Read Makassar Version – KITTA' MATANGKASA MARKUS 8 Bible Online

MARKUS 8 - Makassar Version – KITTA' MATANGKASA bible

MARKUS 8

¹Tasalloai le'ba'na anjo, nia'mo pole siapa are jaina tau battu a'rappungang. Na lanri tena kanrena ke'nanga Nakio'mi Isa ana'-ana' gurunNa nampa Nakana,

²“Tu'guru' pangngamaseangA' anciniki anne tau jaia. Tallungallomi anrurungangA', nakamma-kamma anne kala'busammi ke'nanga ri kanre.

³Punna Kusuro ke'nanga a'lampa natena bonena battanna, akkullei pinsang ri aganga. Sarropa pole kajai ri ke'nanga tau battu bella.”

⁴Appialimi ana'-ana' gurunNa Isa nakana, “Kemae taua lakkulle anggappa kanre ri tampa' tassa'la' kammaya anne untu' tau sikammaya jaina?”

⁵Akkuta'nammi Isa Nakana, “Siapa jaina roti nia' ri kau ngaseng?” Appialimi ke'nanga angkana, “Tuju.”

⁶Nasuromi Isa anjo tau jaia ammempo ri tompo'na buttaya. Nampa Naalle anjo roti tujumbatua Nappala' sukkuru' ri Allata'ala. Le'baki anjo Nabage-bagemi anjo rotia. Nampa Nasare ana'-ana' gurunNa antawa-tawai anjo tau jaia. Natawa-tawami ana'-ana' gurunNa anjo rotia.

⁷Nia' todong siapa are juku' ca'di-ca'dina ke'nanga. Naallemi Isa anjo jukuka nampa appala' sukkuru' ri Allata'ala. Nampa Nasuro ana'-ana' gurunNa antawa-tawa tongi anjo jukuka.

⁸Angnganremi ke'nanga sa'genna bassoro'. Anjo taua kira-kira nia' patassa'bu jaina. Le'baki anjo napasse'remi ana'-ana' gurunNa Isa kanre alla'bia. Nia' tuju baku' jaina rassi ngaseng. Nampa Nasuro Isa ammotere' anjo tau jaia.

¹⁰Na Ia siagang ana'-ana' gurunNa, nai'mi ri biseang nampa a'lampa mange ri Dalmanuta.

¹¹ Nia' siapa are tu Farisi battu mae ri Isa, nappakkaramulamo naagang a'gea' Isa, ero' ampa'boyangi kasalang. Nasuromi ke'nanga Isa appa'nia' gau' appakalannasa', a'jari pammatei ma'nassa battu tojengi ri Allata'ala.

¹² Akkunraremmi Isa nampa appiali Nakana, “Apa saba'na anne taua ri jammanga nasuroA' appa'nia' gau' appakalannasa'? Tena! Tena nalaKupa'niakkang pammatei kammaya ke'nanga!”

¹³Nampa a'lampa Isa ambokoi ke'nanga, Nantama' ri biseanga; nampa a'limbang anta'leang ri ba'leanna tamparanga.

¹⁴Nakaluppai ana'-ana' gurunNa Isa angngerang roti. Sibatuji roti nia' ri ke'nanga lalang ri biseanga.

¹⁵ Nakana Isa ri ke'nanga, “Tutuko ri pa'gambanna tu Farisia siagang pa'gambanna Herodes.”

¹⁶Appakkaramulami nabicara ana'-ana' gurunNa Isa anjo passalaka. Nakana ke'nanga, “Nakkana kamma anjo katena ningngerang roti.”

¹⁷Naassengi Isa anjo apa nabicaraya ke'nanga. Jari akkuta'nammi ri ke'nanga Nakana, “Angngapa naia nubicara anjo passala' tenana roti? Apa tena ijapa nuassengi siagang nupahangi? Angngapa nukurang pahang kamma?

¹⁸ Nia' ngaseng matannu, angngapa natena nuccini'? Nia' tolinnu, angngapa natena nullangngere'? Tenamo nuu'rangi

¹⁹anjo passala' limambatua roti, le'baka Kubage-bage untu' tau limassa'bua? Pirangbaku' rassi ammantang le'baka nupasse're?” Appialimi ke'nanga angkana, “Sampulo anrua.”

²⁰Akkuta'nammi pole Isa Nakana, “Wattunna Kubage-bage anjo roti tujumbatua untu' patassa'bu tau, pirambaku' ammantang le'baka nupasse're?” Appialimi ke'nanga angkana, “Tuju.”

²¹Nakanamo pole Isa, “Jari tena ijapa nupahangi?”

²²Battumi ke'nanga ri Betsaida. Anjoreng nia'mo tau buta naerang taua mae ri Isa, na napala' ri Isa sollanna Najama anjo tau butaya.

²³Jari Nata'gala'mi Isa limanna anjo tau butaya naNarenreng assulu' battu ri anjo kotaya. Nampa Napi'rui Isa matanna anjo taua. Napadongkoki limanNa ri matanna anjo taua, nampa akkuta'nang ri ia Nakana, “Akkulle mako accini' apa-apa kamma-kamma anne?”

²⁴Accini'mi mae ri dallekang anjo taua, nampa nakana, “Iye'. Accini'ma' tau a'jappa-jappa mingka sangkammai ke'nanga poko'-poko'.”

²⁵Napamangemi pole limanNa Isa ri matanna anjo taua. Nampa napikulle-kulleimi pole accini' anjo taua. A'jari baji'mi matanna siagang baji' ngasemmi nacini'na apa-apaya.

²⁶Le'baki anjo Nakanamo Isa ri anjo taua, “Ammotere' mako, siagang teako ammoteri mange ri anjo kotaya.”

²⁷A'lampai Isa siagang ana'-ana' gurunNa mange ri desa-desaya, ri ampi'na Kaisarea Filipi. Ri tangngana aganga akkuta'nammi Isa ri ke'nanga Nakana, “Manuru' kananna taua, inaiA' anne?”

²⁸ Appialimi ke'nanga angkana, “Nia' angkana Yohanes Paje'ne'; nia' todong angkana Elia; na maraenganga angkana: kalase'renna na'bia.”

²⁹ Akkuta'nammi Isa Nakana, “Mingka manuru' panggappanu ngaseng todong, inaiA' anne?” Appialimi Petrus nakana, “IKattemi Karaeng Mappasalamaka!”

³⁰Nampa nipakainga'mo ke'nanga ri Isa, sollanna tena nanapappiassengangi ke'nanga KalenNa Isa ri taua, manna pole ri nai.

³¹Le'baki anjo, appakkaramulami Naajara' Isa ana'-ana' gurunNa angkanaya, musti jai passessa laNagappa Ana' Ma'rupataua. Siagang lanimusui ri pamimping-pamimpinga, ri imang-imang kapalaya, kammayatompa guru-guru agamaya. Lanibunoi, mingka ri makatalluna alloa lattallasa' poleangi.

³²Singara' sikalimi bateNa Isa ampauangi ke'nanga, ri sesena anjo passalaka. Nibeso'mi Isa ri Petrus mae ri sa'ri, nampa napakainga'.

³³Mingka assailemi Isa naNaciniki ngaseng ana'-ana' gurunNa. Nampa Nakalarroi Petrus Nakana, “A'lampako anrinni setang! Pikkirannu, pikkirang rupatau; teai pikkiranNa Allata'ala!”

³⁴ Nampa Nakio' Isa anjo tau jai niaka anjoreng, siagang ana'-ana' gurunNa. Nampa Nakana ri ke'nanga, “Tau eroka amminawang ri Nakke, musti nakaluppai kaparalluang kalenna, nampa napisang salli'na, natulusu' amminawang ri Nakke.

³⁵ Nasaba' tau eroka angkatutui tallasa'na, iami latappela' tallasa'na. Mingka tau eroka angkoro'bangkangi tallasa'na untu' iNakke, siagang untu' Kabara' Baji' battua ri Allata'ala, iami lanipasalama'.

³⁶Apa baji'na mae ri se'rea tau, punna akkulle nakammai anne linoa, mingka tappelaki tallasa'na?

³⁷Maka akkullei anjo tallasaka nipassambe pa'barang-barangang?

³⁸Punna nia' tau siri'-siri' angngakuiA' siagang pangngajarangKu ri anne jammang sannaka dorakana siagang ja'dala'na, tena todong Naero' Ana' Ma'rupataua angngakui sallang punna battui siagang koasaNa ManggeNa, nirurungang ri malaeka'-malaeka' matangkasa'Na.”