Read Makassar Version – KITTA' MATANGKASA LUKAS 10 Bible Online

LUKAS 10 - Makassar Version – KITTA' MATANGKASA bible

LUKAS 10

¹Le'baki anjo Napileimi pole Isa tujupulo ana' gurunNa, nampa Nasuro ke'nanga a'lampa ta'rua-rua. Nasuroi ke'nanga a'lampa riolo mange ri kota-kota siagang sikamma tampa' eroka Nakunjungi.

² Nakanamo ri ke'nanga, “Jaimi ero' lanikatto, mingka sike'de'ji tau eroka nisuro akkatto. Jari, pala'mi ri Patanna tana, sollanna Nasuro pajamaya battu angkattoi wassele' lamung-lamunNa.

³ Jari a'lampa ngaseng mako! Sanrapangko gimbalaka Kusuro antama' ri tangnga-tangngana kongkong romanga.

⁴ Teako angngerangngi pammoneang doe', yareka purukang pammoneang passidakka, yareka sapatu. Teako ammantangngi ri tangngana aganga untu' assare sallang manna pole ri nai.

⁵Punna antamakko ri se'reang balla', a'barisallangko rolong angkana, ‘Poro nibarakkaki bonena anne ballaka.’

⁶Punna nia' lalang balla' tau nangai annarima barakka', ammantammi anjo barakka'nu ilalang ri anjo ballaka; mingka punna tena, allemi ammotere' anjo barakka'nu.

⁷ Ammantang mako ri se'reang balla'. Tarimami apa napassareanga patanna balla' ri kau, nasaba' sikamma tau anjamaya musti natarimai wassele' jama-jamanna. Teako a'lette'-letteki battu ri se'reang balla' mange ri balla' maraenga.

⁸Punna battuko mange ri se'reang kota, na nitarima bajikko anjoreng, kanremi apa nisareangako.

⁹Balleimi tau garringa ri anjo kotaya, siagang birittakammi mae ri sikamma taua anjoreng angkanaya, ‘Tasalloami Nalappakkaramula Allata'ala ammarenta salaku Karaeng ri tangnga-tangnganu ngaseng.’

¹⁰ Mingka punna battuko mange ri se'reang kota, natena nitarimako anjoreng, assulu' mako ri aganga na nupau angkanaya,

¹¹‘Manna limbu'bu' a'dakkika ri bangkenna ikambe, napabe'bese'mi kambe, a'jari pappakainga' ri kau ngaseng. Mingka assemmi angkanaya a'birimmi narapi' wattunna Nappakkaramulamo ammarenta Allata'ala salaku Karaeng ri tangnga-tangnganu!’

¹² U'rangi, angkanaya ri allonna kiamaka sallang, lalomoangangi nipammopporang ri Allata'ala dosana taua ri Sodom, naia tau niaka ri anjo kotaya!”

¹³ “Cilaka mako ikau tau niaka ri Korazim! Siagang cilaka mako ikau tau niaka ri Betsaida. Naka'de' anjoreng ri kota Tirus siagang ri kota Sidon nigaukang anjo gau'-gau' appakalannasa' le'baka nigaukang ri tangnga-tangnganu, mattantu sallomi le'ba'na toba' tau niaka anjoreng. Siagang sallomi le'ba'na ammakeang tau susa siagang nabonei au ulunna ke'nanga, a'jari pammatei ri katobakkanna ke'nanga.

¹⁴Ri allonna kiamaka sallang, lakkulleangangi nipammopporang ri Allata'ala tau niaka ri Tirus siagang Sidon kala ikau ngaseng.

¹⁵ Na ikau tau niaka ri Kapernaum! Bara' nupikkiriki angkanaya laniangkakko nipakatinggi nai' ri suruga? Tena! Passangalinna lanipelakko antama' ri naraka!”

¹⁶ Nampa Nakana Isa mae ri ana'-ana' gurunNa, “Inai-nai ampilangngeri kanannu, iNakke mintu napilangngeri. Inai-nai ansorongbokoko, iNakke mintu nasorongboko. Na inai-nai ansorongbokoA', nasorongboko tommi Allata'ala assuroA'.”

¹⁷Ammotere'mi anjo tuju puloa ana'-ana' gurunNa Isa, le'baka Nasuro a'lampa. Rannu ngasemmi ke'nanga wattunna ammotere'. Nakana ke'nanga, “O Batara, amminawang turu' ngasengi setanga punna nibongkai ri kambe assala' arenTa nipau!”

¹⁸Appialimi Isa Nakana, “Kucini'mi Billisika tu'guru' battu rate ri langika sangkamma kila'.

¹⁹ Assemmi, angkanaya le'ba' mako Kusare koasa sollannu akkulle angngonjokkangi ularaka siagang olo'-olo' akkullea ammuno tau racunna. Kammayatompa, sollanna akkulle nubeta ngaseng musu-musu kassaka, natena nunggappa kapanrakang.

²⁰Mingka manna nakamma mamo, teako rannu dudui punna amminawammo roh-roh ja'dalaka ri parentanu. Bajikangangi punna rannuko lanri tattulisi'mi arennu lalang ri suruga.”

²¹Anjo wattua rannumi nyawaNa Isa lanri nipantamakki ri RohNa Allata'ala. Nakanamo Isa ri ManggeNa, “O ManggeKu, Batarana langika siagang buttaya! Appala' sukkurukKa' ri Katte, lanri Kicokkoangi anne rahasiaya mae ri tau cara'deka siagang tau niaka pangngissenganna. Mingka Kipappiassengangi mae ri tau tenaya sikolana. Iaminjo Kikarannuanga ri atinTa.

²² Sikontu-kontuna le'ba'mi Kipassareang mae ri Nakke. Tena manna sitau angngassengi anne AnatTa, pantaranganna iKatte. Tena todong sitau angngassengKi', pantaranganna AnatTa, siagang sikamma tau le'baka Napauang AnatTa.”

²³Nampa assaile Isa mae ri ana'-ana' gurunNa, na Nakana ri ke'nanga bawang, “Upa' ngaseng mako ikau, nasaba' nucini'mi anne apa nucinika ri kamma-kammaya anne.

²⁴Nasaba' u'rangi angkanaya: Jai na'bi-na'bi siagang karak-karaeng ero' anciniki anne nucinika ri kamma-kammaya anne, mingka takkulleai nacini' ke'nanga. Eroki ke'nanga allangngereki anne apa nulangngereka ri kamma-kammaya anne, mingka takkulleai nalangngere' ke'nanga.”

²⁵ Nampa nia'mo sitau guru agama battu ero' ampa'boyangi sala Isa. Akkuta'nammi ri Isa nakana, “Bapa' Guru, apa musti kugaukang sollanna akkulle kugappa katallassang satunggu-tunggua?”

²⁶Appialimi Isa Nakana, “Apa tattulisi' lalang ri Kittaka? Antekamma panggappanu ri anjo passalaka?”

²⁷ Appialimi anjo taua nakana, “ ‘Kamaseangi Karaeng Allata'alanu ilalang sitepu atinnu, ilalang sitepu pa'mai'nu, siagang ilalang sikontu pakkullenu, kammayatompa ilalang sikontu akkala'nu,’ na ‘Kamaseangi parannu tau sangkamma todong nukamaseanna batangkalennu.’ ”

²⁸ Nakanamo Isa, “Annabami antu pappialinnu. Gaukang ngaseng minjo na nuattallasa'.”

²⁹Mingka ero'mi napattojeng kalenna anjo guru agamaya. Jari akkuta'nammi pole nakana, “Inai anjo parangku tau?”

³⁰Appialimi Isa Nakana, “Nia' sitau bura'ne a'lampa battu ri Yerusalem naung ri Yerikho. Ri tangngana aganga, niruppaimi ri paella', nanialleang ngaseng apa-apanna, siagang niba'ji nipasitangnga-mate; nampa nibokoi tappalengang ri aganga, sanna' jaina loko'na.

³¹Sitabangi nia' todong sitau imang a'jappa anjoreng ri aganga. Nacini'na anjo taua, a'lilimi nampa napatulusu' jappana.

³²Kamma tomminjo, nia' sitau tu Lewi a'jappa anjoreng ri aganga; ri wattunna nacini' anjo taua tappalengang ri aganga, a'reppese'mi ero' anciniki bajiki anjo taua; mingka kale'bakkanna a'lili tommi nampa napatulusu' jappana.

³³ Mingka ribokoanganna, nia'mo sitau tu Samaria sitabang a'jappa todong anjoreng ri aganga. Ri wattunna nacini' anjo taua tappalengang ri aganga, sanna'mi paccena nyawana lanri nakamaseanna anjo taua.

³⁴A'reppese'mi mange ri anjo taua nampa nabissai loko'na nampa naballei siagang minynya' na anggoro', nampa naroko' kaeng anjo lokoka. Le'baki anjo napanai'mi anjo taua ri jaranna, nampa naerang a'lampa anjo taua mange ri balla' pa'bangngianga naparakai.

³⁵Ammukona, nasaremi doe' anjo patanna balla' pa'bangngiang; na nakana, ‘Parakai baji'-baji' anne taua. Na punna nia' ongko'-ongkoso'na maraenga, kubayarappi sallang punna ammoterekka' pole mae.’ ”

³⁶Nampa Natongko' Isa anjo caritaya siagang Nakuta'nammi anjo taua Nakana, “Battu ri anjo tallua tau, turu' panggappanu, kereanga kalase'renna a'jari paranna tau mae ri anjo tau niellaka?”

³⁷Appialimi anjo guru agama nikuta'nanga angkana, “Ia anjo tau antulungai anjo tau niellaka.” Nakanamo Isa, “A'lampamako padeng nanugaukang todong anjo kammaya!”

³⁸ Le'baki anjo Napatulusu'mi jappaNa Isa siagang ana'-ana' gurunNa, nampa battu mange ri se'reang desa. Anjoreng ri desaya nia'mo sitau baine, niarenga Marta, angkioki Isa mange ri balla'na.

³⁹Anjo Marta nia' sari'battanna niarenga Maria. Na anjo Maria ammempomi ri ampi'Na Isa ampilangngeri kana-kana Napangngajarranga Isa.

⁴⁰Mingka sibu' sikalimi Marta anggaukangi jama-jamanna ri balla'. Mangemi ri Isa angkana, “O Batara, angngapa natena Kijampangi Kipauang Maria ancini'-cinikia' anjama kale-kalengku? Suro sai nanabantua'!”

⁴¹Appialimi Isa Nakana, “Marta, Marta, angngapa na nubata-bata kamma siagang angngapa na'rupa-rupa kamma sibu' nunawa-nawa?

⁴²Sikontutojenna nia' se're passala' la'bi parallu. Na iaminjo se'rea, sannaka baji'na siagang sannaka paralluna le'ba' napilei Maria, tenaya nalatappela'!”