Read Makassar Version – KITTA' MATANGKASA LUKAS 11 Bible Online

LUKAS 11 - Makassar Version – KITTA' MATANGKASA bible

LUKAS 11

¹Nia' se're allo Nappala' doang Isa ri se'reang tampa'. Le'ba'na appala' doang, nia'mo kalase'renna ana' gurunNa angkana ri Ia nakana, “O Batara, Kiajara' sai ikambe appala' doang, sangkamma Yohanes naajaraki ana'-ana' gurunna appala' doang.”

²Jari Nakanamo Isa ri ke'nanga, “Punna appala' doangko, kammaminne batenu a'bicara, ‘Manggea, IKattemi Allata'ala Tenaya Ruanna. Poro iKatte nisomba siagang nipakala'biri'.

³Kisarei allo-allo kanre naparalluanga ikambe.

⁴Kipammopporangi dosa-dosana ikambe, Nasaba' ikambe anne napammopporang tommi sikamma tau kasalanga ri kambe. Siagang teaKi' balang parekangi ikambe nibeta ri paccobaya.’ ”

⁵Nakanamo pole Isa ri ana'-ana' gurunNa, “Ebara'na nia' kalase'rennu a'lampa mange ri balla'na agannu ri wattu lantannamo bangngia, na nakana ri ia, ‘O gang, saresa' rolong angnginrang rotinu tallumbatu,

⁶nasaba' nia' agangku lalang pa'lampang, silalonna battu ri ballakku, natena sikali apa-apa lakusareangi nakanre!’

⁷Ebara'na appiali anjo agannu battu lalang ri balla'na angkana, ‘Teako susa-susaia'! Takkoncimi ballaka, siagang attinroma' siagang ana'-anakku. Takkullea' ambangung assareko apa-apa.’ ”

⁸Nakanamo pole Isa, “Jari antekamma? Kupauangko angkanaya manna pole agannako, mingka tena nalaero' ambangung assareko apa-apa. Mingka lanri tenana nusiri'-siri' tulusu' appala' ri ia, kale'bakkanna ambangunji nampa nasareangko anjo apa nuparalluanga.

⁹Jari Kukanamo anne ri kau: Appala' mako nulanisare; a'boya mako nulanggappa; de'de'mi pakke'buka, nulanisungkeang pakke'bu'.

¹⁰Nasaba' inai-nai appala', iami lannarima; inai-nai a'boya, iami langgappa; inai-nai a'de'de' pakke'bu', iami lanisungkeang pakke'bu'.

¹¹Inai mangge ri kau assarei ulara' ana'na punna appala' juku'?

¹²Yareka assarei olo'-olo' niaka racunna, punna appala' bayao ana'na?

¹³Manna pole ja'dala' ngasengko, mingka angngasseng tonjako assare apa-apa baji' mae ri ana'nu. La'biangampa Manggea ri suruga! LaNapassareangi RohNa mae ri tau appalaka ri Ia!”

¹⁴Ri se'reang allo, nia' se're tau pepe napantamakki setang, na Nabongka Isa assulu' anjo setanga battu lalang ri kalenna anjo tau pepea. Assulu'namo anjo setanga, appakkaramulami anjo taua a'bicara. Jaimi tau lannasa'.

¹⁵ Mingka nia' tommo tau angkana, “Nakkulle Nabongka setanga, nasaba' nisarei koasa ri Beelzebul, Pinggawana setang-setanga.”

¹⁶ Nia' tommo siapa are tau ero' ampa'boyangi kasalang Isa. Jari nasuromi Isa anggaukangi gau'-gau' appakalannasaka, a'jari pammatei ma'nassana angkanaya battu tojengi ri Allata'ala.

¹⁷Mingka Naassengi Isa pattujunna ke'nanga. Jari Nakanamo ri ke'nanga, “Punna nia' se're bansa nata'bage-bage siagang assimusu-musu para ia taunna, mattantu tena nakkulle jarre' ammenteng anjo bansaya. Yareka se'rea balla', punna ta'bage-bage siagang assimusu-musu bonena, mattantu laancuruki bonena anjo ballaka.

¹⁸Kamma tomminjo lalang ri pamarentahanna Setanga; punna assiba'ji-ba'ji para ia silokoang, mattantu laruntungi anjo pamarentahanna. Nukana ngaseng angkanaya lanri koasana Pinggawana Setang nakkulle Kubongka anjo setanga.

¹⁹Jari punna kamma, lanri inai pata koasa nakkulle ana'-ana' gurunnu ambongkai anjo setanga? Kalennami anjo ana'-ana' gurunnu ampa'butti ma'nassanu sala ngaseng!

²⁰Mingka iNakke, lanri koasa battu ri Allata'ala naKubongka setanga. Battuanna, angkanaya appakkaramulami ammarenta Allata'ala ri tangnga-tangnganu ngaseng.

²¹Punna kassa' taua, naganna' sanjatana anjagai balla'na, lasalama' ngasengi pa'barang-baranganna.

²²Mingka punna nia' tau kassakkangang battu angngewai siagang ambetai, lanialleang ngasemmi anjo sanjata napattoanga, nampa nialle passa ngaseng todong nampa nipa'bage-bageang pa'barang-baranganna.

²³ Inai-nai taeroka angngagangangA', sikontutojenna la'jari musui ri Nakke. Siagang inai-nai taeroka ambantuA', sikontutojenna lanapanrakimi jama-jamangKu!”

²⁴“Punna a'lampa roh ja'dalaka ambokoi taua, a'lampami anjo roh ja'dalaka akkuliling ri tampa'-tampa' kalotoroka, ero' a'boya tampa' pammari-mariang. Mingka tanggappayai tampa'. Jari nakanamo ri kalenna, ‘Erokka' ammotere' mange ri balla' le'baka kubokoi!’

²⁵Ri wattunna battu mange ri anjo ballaka, narapikammi sanna' tangkasa'na siagang sanna' baji'na atoro'na bonena anjo ballaka.

²⁶Jari a'lampami pole mange akkio' agang, iamintu tuju roh sannakkanganga ja'dala'na nakalenna. Nampa antama'mo ke'nanga ammantang ri kalenna anjo taua. Kale'bakkanna, a'jari sannakkangammi ja'dala'na siagang kodina sipa'na anjo taua.”

²⁷Le'ba'na akkana kamma anjo Isa, nia'mo sitau baine battu ri alla'na anjo tau jaia angkana ri Isa, nakana, “Teai sipato' upa'na baine anjariangaKo siagang ampasusuaKo!”

²⁸Mingka appialimi Isa Nakana, “La'bi upakkangangi pole tau allangngerekai siagang anggaukangi kana-kananNa Allata'ala!”

²⁹ Lalang nikulilinginNa Isa ri tau jaia, Nasambungimi bicaranNa Nakana, “Teai sipato' ja'dala'na ngaseng taua ri anne jammanga. NasuroA' anggaukangi gau' appakalannasaka sollanna akkulle tappa' ke'nanga ri Nakke. Mingka manna sirupa tena todong gau' appakalannasa' lanipicinikiangi, pantaranganna gau' appakalannasa' le'baka kajariang ri kalenna Na'bi Yunus.

³⁰ Antekamma appakalannasa'na anjo apa kajarianga ri kalenna Yunus mange ri tau niaka ri Niniwe, kamma tomminjo lappakalannasa'na apa kajarianga ri KalenNa Ana' Ma'rupataua mae ri taua ri anne jammanga.

³¹ Ri allo kiamaka sallang, lambangummi nai' Karaeng baine battu Timborang pa'rasanganga siagang taua ri anne jammanga, ansalakangi ke'nanga. Nasaba' ri wattunna ero' anjo Karaeng bainea ampilangngeri pangngajara' mabaji'na Salomo, a'jappami sanna' bellana battu ri cappa'na buttaya. Mingka kamma-kamma anne, siagang anrinni ri tampaka, nia'mi lompoanganga na Salomo!

³² Ri allo kiamaka sallang, lambangummi nai' tau niaka ri Niniwe siagang taua ri anne jammanga, ansalakangi ke'nanga nasaba' ri wattunna akkato'ba Yunus mae ri taua ri Niniwe, toba'mi ke'nanga battu ri dosa-dosana. Mingka kamma-kamma anne, siagang anrinni ri tampaka nia'mi lompoanganga na Yunus!”

³³ “Tenanniakka tau apparinra lampu, nampa nacokko yareka natongko' katoang. Passangalinna lanaboliki anjo lampua irate ri pa'dongkokanna, sollanna akkulle nicini' singara'na ri tau antamaka ri balla'.

³⁴Anjo mataya iami sulona batangkalea. Punna tangkasa' matannu, lasingara' sikali tommi sikontu batangkalennu. Mingka punna ra'masaki matannu, lasassang makkapu' tommi sikontu batangkalennu.

³⁵Lanri kammana, tutu laloko, sollanna tena na'jari sassang anjo singara' niaka ri batangkalennu.

³⁶Punna singara' sikontu batangkalennu, yareka tena sikali manna sike'de' sassanna, ma'nassa lasingara' sikali sikontu batangkalennu, sanrapang nisiori ri cayana lampua.”

³⁷Le'ba'na a'bicara Isa, nia'mo sitau tu Farisi angkioki mange angnganre ri balla'na. Jari a'lampami Isa mange anjoreng angnganre.

³⁸Lannasa'mi anjo tu Farisia anciniki Isa, nasaba' tena Nabissai rolong limanNa nampa angnganre, situru' atoranga ri agamaya.

³⁹Lanri kammana, Nakanamo Isa ri anjo tu Farisia, “Memang ikau tu Farisia, biasana nutangkasi bageang pantaranganna mangkoka siagang piringa; mingka bageang lalanganna sanna' ra'masa'na lanri tena nutangkasi. Kamma tomminjo sanrapanna bageang lalanganna kalennu, teai sipato' ra'masa'na napakamma sekke' siagang kaja'dallang.

⁴⁰Ikau tolo ngasengko! Sai anjo Napa'niaka Allata'ala iamintu bageang pantaraka siagang bageang lalanga?

⁴¹Anjo bageang lalanganna mangko'nu siagang pirinnu, iaminjo musti nupassareang mae ri tu kasi-asia. Punna kammamo anjo batenu, ma'nassa la'jari tangkasa' ngasemmi ri kalennu.

⁴² Cilaka ngaseng mako ikau tu Farisia! Nupassareammi ri Allata'ala bage sampulona wassele' lamung-lamunnu, kammaya lanipareka minynya'-minynya' rampa, yareka rampa-rampa maraengannaya; mingka kaminang parallua, iamintu kaadelanga siagang pangngamaseanga ri Allata'ala, tena sikali nanujampangi. Na sikontutojenna iaminjo rolong parallu nugaukang, nampa tena todong nukaluppai maraenganga.

⁴³Cilaka ngaseng mako ikau tu Farisia! Nasaba' nungai ammempoa ri tampa'-tampa' tu nipakala'birika lalang ri balla' sambayanga, siagang nungai punna nipakala'birikko ri taua ri pasa'-pasaraka.

⁴⁴Cilaka ngaseng mako! Nasaba' sanrapangko jera' tenaya mesanna, nionjo'-onjokanga ri taua natanaassenga taua.”

⁴⁵Nia'mo kalase'renna guru agama angkana ri Isa, nakana, “Pa' Guru, Kihina-hinai tommaki' anne ikambe, lanri akkana kammaTa!”

⁴⁶Appialimi Isa Nakana, “Cilaka ngaseng tommako ikau guru-guru agamaya! Nusuroi taua anggaukangi apa-apa sukkaraka, siagang nusarei taua atorang-atorang battala'; mingka manna sike'de' tena todong nanubantui taua anggaukangi.

⁴⁷Cilaka ngaseng mako! Nupapparekangi jera' na'bi-na'bia, nampa boe-boenumi le'ba' ambunoi anjo na'bi-na'bia.

⁴⁸Jari kalennumi angngakui angkanaya nupassamaturuki anjo apa le'baka nagaukang boe-boenu; nasaba' boe-boenu memang ambunoi na'bi-na'bia, nampa ikau ampapparekangi jera'na.

⁴⁹Iaminjo na nakanamo Kana mabaji'Na Allata'ala, ‘LaKusuroi na'bi-na'bia siagang tunisuroKu mange ri ke'nanga; mingka nia'mo sipa'gang lanabuno, siagang nia'mo sipa'gang lanasessa!’

⁵⁰Kammaminjo Nagaukang Allata'ala, sollanna akkulle nihukkung taua ri anne jammanga, lanri pammunoang le'baka nagaukang ke'nanga mae ri na'bi-na'bia, appakkaramula ri wattunna nipa'jari linoa.

⁵¹ Iamintu pammunoang appakkaramulaya battu ri Habel sa'genna Zakharia, le'baka kajariang ri ampi'na pakkoro'bangnganga siagang Balla'Na Batara. Patappa'mi angkanaya: Passabakkang yangaseng minjo namattantumo lanihukkunna ngaseng anne taua ri anne jammanga.

⁵²Cilaka ngaseng mako ikau guru-guru agamaya. Nasaba' niaki ri kau niboli' koncina pangngissenganga. Mingka kalennu tonji taeroka antama' amboyai anjo pangngissenganga. Ba'lalo, ikau ngasemmi anrompa-rompai sikamma tau eroka antama'!”

⁵³Ri wattunna a'lampamo Isa ambokoi anjo tampaka, sanna'mi nicallana Isa ri guru-guru agamaya siagang tu Farisia. Appakkaramulami ke'nanga angngeppangi Isa sollanna pila' a'rupa-rupami pole Nabicara Isa, nakkulle sala bicaraNa.

⁵⁴Nalalang kammana anjo napilangngeri baji'-baji'mi ke'nanga sollanna akkulle najakkala' kananNa Isa punna sala bicarai.