Read Makassar Version – KITTA' MATANGKASA MARKUS 9 Bible Online

MARKUS 9 - Makassar Version – KITTA' MATANGKASA bible

MARKUS 9

¹Nakana Isa, “Assemmi angkanaya, ri alla'nu anne niaka anrinni kamma-kamma anne, nia' tena nalamate, ri wattu tenanapa naciniki Allata'ala ammarenta siagang kakoasanNa!”

² Annangallo le'ba'na anjo Naerammi Isa iamintu Petrus siagang Yakobus na sari'battanna Yohanes, mange tassa'la' ri se'reang bulu' tinggi. Amminrami tanja'Na Isa ri dallekanna ke'nanga.

³PakeanNa a'jari sanna'mi kebo'na. Tena manna sitau tukang minatu ri lino akkulle assassa kamma anjo kebo'na.

⁴Nampa nacini' anjo tallua ana' gurunNa Isa, a'bicara Isa siagang Elia siagang Musa.

⁵Nakanamo Petrus ri Isa, “O Pa' Guru, baji' sikali nikasia' anrinni. Bajiki punna ambangungki' tallu kema: se're untu' iKatte, se're untu' Musa, siagang se're untu' Elia.”

⁶Sikontutojenna tanaassengai Petrus angkana apa anjo ero' napau, nasaba' malla'na ngaseng ke'nanga.

⁷ Nampa battu rammanga antongkoki ke'nanga. Na battu lalang ri rammanga, nia'mo sa'ra angkana, “Iaminne AnakKu Kukamaseanga. Pilangngerimi kananNa!”

⁸Linta'mi accini' mange ri tammulilina ke'nanga. Mingka tenamo nacini' manna sitau angngagangi ke'nanga, pantaranganna Isa.

⁹Wattunna naung ke'nanga battu ri buluka, nipakainga'mi ke'nanga ri Isa angkana, “Teako pau-paui manna ri nai, anjo apa nucinika sumpaeng, punna tenapa nattallasa' poleang Ana' Ma'rupataua battu ri kamateanga.”

¹⁰Napilangngerimi ke'nanga anjo pappasanga. Mingka appakkaramulami nabicara para ia ke'nanga apa battuanna anjo kananNa Isa angkanaya, “attallasa' poleangi battu ri kamateanga.”

¹¹ Jari akkuta'nammi ke'nanga ri Isa angkana, “Angngapa na napau guru-guru agamaya angkana, musti Elia battu la'bi riolo?”

¹²Appialimi Isa Nakana, “Memang Elia battu la'bi riolo untu' ampasadiai yangaseng-ngasenna parallua. Mingka antekamma ia passala'na Ana' Ma'rupataua? Apa saba'na na tattulisi' lalang ri Kittaka angkanaya lajai sessa laNapisa'ringi siagang lanihinai ri taua?

¹³Mingka Kupauang ngaseng mako anne angkanaya: Nia'mi battu Elia, nasangka' rupa nigaukangi ri ke'nanga. Sicoco'mi siagang apa le'baka tattulisi' lalang ri Kittaka anjo apa kajarianga ri kalenna.”

¹⁴Ri wattunna a'rappungammo pole Isa siagang tallua ana' gurunNa siagang ana'-ana' gurunNa maraenga, jaimi tau nacini' ke'nanga. Nia' siapa are guru agama angngagangi a'gea' anjo ana'-ana' gurunNa Isa.

¹⁵Nacini'na taua nia' battu Isa, takkalannasa'mi ke'nanga, nampa lari-lari mange anruppai.

¹⁶Nakanamo Isa ri ana'-ana' gurunNa, “Apa nupa'geakkang siagang anjo guru-guru agamaya?”

¹⁷Appialimi kalase'renna tau jaia angkana, “O Pa' Guru, kuerangi anakku mae ri Katte. Pepei nasaba' nasosoki roh ja'dala'.

¹⁸Punna nibattuiseng ri roh ja'dalaka, napatappa'-tappasaki kalenna naung ri buttaya, nampa a'busa bawana, a'rekuki giginna siagang ka'doro' ngasengi kalenna. Kupalaki ri ana'-ana' gurunTa sollanna nabongka assulu' anjo roh ja'dalaka, mingka tanakulleai ke'nanga.”

¹⁹Nakanamo Isa ri ke'nanga, “Teai ngasengko sipato' anne! Tau tena ngaseng tojeng tappa'nu. Siapapi salloKu lammantang anrurungangko siagang lasa'bara' ri kau ngaseng? Erangi mae antu anaka!”

²⁰Naerammi ke'nanga anjo anaka mae ri Isa. Nacini'na roh ja'dalaka Isa, napa'jari ka'doro'mi kalenna anjo anaka, sa'genna tu'guru' anjo anaka anggulung-gulung ri buttaya. A'busai bawana.

²¹Akkuta'nammi Isa ri manggena anjo anaka nakana, “Siapami sallona appakamma anne?” Appialimi manggena nakana, “Pakkaramula ri ca'dina!

²²A'mole-molemi anjo roh ja'dalaka ero' ambunoi, naalle natu'gurang antama' ri pepeka siagang antama' ri je'neka. Mingka punna akkulleKi' antulungi, Kikamaseang sai siagang Kitulung sai!”

²³Appialimi Isa Nakana, “Apa kanannu? Punna akkulleKi'? Yangaseng-ngasenna akkullei, assala' tappa' taua!”

²⁴Ammarrang lompomi linta' manggena anjo anaka, nakana, “O Batara, tappakka', mingka kurang jarreki tappakku. Kitulunga' sollanna a'jari jarre' tappakku!”

²⁵Wattunna Nacini' Isa, angkanaya appakkaramulami jai tau battu a'lipung, Nasuromi a'lampa anjo roh ja'dalaka. Nakana, “E kau roh tongoloka siagang pepea, Kuparentakangko assulu' battu lalang ri kalenna anne anaka, siagang tea' laloko antamakki pole!”

²⁶Ammarrammi anjo roh ja'dalaka, nampa napa'jari ka'doro' kalenna anjo anaka, nampa assulu'. A'jari pi'lasa'mi anjo anaka, sangkamma maya' nicini', sa'genna nakana ngaseng taua, “Matemi!”

²⁷Mingka Nata'gala'mi Isa limanna anjo anaka, na Nabantu ambangung. Nambangummo anjo anaka.

²⁸Ri wattunna nia'mo Isa ri balla', na Ia mami siagang ana'-ana' gurunNa, akkuta'nammi ana'-ana' gurunNa angkana, “Apa saba'na nakitakkullea ikambe ambongkai anjo roh ja'dalaka?”

²⁹Appialimi Isa Nakana, “Anjo setang kammaya takkulleai nibongka manna pole antekamma carana, pantaranganna appala' doanga.”

³⁰Nabokoimi Isa siagang ana'-ana' gurunNa anjo tampaka, napatulusu' lampana angngolo ri Galilea. Taerokai niasseng ri taua angkana kemaei,

³¹nasaba' sitabangi Naajara' ana'-ana' gurunNa, “Lanipassareangi Ana' Ma'rupataua mae ri koasana tu linoa, nampa nibuno; mingka ri makatalluna alloa lattallasa' poleangi!” Kammaminjo kananNa Isa.

³²Tanapahangai ana'-ana' gurunNa Isa anjo apa Napangngajaranga, mingka mallaki ke'nanga akkuta'nang ri Ia.

³³Battumi ke'nanga mange ri Kapernaum. Ri wattunna nia'mo ri balla', akkuta'nammi Isa ri ana'-ana' gurunNa Nakana, “Apa nupa'geakkang sumpaeng ri aganga?”

³⁴ Tena nappiali ke'nanga. Nasaba' a'gea'-geaki ke'nanga sumpaeng ri aganga passala' inai ri ke'nanga kaminang lompo.

³⁵ Ammempomi Isa nampa Nakio' anjo sampuloa anrua ana' gurunNa. Nakanamo ri ke'nanga, “Inai-nai ero' a'jari lomoro' se're, musti napa'jari tu ri bokoi kalenna siagang a'jari palayangi ri sikontu taua.”[1]

³⁶Nampa angngalle Isa sitau ana'-ana' ca'di naNasuro anjo ana' ca'dia ammenteng ri dallekanna ke'nanga. Naraka'mi Isa anjo ana' ca'dia nampa Nakana ri ana'-ana' gurunNa,

³⁷ “Inai-nai antarimai ana'-ana' kammaya anne nasaba' iNakke, akkulle nikana iNakkemi natarima. Na inai-nai antarimA', teai Nakke bawang natarima, mingka akkulle nikana natarima tommi ManggeKu, assuroA'.”

³⁸Nakanamo Yohanes ri Isa, “O Pa' Guru, nia' le'ba' nacini' ikambe tau ambongkai setanga lalang arenTa. Na kupisangkai, nasaba' teai taunta.”

³⁹Mingka angkanami Isa, “Teako pisangkai. Nasaba' tenanniakka tau a'gau' appakalannasa' lalang arengKu, akkulle ampau kodiA'.

⁴⁰ Nasaba' tau tenaya namusuki', akkulle nikana a'jari agangi ri katte.

⁴¹ U'rangi! Inai-nai assareko je'ne' inung lanri ana' gurunnako Karaeng Mappasalamaka, mattantu lanagappai pahalana.”

⁴²“Inai-nai a'jari passabakkang na'jari tenamo natappa' ri Nakke kalase'renna tau ca'di kammaya anne, bajikangangi punna nigentungi batu kallonna nampa nibuang naung ri tamparanga.

⁴³ Punna passala' limannu nu'gau' dosa, polongi anjo limannu assala' salamakko, kala anggannaka rua limannu mingka antamakko ri naraka, ri pepe' a'rinraya satunggu-tungguna. [

⁴⁴Anjoreng takkulleai mate rinrana pepeka, siagang takkulleai mate oloka.]

⁴⁵Siagang punna passala' bangkennu nu'gau' dosa, polongi anjo bangkennu. Bajikangangi tenaya siali bangkennu assala' salamakko, kala anggannaka rua bangkennu mingka nipelakko antama' ri naraka. [

⁴⁶Anjoreng takkulleai mate rinrana pepeka, siagang takkulleai mate oloka.]

⁴⁷ Punna passala' matannu nudoraka, kocciki assulu' anjo matannu! Bajikangangi tenaya siali matannu assala' antamakko ri Lino BeruNa Allata'ala, kala anggannaka rua matannu mingka nipelakko antama' ri naraka.

⁴⁸ Anjoreng takkulleai mate rinrana pepeka, siagang takkulleai mate oloka.

⁴⁹Sikontu taua lanitangkasi siagang pepe', sanrapang koro'bang olo'-oloka nitangkasi siagang ce'la.

⁵⁰ Anjo ce'laya bajiki; mingka punna a'jari la'bamo, maka akkulle iji nipa'jari ce'la poleang? Jari paralluko sanrapang ce'laya. Sikatutuiko lalang ri tallasa'nu.”