Read Makassar Version – KITTA' MATANGKASA LUKAS 1 Bible Online

LUKAS 1 - Makassar Version – KITTA' MATANGKASA bible

LUKAS 1

¹Natarimai tu nipakala'birikku Teofilus, Iaji kupabattuangki' angkanaya, jaimi tau le'ba' ansusung bajiki siagang antulisiki sikamma apa le'baka kajariang ri tangnga-tangngata.

²Sikamma apa le'baka nicarita mae ri katte, battu ri tau le'baka anciniki anjo kajarianga battu ri pakkaramulanna, yangaseng minjo natulisi' ke'nanga, nampa napa'la'bang kabara'na.

³Le'ba' ngasemmi kupilajari baji'-baji' battu ri pakkaramulanna sikamma anjo apa le'baka kajariang. Jari kupikkiriki angkanaya, bajiki punna kupannulisangki' se're laporang nisusung bajika ri passala'na sikamma anjo apa-apa le'baka kajariang.

⁴Na iaji nakupare' anne laporanga, sollanna akkulle kiasseng angkanaya ma'nassa tojengi anjo apa le'baka nipangngajarrang mae ri katte.

⁵ Ri wattunna Herodes a'jari karaeng ri pa'rasangang Yudea, nia' se're imang niareng Zakharia, sossorang battua ri imang-imang Abia. Tu ri balla'na niarengi Elisabet, sossorang imang todong.

⁶Ningai ri Allata'ala katallassang pakkalabinianna ke'nanga. Nasaba' tutui ke'nanga anturuki ero'Na Allata'ala siagang sikamma atorang Napassareanga Allata'ala.

⁷Tena ana'na ke'nanga, nasaba' takkulleai ammana' Elisabet. Nampa toa rua-ruamo ke'nanga.

⁸Nia' se're allo na narapi' wattunna sossoranna Imang Abia a'jari imang ri Balla'Na Batara. Jari anjo wattua, Zakharia a'jari imang ri dallekanNa Allata'ala.

⁹Le'baki niloterei, kamma biasaya nagaukang imang-imanga, iami nijo'jo' antama' ri Balla'Na Batara attunu kamanynyang.

¹⁰Sitabanna nitunu kamanynyanga, assambayammi tau jaia pantarang.

¹¹Anjo wattua battumi malaeka'Na Allata'ala ampappicinikangi kalenna mae ri Zakharia. Ammentemmi anjo malaekaka ri sa'ri kananna mejang pa'dongkokanna kamanynyang nitunua.

¹²Nacini'na Zakharia anjo malaekaka, a'jari lingu-lingumi napakamma malla'.

¹³Mingka nakanamo anjo malaekaka, “Teako mallakki Zakharia! Nalangngere'mi Allata'ala pappala' doannu. Lammanaki tu ri balla'nu Elisabet, sitau bura'ne. Anjo anaka sallang musti nuarengi Yohanes.

¹⁴Lasanna' rannunu, siagang jai tau la'jari rannu punna lassu' sallang anjo anaka!

¹⁵ La'jari tu nipakalompoi ri dallekanNa Allata'ala. Talangnginungai anggoro' siagang inungang terasa'. Pakkaramula battu ri nilassukanna lanirurungangi ri RohNa Allata'ala.

¹⁶Jai tu Israel lanaerang ammotere' mae ri Allata'ala, Batarana ke'nanga.

¹⁷ La'jari tunisuro magassinNai Allata'ala, siagang lakoasai sangkamma Na'bi Elia. Lanapassiamaki manggea siagang ana'na. Na lanapimping tau tenaya nappilangngeri kana sollanna ammotere' mange ri pikkirang annabaya. Jari appasadiami se're umma' sadia anruppai kabattuanNa Batara.”

¹⁸Akkuta'nammi Zakharia ri anjo malaekaka nakana, “Antekamma batena nakkulle kupahang angkanaya lakajariang tojengi anjo kipakkanaya? Nasaba' inakke toama', na tu ri ballakku toa tommi.”

¹⁹ Appialimi malaekaka angkana, “Inakke minne malaeka' Gabriel. Inakke palayanNa Allata'ala, na Iami assuroa' ampabattui anne kabara' bajika mae ri kau.

²⁰Anne apa kupaua, ma'nassa la'rupai punna narapi'mo wattunna. Mingka lanri tenana nutappa', la'jari pepe mako; na iapa nukkulle a'bicara ammotere', punna a'rupamo anne apa kupauangangko.”

²¹Anjo wattua, nitayammi passulu'na Zakharia ri taua. Lannasaki ke'nanga, apa saba'na nasallo kamma Zakharia lalang ri Balla'Na Batara.

²²Na ri wattunna assulu'mo Zakharia, takkulleami a'bicara ri ke'nanga. Limanna mami tuli napagio' punna ero' a'bicara, nasaba' a'jari pepemi. Jari naassemmi taua angkana nia'mo apa-apa nacini' lalang ri Balla'Na Batara.

²³Le'ba'namo nagaukang jama-jamanna ri Balla'Na Batara, ammotere'mi Zakharia ri balla'na.

²⁴Tasalloai ribokoanganna, tianammi Elisabet, na nakurummo kalenna lalang ri balla' limambulang sallona.

²⁵Nakanamo Elisabet, “Kale'bakkanna Natulumma' Batara siagang Natongkokamma' sirikku.”

²⁶Ri wattunna annang bulammo tianang Elisabet, Nasuromi Allata'ala malaeka' Gabriel mange ri kota Nazaret ri daera Galilea.

²⁷ Nisuroi malaeka' Gabriel mange ri sitau tulolo niarenga Maria. Anjo tuloloa eroki nipasialle siagang Yusuf, sossoranna Karaeng Daud.

²⁸Battumi anjo malaekaka mae ri Maria na nakana, “Salamakko, ikau tu nibarakkakia ri Batara! Poro nirurungangko ri Batara!”

²⁹Nalangngere'na Maria kananna anjo malaekaka, ta'bangka sikalimi. Akkuta'nammi lalang ri pa'mai'na angkana apa battuanna anjo sallanna malaekaka.

³⁰Jari nakanamo pole anjo malaekaka, “Teako mallakki Maria, nasaba' ikau tu nipangngellaiko ri pa'mai'Na Allata'ala.

³¹ Latianangko, siagang lammanakko sitau ana' bura'ne, na musti nuarengi Isa.

³² La'jari tu nipakala'biriki, siagang lanigallaraki Ana'Na Allata'ala Kaminang Tinggia. Lanipa'jari KaraengI ri Karaeng Allata'ala sangkamma Karaeng Daud boeNa.

³³Siagang lammarentai salaku Karaeng satunggu-tungguna ri boe-boena Yakub. Tena kala'busanna bateNa lammarenta.”

³⁴Nakanamo Maria ri malaekaka, “Mingka tulolo ija', antekamma lakkulle lakajariang anjo kipakkanaya?”

³⁵Appialimi malaekaka nakana, “Labattui RohNa Allata'ala mae ri kau, siagang laniaki koasaNa Allata'ala anrurungangko. Lanri kammana, anjo ana' lalassuka lanigallaraki Matangkasa', Ana'Na Allata'ala.

³⁶U'rangi: anjo bijannu Elisabet tianang annang bulammi, manna natoamo, siagang nakana taua tamanangi.

³⁷ Nasaba' punna Nakaerokang Allata'ala, tena apa-apa takkulle Napa'jari.”

³⁸Nakanamo Maria, “Inakke anne, atanNa' Allata'ala; boli'mi kamma nakajariang ri nakke, antu kipakkanaya.” Le'baki anjo a'lampami anjo malaekaka ambokoi Maria.

³⁹Le'baki anjo, a'lampami linta' Maria mange ri se'reang kota ri pa'rasangang Yudea, rate buluka.

⁴⁰A'lampai mange ri balla'na Zakharia. A'barisallammi ri Elisabet wattunna antama' ri balla'.

⁴¹Na nalangngere'na Elisabet barisallanna Maria, a'gio'mi anjo ana' natiananganga. Nikoasaimi Elisabet ri RohNa Allata'ala;

⁴²a'gorami Elisabet nakana, “Ikaumi baine kaminang nibarakkakia ri sikontu bai'-bainea! Poro nibarakkakimi anjo ana' lanulassukanga!

⁴³Inai tonga' anne, nabattukamma amma'Na Batara mae ri nakke?

⁴⁴Kulangngere'na sallannu, a'gio'mi napakamma rannu anne ana' kutiananganga.

⁴⁵Mate'ne mako, lanri tappa'nu angkanaya lakajariangi ri kalennu anjo Napabattua Batara ri kau!”

⁴⁶ Nakanamo Maria, “Mammuji atingku ri Batara,

⁴⁷nama'rannu-rannu nyawaku kalanri Allata'ala Mappasalamakku.

⁴⁸ Iami mangngu'rangi ri nakke, anne ata tuna duduNa! Anne kamma sikontu bansaya mangkana minne ri nakke, inakkemi tau mate'ne.

⁴⁹Lanri Allata'ala Kaminang Makoasa a'gau' malompo ri kalengku. Nitangkasimi arenNa.

⁵⁰Sossorang mange ri sossorang tuli nikamaseang ri Batara tau mallaka ri Ia.

⁵¹Lima makoasaNa mappasimbung tau borro, na mangngaco ri ero' sala.

⁵² Napanaung ri empoanna sikontu tu nikaraengang napanai' ri tinggia, sikontua tu nihina.

⁵³Nabassori inai cipuru', battu ri kabajikanNa naNabongka tu kalumanynyang a'lampa tamangngeranga.

⁵⁴Natulungi Israel atanNa, lanri janji le'ba' Napare' mae ri boe-boeta.

⁵⁵ Batara tamakkaluppa ri janjinNa baji' ati ri Abraham na sossorang satungguna.”

⁵⁶Niaki kira-kira tallum bulang sallona ammantang Maria ri balla'na Elisabet, nampa ammotere' mange ri balla'na.

⁵⁷Narapi'mi wattunna lammana' Elisabet. Ammana'mi sitau ana' bura'ne.

⁵⁸Nalangngere' ngasemmi sambori'na siagang bija-bijanna antekamma baji'na Batara mae ri Elisabet. Na rannu ngaseng tommo nyawana ke'nanga sangkamma Elisabet.

⁵⁹ Ri wattunna sagantuju allomo umuru'na anjo anaka, battumi ke'nanga ansunnaki anjo anaka. Ero'mi ke'nanga nasare areng Zakharia anjo anaka, sangkamma arenna manggena.

⁶⁰Mingka nakana amma'na, “Tena, musti niarengi Yohanes.”

⁶¹Nakanamo ke'nanga ri Elisabet, “Mingka tena manna sitau bija-bijannu kammanjo arenna.”

⁶²Jari, akkuta'nammi ke'nanga ri Zakharia, a'bicara kamma tu pepe, angkana apa laniarengangi anjo anaka.

⁶³Appala'mi Zakharia se're batu pannulisang nampa natulisi' angkana, “Yohanes arenna.” Lannasa' ngasemmi ke'nanga.

⁶⁴Na anjo wattua akkullemi a'bicara pole Zakharia siagang ammuji-muji ri Allata'ala.

⁶⁵Malla' ngasemmi sambori'na; na tassiara'mo anjo kabaraka ri sikontu daera monconga ri Yudea.

⁶⁶Akkuta'nang ngasemmi lalang ri atinna sikontu tau allangngerekai anjo kabaraka angkana, “La'jari apai anjo anaka sallang?” Nasaba' nirurungangi ri Batara anjo anaka.

⁶⁷Anjo Zakharia, manggena anjo anaka, nikoasaimi ri RohNa Allata'ala. Jari napabattumi pappasang battua ri Batara, angkana,

⁶⁸“Umba kimammuji ri Batara, Allata'alana bansa Israel! Battumi antulungi umma'Na na Nalappassang ke'nanga.

⁶⁹Nasaremaki' tu Mappasalama' makoasaya, ikatte atanNa, sossoranna Daud.

⁷⁰Battu ri riolo duduji na Napabattumo na'bi-na'bi nipilea, angkana le'ba'mi assare janji Batara

⁷¹ero' ampasalamakki' battu ri musunta ngaseng na battu ri kakoasanna sikamma tu birisika ri katte.

⁷²Lanri ero'Na napappicinikang baji' atinNa ri tu riolota, na laNapa'rupa anjo janji matangkasa'Na.

⁷³Le'ba'mi assumpa ri boeta Abraham, a'janji ero' ampasalamakki' battu ri musunta ngaseng, sollanta akkulle allayani ri Ia

⁷⁴

⁷⁵kitamalla'-mallaka, kituli anynyomba ri Ia, ampakasannangi atinNa lalang sikontu tallasatta.

⁷⁶ Ikau anakku, lanigallarakko na'biNa Allata'ala Kaminang Tinggia. Nisuroko rioloangangnganNa Bataraya untu' ampasadiai oloang laNaoloa,

⁷⁷Ampabattui kabaraka mae ri umma'Na angkanaya lanipasalamaki ke'nanga, punna le'ba'mo nipammopporang dosa-dosana ri Allata'ala.

⁷⁸Baji' ati na mangngamaseang Bataraya; battui lanri erotta Napasalama'. Sanrapang mataallo ammumba ri bari'basaka,

⁷⁹ kammaminjo na Nasingari sikontu taua niaka lalang ri sassang siagang kamallakkang. Nauluki' mange ri oloang a'lampa mangea ri kabajikanga.”

⁸⁰Pila' lompomi anjo ana'na Zakharia. Pila' jarre'mi rohna. Ammantammi ri parang lompoa, sa'genna narapi' wattunna napa'nyata kalenna mae ri bansa Israel.