Read Makassar Version – KITTA' MATANGKASA LUKAS 13 Bible Online

LUKAS 13 - Makassar Version – KITTA' MATANGKASA bible

LUKAS 13

¹Anjo wattua nacaritami taua ri Isa passala'na siapa are tu Galilea le'baka nibuno ri Pilatus, ri wattunna assare koro'bang ke'nanga ri Allata'ala.

²Nalangngere'na Isa anjo caritaya Nakanamo, “Jari lanri nibunona anjo ke'nanga nanukanamo lompoangangi dosana ke'nanga na sikontu tu Galilea maraenganga?

³Tena sikali! Mingka u'rangi, angkanaya: punna tena nutoba' battu ri dosa-dosanu, lamate kamma ngaseng tongko anjo ke'nanga.

⁴Jari antekamma anjo tau sampuloa assagantuju, matea todong ri balang Siloam ri wattunna niutungi ke'nanga ri rumbanna cappa'na manaraya? Nukana iaminjo a'jari pammatei angkanaya lompoangangi dosana ke'nanga na sikontu tau maraenga, niaka ammantang ri Yerusalem?

⁵Tena sikali! Sikalipi pole Kupauangko angkanaya: Punna tena nutoba' battu ri dosa-dosanu, lamate kamma ngaseng tongko anjo ke'nanga.”

⁶Le'baki anjo, Nacarita tommi Isa anne pangngebaranga, Nakana, “Nia' se're tau, nia' poko' ara ri koko anggoro'na. Ri se'reang allo nanaboya rapponna anjo poko' araya, mingka tena manna sibatu nabuntulu' rapponna.

⁷Jari, nakanamo ri pajamana anjo kokoa, ‘Cinissai, tallung taumma' battu amboyai rapponna anne poko' araya, mingka manna sibatu tania' rapponna kubuntulu'. Ta'bammi anne poko' araya! Poro nala'bussina kanre battu lalanga ri buttaya!’

⁸Mingka appialimi anjo pajama kokoa nakana, ‘Lappassammi attallasa' pole sitaung, karaeng. Lakubingkungi butta ri tammulilina siagang lakusarei pupu'.

⁹Barangiapa nala'rappo ri taung labattua. Mingka punna tena ijapa na'rappo, akkullemi kisuro ta'bang.’ ”

¹⁰Ri se'reang allo Pammari-marianga, angngajaraki Isa ri se'reang balla' sambayang.

¹¹Nia'mo anjoreng sitau baine garring, lanri nia'na roh ja'dala' lalang ri kalenna. Na sampulomi assagantuju taung garring anjo bainea. A'bukku'mi siagang tena sikalimo nakkulle ammenteng.

¹²Nacini'na Isa anjo bainea, Nakio'mi Nakana, “Ibu', ta'lappasa' mako battu ri garrinnu!”

¹³Nampa Napadongko' limanNa Isa irateanganna anjo bainea; na anjo wattua akkullemi ammenteng silalonna anjo bainea, nampa ammuji-muji ri Allata'ala.

¹⁴ Larromi kapalana anjo balla' sambayanga, lanri Naballeina anjo bainea ri allo Pammari-marianga. Jari nakanamo ri taua ngaseng, “Nia' annangallo akkulle nipake untu' anjama; lalang allo-allo kammaya minjo nubattu punna erokko niballei, teako ri allo Pammari-marianga nubattu!”

¹⁵Appialimi Isa Nakana, “Munape' ngasengko antu! Ri allo Pammari-marianga nalappassang ngasengi taua sapina yareka jaranna battu ri barana, nampa naerang assulu' untu' nasare je'ne' inung.

¹⁶Anrinni nia' sitau baine, sossoranna Abraham, sampulomi assagantuju taung nisessa siagang nisikko' ri Billisi'. Maka takkulleai nila'gasi passikko'na ri Allo Pammari-marianga?”

¹⁷A'jari siri'-siri' ngasemmi anjo musunNa Isa allangngereki pappialinNa Isa; mingka sikamma tau maraenga sannang sikali anciniki sikamma gau' appakalannasa' Nagaukanga Isa.

¹⁸Akkuta'nammi Isa Nakana, “Antekamma kajarianna punna ammarenta Allata'ala? Apa akkulle Kupare' pangngebarang ampakasingariangko?

¹⁹Lakammaminne pangngebaranna: Nia' silisere' parekang lamungang sannaka ca'dina lisere'na naalle taua nampa nalamung ri kokonna. Nampa attimbo anjo lamunganga, a'jari poko' kayu lompo. Battumi jangang-janganga appare' ru'mung ri tangke-tangkenna.”

²⁰Sikalipi pole akkuta'nang Isa Nakana, “Punna ammarenta Allata'ala apa akkulle Kupare' pangngebarang ampakasingariangko?

²¹Kajarianna lasanrapangi pa'gambang naallea sitau baine, nampa napasileo' patampulo litere' labu', sa'genna a'bakka ngaseng anjo labuka.”

²²Lalang a'jappaNa Isa mange ri Yerusalem, assengkami angngajara' ri kota-kotaya siagang kampong-kamponga.

²³Nia'mo tau akkuta'nang ri Ia angkana, “Pa', maka sike'de'ji tau lanipasalama'?” Appialimi Isa Nakana,

²⁴ “Usaha mako antama' siagang numalo ri pakke'bu' seppaka. Nasaba' u'rangi! Jai sikali tau ero' antama' mingka takkulleai.

²⁵Ri wattunna ambangung patanna balla' siagang natongko' pakke'bu'na, ammentengko pantaranganna ballaka nanukatto'-katto' pakke'buka nukana, ‘Karaeng, kisungke sai pakke'buka!’ Lappialimi anjo karaenga nakana, ‘Takuassengako angkana tau battu kemaeko!’

²⁶ Lappiali ngaseng mako angkana, ‘Le'ba' maki' sipangnganreang, siagang le'ba' tommaki' angngajara' ri oloang-oloanga lalang ri kotana ikambe!’

²⁷ Mingka lanakanamo pole anjo karaenga, ‘Takuassengako angkana tau battu kemaeko. Bellako anrinni, ikau tau a'gau' ja'dalaka!’

²⁸ Ri wattunna nucini' Abraham, Ishak, siagang Yakub kammayatompa na'bi-na'bia a'rannu-rannu lalang ri Lino BeruNa Allata'ala, langngarru' mako siagang lasessa mako, nasaba' lanibongka mako ikau assulu'!

²⁹Lania'mi taua battu iraya siagang battu ilau', kammayatompa battu wara' siagang battu timboro' la'rannu-rannu lalang ri Lino BeruNa Allata'ala.

³⁰ Sikontutojenna, nia' tau ri boko dudu la'jari ri dallekang dudu, na nia' tau ri dallekang dudu la'jari ri boko dudu.”

³¹Anjo todong wattua, nia'mo siapa are tu Farisi battu mae ri Isa na nakana, “TeaKo ammantangngi anrinni! A'lampaKo mange ri tampa' maraenga, nasaba' eroki Herodes ambunoKo.”

³²Appialimi Isa Nakana, “Mange mako pauangi anjo tau tenaya matu-matunna angkanaya, ‘Anne alloa siagang ammuko Kubongkai setanga siagang Kuballei tau garringa, mingka ri maka talluna alloa, laKupa'le'baki jama-jamangKu.’

³³Mingka manna nakamma, anne alloa, siagang ammuko yareka ammembara', laKupatulusu' tonji lampaKu. Nasaba' tena nabaji' na'bia nibuno ri pantaranganna Yerusalem.

³⁴O, tuniaka ri Yerusalem, tuniaka ri Yerusalem! Nubunomi na'bi-na'bia! Nusambilami batu sa'genna mate sikamma tu Nasuroa Allata'ala! Pissiapa are mako ero' Kukalimbuki, sanrapang anrong janganga angkalimbuki ana'-ana'na irawanganna ka'nyi'na, mingka taeroka ngasengko!

³⁵ Lanri kammana tenamo Narurungangko Allata'ala! Assemmi angkanaya, appakkaramula ri kamma-kammaya anne tenamo nalanucinikKa', sa'genna nukana, ‘Nibarakkakimi Ia battua lalang arenNa Batara.’ ”