Read Makassar Version – KITTA' MATANGKASA MARKUS 7 Bible Online

MARKUS 7 - Makassar Version – KITTA' MATANGKASA bible

MARKUS 7

¹Nia' siapa are tu Farisi siagang guru-guru agama battu ri Yerusalem, mae ri Isa.

²Le'baki nacini' ana'-ana' gurunNa Isa angnganre nara'masa' limanna. Tena nabissai rolong limanna, situru' atoranna agamaya.

³Anjo tu Farisia, kammayatompa sikontu tu Yahudia, sanna' sikali nakatutuina ada'-ada'na tu riolona ke'nanga. Tena nangnganre ke'nanga punna tena nabissai rolong limanna ke'nanga manuru' cara-cara nipattantua.

⁴Apa-apa niballia ri pasaraka tena nakkulle nikanre punna tena nibissai rolong. Siagang jai pole atorang-atorang maraeng, battua ri tu riolona ke'nanga, nata'gala' jarre' dudui ke'nanga; kammaya ebara'na: a'bissaya kaca pangnginungang, mangko', siagang pakkakasa' tambagaya.

⁵Lanri kammana minjo nakkuta'nammo tu Farisia siagang guru-guru agamaya mae ri Isa, angkana, “Angngapa natena nabissai limanna ana'-ana' gurunNu punna ero' angnganre? Apa saba'na natena naturuki ana'-ana' gurunNu ada'-ada'na tu riolota?”

⁶ Appialimi Isa Nakana, “Ikau tu munape' ngasengko! Annaba sikali apa le'baka napau la'bi riolo Na'bi Yesaya ri wattunna nasero kana angkanaya, ‘Kammaminne kananNa Allata'ala, Anne taua poro bawana ngasenji anynyomba ri Nakke, mingka nyawana bella sikali ri Nakke.

⁷Tena matu-matunna ke'nanga anynyomba ri Nakke, Nasaba' atorang rupatau napangngajarrang sangkamma angkana iaminjo pangatorangKu!’

⁸Tanujampangiai atoranNa Allata'ala, na nuta'gala' jarre' atorang rupataua.”

⁹Nampa Nakana pole Isa, “Cara'de' sikaliko ansorongbokoi apa Napassuroanga Allata'ala, sollanna akkulle nupakajarre' atorang kalennu.

¹⁰ Nasaba' le'ba' mako nasare Musa anne parentaya angkana, ‘Pakala'biriki anrong-manggenu,’ siagang ‘Inai-nai ampakka'-pakkanai anrong-manggena musti nihukkung matei.’

¹¹Mingka ikau ngaseng nupangngajarrangi angkanaya: Punna nakana taua ri anrong-manggena, ‘Apa lakupassareanga ri katte le'ba'mi kupassidakkang mae ri Allata'ala,’

¹²lanri kammana minjo na nulappassammo taua ambalang parekangi anrong-manggena.

¹³Jari, battu ri pangngajarrannu ngaseng tonji, na nupattaenamo kana-kananNa Allata'ala. Jai pole apa sangkammaya anne nugaukang ngaseng.”

¹⁴Nampa Nakio' pole Isa sikalipa anjo tau jaia, na Nakana ri ke'nanga, “Pilangngerimi sollanna nupahang!

¹⁵Teai apa-apa battu pantaraka antama' ri bawana taua ampa'jari ra'masaki se'rea tau. Passangalinna apa-apa assuluka battu ri bawana taua iamintu akkulle ampa'jari ra'masaki se'rea tau. [

¹⁶Jari, punna nia' tolinnu, pilangngerimi.]”

¹⁷Ri wattunna Nabokoimo Isa anjo tau jaia nampa antama' ri balla', napakkuta'nangammi ana'-ana' gurunNa apa battuanna anjo pangngebarang le'baka Napau Isa.

¹⁸Nakanamo Isa ri ke'nanga, “Apaka tena ijapa nupahangi? Maka takkulleai nupahang angkanaya anjo apa-apa antamaya ri bawana taua tena nakkulle ampa'jari ra'masaki taua?

¹⁹Nasaba' anjo apa antamaya tena nanjoreng ri nyawaya numalo; passangalinna anjorengi ri parruka numalo, nampa assulu' poleang.” Battu ri akkana kammana Isa, naNapakasingara'mo angkanaya sikontu apa-apa nikanrea hallala' ngasengi.

²⁰Nampa Nakana pole Isa, “Apa-apa assuluka battu ri bawana taua, iaminjo ampa'jari ra'masaki se'rea tau.

²¹Nasaba' battu lalammi, iamintu battu lalang ri nyawana, ammumba ngaseng pikkirang-pikkirang kodia nakkulle taua a'gau' sala, a'lukka', ammuno,

²²a'gau' salimara', annipu, appitina, siagang anggaukangi sikamma apa-apa ja'dalaka, ampa'jari taua angngoa, tenangngasseng atorang, assereati, tampo, kammayatompa susai niajara'.

²³Sikontu apa-apa kodia, battu lalang ngasengi ammumba, na iaminjo ampa'jari ra'masaki taua.”

²⁴Le'baki anjo a'lampami Isa ambokoi anjo tampaka nampa mange ri daera ambania ri kota Tirus. Antama'mi ri se'reang balla'. Taerokai niasseng ri taua angkana niaki anjoreng. Mingka takkulleai Nacokko KalenNa.

²⁵Nia' sitau baine, nasosoki setang ana' bainena. Nalangngere'mi kabara'na Isa. Battumi mae ri Isa nassu'ju' ri dallekanNa.

²⁶Nampa napala' dudu ri Isa sollanna Nabongka assulu' anjo setanga battu lalang ri ana'na. Anjo bainea teai tu Yahudi. Anjorengi ri daera Fenisia, pa'rasangang Siria, nilassukang.

²⁷Jari Nakanamo Isa ri ia, “Ana'-anaka rolong musti nisare kanre. Tabajikai nialleang kanrena ana'-anaka nampa nipasambila mange ri kongkonga.”

²⁸Appialimi anjo bainea nakana, “Annaba sikali kananTa, Tuang; manna kongkong niaka irawanganna mejaya, angnganre tonji sesa-sesa kanre natu'guranga ana'-anaka!”

²⁹Nakanamo Isa ri ia, “Lanri appiali kammanu, ammotere' mako; assulu' mintu setanga battu ri kalenna ana'nu!”

³⁰Ammotere'mi anjo tu bainea. Battui ri balla', narapikammi ana'na attinro ri katinroanga, siagang assulu' tojemmi anjo setanga battu ri anjo anaka.

³¹Le'baki anjo a'lampami Isa ambokoi daera Tirus, na Napatulusu' lampaNa, allalo ri Sidon mange ri Tamparang Galilea. Oloang allaloa ri daera Sampuloa Kota Naolo.

³²Anjoreng nia'mo se're tau tongolo' siagang pepe naerang taua mae ri Isa. Napala'mi ke'nanga ri Isa, sollanna Napadongko' limanNa irateanganna anjo taua.

³³Naerammi Isa anjo taua a'lampa akkale-kale, nampa Napamange karemenNa ri tolinna anjo taua. Nampa appi'ru na Najama lilana anjo taua.

³⁴Le'baki anjo accongami nai' ri langika, nampa a'mai' la'bu na Nakana ri anjo taua, “Efata,” battuanna, “Tassungke mako!”

³⁵Tassungkemi tolinna anjo taua, siagang a'jari lu'mu'mi ammotere' lilana, sa'genna akkullemi a'bicara.

³⁶Nampa Napisangkai ngaseng Isa anjo taua ancaritai anjo kajarianga manna pole ri nai. Mingka pila' nipisangkai ri Isa, pila' napa'la'banji ke'nanga anjo kajarianga.

³⁷Nalannasa' ngasemmo taua allangngereki. Nakana ke'nanga, “Napa'jari baji' ngasemmi tau garringa! Ba'lalo Napa'jarimi allangngere' tau tongoloka, siagang a'bicara tau pepea!”