne taua!”)

⁹Nampa akkuta'nang Isa ri ia Nakana, “Inai arennu?” Appialimi anjo taua nakana, “ ‘Legiun’ arengku — nasaba' jai sikalia' sipa'rurungang!”

¹⁰A'mole-molemi napala' dudu anjo roh-roh ja'dalaka ri Isa sollanna tena na nisuro assulu' battu ri anjo daeraya.

¹¹Tena nabella battu ri anjo tampaka, jai sikali bawi sitabang a'boya kanre ri bonto-bontoa.

¹²Napala'mi anjo roh-roh ja'dalaka ri Isa, nakana, “Suro ngasemma' antama' anjoreng ri bawi-bawia.”

¹³Niturukiammi ri Isa. Jari assulu'mi anjo roh-roh ja'dalaka, nampa antama' anjoreng ri bawi-bawia. Anjo bawia nia' ruassa'bu jaina. Lari ngasemmi anjo bawia, nampa a'lumpa' battu ri birinna ta'binga naung ri tamparanga, sa'genna tallang ngaseng.

¹⁴Lari ngasemmi pakalawakinna anjo bawia, na napa'la'bang anjo kabaraka lalang ri kotaya siagang desa-desa niaka a'reppese' anjoreng. Jari assulu'mi taua mange anciniki anjo apa kajarianga.

¹⁵Mangemi ke'nanga ri Isa, nampa nacini'mo ke'nanga anjo tau le'baka nasoso' setang, ammempo anjoreng. Ammakemi care-care siagang baji'mi jappana pikkiranna. A'jari malla' ngasemmi ke'nanga.

¹⁶Sikamma tau ancinikai kajarianga ri anjo taua siagang anjo kajarianga ri bawi-bawia, massing nacarita ngasemmi apa le'baka nacini' ke'nanga.

¹⁷Napala'mi panduduka anjoreng ri daeraya mae ri Isa, sollanna a'lampamo Isa ambokoi anjo daeraya.

¹⁸Ri wattunna antama'mo Isa ri biseanga, battu tommi anjo tau le'baka nasoso' setang. Napala'mi ri Isa sollanna nipa'biang amminawang.

¹⁹Mingka nipisangkai ri Isa. Nakanamo Isa ri ia, “Ammotere' mako, na nupauang ngaseng bija-bijannu apa le'baka Nagaukang Allata'ala ri kau, siagang antekamma baji'na Allata'ala mae ri kau!”

²⁰A'lampami anjo taua. Nappakkaramulamo nacarita lalang daera Sampuloa Kota, anjo apa le'baka Nagaukang Isa ri ia. Lannasa' ngasemmi taua allangngereki anjo kabaraka.

²¹Ammotere'mi pole Isa anta'leang ri ba'leanna anjo tamparanga. Anjoreng ri birinna tamparanga jaimi tau battu a'rappungang ri tammuliliNa Isa.

²²Nia'mo sitau, niareng Yairus, battu mae ri Isa. Iami kapalana balla' sambayanga ri anjo kotaya. Battuna mae ri Isa, su'ju'mi ri dallekanNa.

²³Na napala' dudu ri Isa nakana, “Bapa', sanna' sikali garrinna ana' baineku. Kupalaki naKibattu anta'galaki, sollanna akkulle baji', natea matei!”

²⁴A'lampami Isa siagang Yairus. Sanna' jaina tau ampinawangi battu ri kere-keremae, siagang sisorong-sorong mami taua ero' a'reppese' ri Ia.

²⁵Nia' tommo sitau baine sannaka garrinna. Sampulomi anrua taung nalari cera'.

²⁶La'busu'mi barang-baranna napangngongkosang ri dottoroka, mingka tena sikali pamminrana garrinna. Pila' sanna'ji garrinna.

²⁷Jaimi kabara' nalangngere' anjo bainea apa-apa le'baka Nagaukang Isa. Jari ri tangnga-tangngana tau jaia, battu ribokomi anreppesi Isa.

²⁸Nasaba' nakana nawa-nawana, “Assala' kusero mamo jubaNa, tena ta'jari bajikku!”

²⁹Najamami jubaNa Isa, nammari memammo silalonna nilari cera'. A'jari baji'mi Nakasia'.

³⁰Anjo wattua nakasia' tommi Isa angkanaya nia' kagassingang assulu' battu ri KalenNa. Jari assailemi Isa, nampa Nakuta'nang tau jaia, Nakana, “Inai anseroi jubaKu?”

³¹Nakanamo ana'-ana' gurunNa, “KalenTamo anciniki, antekamma jaina tau assiassa'-assa'. Angngapa naKiakkuta'nang ija angkana inai anseroi jubaTa?”

³²Mingka tuli Naciniki ngasemmi Isa sikamma tau niaka ri tammuliliNa ero' Naasseng angkana inai le'ba' anseroi jubaNa.

³³Anjo bainea, naassennamo apa kajarianga ri kalenna, a'jari malla'mi siagang annekkere'mi. Su'ju'mi ri dallekanNa Isa na namangakui ngaseng apa nagaukanga.

³⁴Nampa Nakanamo Isa ri anjo bainea, “O AnakKu, lanri tappa'nu ri Nakke, a'jari baji' mako! A'lampamako siagang salama'. Baji' sikali mako antu!”

³⁵Lalang a'bicaraNa Isa, nia'mo siapa are tunisuro battu ri balla'na Yairus. Nakanamo ke'nanga, “Tea' maki' susa-susai Pa' Guru. Nasaba' matemi anjo ana' bainea.”

³⁶Mingka tena Najampangi Isa kananna ngaseng anjo taua. Nakanamo ri Yairus, “Teako mallakki, tappakko ri Nakke!”

³⁷A'jappa tulusuki Isa, mingka tena Napa'biangi taua amminawang, pantaranganna Petrus siagang Yakobus na Yohanes sari'battanna.

³⁸Ri wattunna battu ke'nanga mange ri balla'na Yairus, Nacini'mi Isa taua gegere', siagang nia' tommo Nalangngere' tau appiraung siagang angngarru' lompo.

³⁹Antama'mi Isa ri ballaka nampa Nakana ri ke'nanga, “Angngapa nugegere' siagang angngarru' kamma ngaseng? Anjo anaka tena namate, mingka attinronaja!”

⁴⁰Nikakkalimi Isa ri ke'nanga, lanri akkana kammana. Mingka Nasuro ngasemmi Isa assulu' ke'nanga. Nampa Naerang anrong-manggena anjo anaka siagang anjo tallua ana' gurunNa antama' ri kamara'na anjo anaka.

⁴¹Nata'gala'mi Isa limanna anjo anaka, nampa Nakana ri ia, “Talita kum,” battuanna, “E ana' baine, Kukana ri kau: ambangungko!”

⁴²Ambangummi nai' anjo ana' tuloloa, nampa a'jappa. (Sampulomi anrua taung umuru'na.) Takkajannang ngasemmi sikamma tau niaka anciniki anjo kajarianga!

⁴³Mingka Napisangkai dudumi Isa ke'nanga ampappiassengangi anjo kajarianga manna pole ri nai. Nampa Nakana Isa, “Sarei kanre anjo anaka.”